پلاک ولوں تقریباں فیض احمد فیض دی ورسی اُتے تقریب،بابا گرو نانک جی انٹرنیشنل کانفرنس، لاہور کالج دی سانجھ نال  انٹرنیشنل پنجابی کانفرنس……٭رویل خبر٭

پنجاب انسٹیٹیوٹ آف لینگویج‘ آرٹ اینڈ کلچر (پِلاک)‘ محکما اطلاعات تے ثقافت پنجاب دے اہتمام ہیٹھ مشہور شاعر فیض احمد فیض دی 37 ویں ورسی دے حوالے نال پنجاب آڈیٹوریم پنجاب کمپلَیکس وچ اک تقریب دا انعقاد کیتا گیا جہدے وچ ڈاکٹر عارفہ سیدہ نے خصوصی رلت کیتی۔ اوہناں نے اپنے خطاب وچ کہیا کہ فیض احمد فیض دی شاعری نے لوکاں وچ احساس تے شعور پیدا کیتا۔ ایس موقع اُتے ڈی جی پِلاک ڈاکٹر صغرا صدف دا کہنا سی کہ فیض احمد فیض اک عظیم شاعر سن‘ اوہناں نے اُردو زبان دے نال نال پنجابی زبان وچ وی بہت عمدا شاعری کیتی۔ تقریب وچ استاد حامد علی خان نے فیض احمد فیض دا کلام پیش کر کے حاضرین کولوں بھرپور داد وصول کیتی۔ استاد حامد علی خان نے پنجابی کلام وی پیش کیتا جہنوں تقریب دے رلتیاں نے بہت پسند کیتا۔ تقریب وچ سلیمہ ہاشمی‘ منیزہ ہاشمی‘ ڈایریکٹر پِلاک محمد عاصم چودھری تے خاقان حیدر غازی سنے ہور شخصیتاں نے وی رلت کیتی۔ پنجاب انسٹیٹیوٹ آف لینگویج‘ آرٹ اینڈ کلچر (پِلاک)‘ محکما اطلاعات تے ثقافت پنجاب دے اہتمام ہیٹھ بابا گرونانک جی دے 552 ویں جمن دیہاڑ دے موقعے اُتے ”بابا گرونانک جی انٹرنیشنل کانفرنس“ دا انعقاد کیتا گیا جہدے وچ ملکی تے بدیسی دانشوراں نے بابا گرونانک جی دے پیغام تے تعلیمات دے حوالے نال گل بات کیتی۔ وچار وٹاندرا کرن والیاں وچ ڈاکٹر نبیلہ رحمن‘ پروفیسر زبیر احمد‘ شگفتہ گمی‘ سردار ہزارہ سنگھ‘ سردار انمول سنگھ‘ ڈاکٹر زیب النساء‘ اقبال قیصر‘ ڈی جی پِلاک ڈاکٹر صغرا صدف تے ڈایریکٹر پِلاک محمد عاصم چودھری تے ہور شامل سن۔ سردار ہزارہ سنگھ نے کہیا کہ بابا جی دے کلام وچ سوانی نوں کمتر سمجھن والیاں دی شدید مذمت کیتی گئی اے۔ اوہ کہندے نیں کہ جہڑی ہستی سانوں پیدا کردی اے اوہ انتہائی عزت جوگ اے۔ سردار انمول سنگھ نے کہیا کہ جہڑی محبت تے پیار سانوں پاکستان وچ ملیا اے اوہنوں بھلایا نہیں جا سکدا۔ تے ماں بولی پنجابی دے حوالے نال جنا کم ایتھے ہو رہیا اے اوہ تحسین دے قابل اے۔ اوہناں نے ہور کہیا کہ سکھ یاتریاں نوں اوہناں دے پاکستان دے دورے لئی بہترین سہولتاں پہنچان اُتے اسیں حکومت پاکستان دے تہ دل توں مشکور آں۔ ڈایریکٹر جنرل پِلاک ڈاکٹر صغرا صدف نے کہیا کہ صوفی ساریاں دے سانجھے نیں‘ اوہناں اُتے کسے دی اجارا داری نہیں اے‘ ساریاں نے محبت‘ امن تے برداشت دا درس دِتا اے جہدی فی زمانا اہمیت ہور وی ودھ گئی اے۔ ڈاکٹر زیب النساء نے کہیا کہ بابا گرو نانک دے کلام وچ مادا پرستی دی بے حد مذمت کیتی گئی اے۔ شگفتہ گمی نے وی پنجابی زبان فن تے ثقافت دے فروغ لئی پِلاک دیاں کوششاں دی بے حد تعریف کیتی۔ اقبال قیصر نے کہیا کہ ایہ بابا گرونانک جی دی کرامت اے کہ جتھے اوہناں نے زندگی دے آخری دن لنگھائے اج اوتھوں ای محبتاں تے پیار دے سلسلے دا اغاز ہو چکیا اے۔ ڈایریکٹر پِلاک محمد عاصم چودھری نے وچار وٹاندرا کردیاں ہویاں کہیا کہ بابا گرو نانک جی نے امن‘ پیار تے برداشت دا پیغام دِتا اے تے صوفیاں دے ایسے پیغام دی ترویج لئی پِلاک مختلف تقریباں دے نال نال ایف ایم ریڈیو راہیں پنجابی زبان تے صوفیاں دے پیغام نوں ساری دنیا وچ کھلارن لئی اہم کردار ادا کر رہیا اے۔ ایس موقعے اُتے سائیں ظہور احمد‘ انور رفیع‘ عمران شوکت‘ استاد طاہر اقبال‘ عقیل طاہر تے ناصر بیراج نے صوفیانا کلام پیش کیتا تے حاضرین کولوں بھرپور داد وصول کیتی۔ ادارے ولوں مہماناں نوں پھُلاں دے تحفے وی پیش کیتے گئے۔ تقریب وچ نظامت دے فرایض مسعود خالد ملہی نے سرانجام دِتے۔ پنجاب انسٹیٹیوٹ آف لینگویج‘ آرٹ اینڈ کلچر (پِلاک)‘ محکما اطلاعات تے ثقافت پنجاب تے لاہو ر کالج برائے خواتین یونیورسٹی لاہور دی سانجھ نال چوتھی انٹرنیشنل پنجابی کانفرنس ”پنجابی زبان‘ ادب‘ فن تے ثقافت“ دے حوالے نال اک کلچرل سیشن دا اہتمام کیتا گیا۔ ایس موقعے اُتے ڈایریکٹر جنرل پِلاک ڈایکٹر صغرا صدف نے کہیا کہ پِلاک دی ہمیشا کوشش رہی اے کہ نوجوان نسل لئی اگے ودھن دے بھرپور مواقع فراہم کرے تاں جے ساڈی نوجوان نسل ملک تے قوم دی ترقی تے خُشحالی وچ اہم کردار ادا کر سکے۔ کرونا پاروں ساڈیاں سرگرمیاں وچ جہڑا ٹھہراؤآیا سی اوہدے اختتام اُتے ہُن نویں سرے توں سرگرمیاں دا اغاز ہو چکیا اے۔ اوہناں نے کہیا کہ پِلاک نے ایف ایم پنجاب رنگ دے 2 نویں ریڈیو سٹیشن ملتان تے راولپنڈی وچ نشریات دا اغاز کر دِتا اے۔ کانفرنس دے کلچرل سیشن وچ اپنے فن دا مظاہرا کرن والیاں وچ ناصر بیراج‘ سجاد بیلا‘ روحیل وقاص‘ عمران ناصر تے کامران بیراج شامل سن۔ پڑھیارناں موسیقی دے پروگرام توں واہوا لطف اندوز ہوئیاں تے کلاسیکل جدید پنجابی موسیقی دے امتزاج نوں بھرپور سلاہیا۔ کانفرنس دے ہور اہم رلتیاں وچ ڈاکٹر مجاہدہ بٹ‘ چیئر پرسن شعبا پنجابی‘ شگفتہ گمی‘ ڈاکٹر عائشہ رحمن‘ ڈاکٹر حنا خان تے ڈایریکٹر پِلاک محمد عاصم چودھری شامل سن۔