زندگی نُوں لنگھانا نہیں جینا چاہیدا اے: ریشم ……٭رویل خبر٭

لاہور (شوبز نیوز) نامور اداکارا ریشم نے کہیا اے کہ سنگیاں نُوں میری شاعری بڑی پسند اے تے جتھے وی سنگیاں دی محفل ہوندی اے شعر سناون دا اصرار کیتا جاندا اے۔ فنکار بڑا حساس ہوندا اے پر میں کجھ بُہتی ای حساس آں۔ اِک انٹرویو وچ ریشم نے کہیا کہ زندگی نُوں لنگھانا نہیں سگوں جینا چاہیدا اے تے اوہی لوک زندگی نُوں جیندے نیں جہڑے زندا دل ہوندے نیں۔ اوہناں نے کہیا کہ ایہ تہاڈے اُتے اے کہ تُسیں لوکاں نال رُس کے تے اُداس رہ کے یاں اپنے چہرے اُتے ہاسا کھلار کے تے لوکاں نال محبت تے چاہت دا اظہار کر کے دن لنگھانا چاہندے او کیوں جے دن تے لنگھ ای جاوے گا تے انج ای ہفتے‘ مہینے تے ورھے لنگھ جان گے۔