گھر دے ماہنوبھُکھے…… ٭رویل کالم٭

گھر دے ماہنوبھُکھے…… ٭رویل کالم٭

پنجابی دا لازوال اکھان اے کہ گھر دے ماہنو بھکھے تے باہر صدقا ونڈی دا۔ ایہ اکھان اج کل بہت چنگی طرحاں ورتوں وچ نظر آ رہیا اے۔ وزیر اعظم ہوراں فرمایا اے کہ ملک چلان لئی پیسے کوئی نہیں۔ اوہناں مطابق ملک وچ ٹیکس کلچر بہت ضروری اے۔ 6ٹریلین قرضا سی‘ 10ورھیاں وچ 30 ٹریلین ہو گیا۔ اوہناں دی گل سر متھے۔ بہتر تاں ایہ سی کہ اوہ ویروا کر کے دسدے کہ ایہناں 10 ورھیاں وچوں پہلے 7 ورھیاں وچ کنا ودھیا تے اگلے یعنی جڑیل 3 ورھیاں وچ کنا ودھیا۔ اوہناں دے مطابق ماضی دے حکمراناں نے بدیسی دَوریاں اُتے بہت زیادا پیسے خرچ کیتے۔

ملک چلان لئی پیسے کوئی نہیں‘ ایہ گل سبھ نوں پتا اے تے بلکل گھر دی گل لگدی اے۔ اج کل دے حالات وچ ہر گھر دا آگو ایہو آکھدا وکھالی دیندا اے کہ گھر چلان لئی پیسے کوئی نہیں۔ ایس طرحاں ایہ گل کر کے وزیر اعظم نے پوری قوم دی ترجمانی کر دتی اے۔

ایس گل نوں اک دن پہلی ایس خبر نال رَلا کے پڑھیاجاوے تاں سواد دُونا ہو جاندا اے جہدے مطابق وزیر اعظم نے افغانستان واسطے 5 ارب دی امداد دی منظوری فرمائی اے۔ یقینن پنج ارب دی رقم اجوکے مہنگائی دے دور وچ کوئی خاص وقعت نہیں رکھدی پر فیر وی اجہے دیس واسطے جہدے چلان لئی پیسے کوئی نہ ہوون‘ اوتھے پنج ارب نال کوئی ماڑا موٹا خرچا پورا کیتا جا سکدا اے۔ دو چار میل دی سڑک‘ کوئی ہور فلاحی کم کیتا جا سکدا اے۔ صدقا خیرات دینا بہت چنگا کم اے پر ایہ صرف اوہناں لوکاں اُتے ای فرض ہوندا اے جہڑے بنیادی ”نصاب“ دے مالک ہوون۔ جے بندا آپ منگ کے کھا رہیا ہووے تاں فقیر نوں روٹی دینا مہنے دی گل بن جاندی اے۔

وزیر اعظم ہوراں نوں شاید اوہناں دے بدیسی تے آئی ایم ایف دے ٹھوکے ہوئے وزیراں مشیراں نے نہیں دسیا کہ ایس دیس دے عوام ٹیکس دے رہے نیں‘ سگوں اپنی بِت توں ودھ کے تے کئی کئی تھاں ٹیکس دے رہے نیں۔ جنا ٹیکس اوہ بھردے نیں‘ اوہ دسے گئے نالوں کئی گنا ودھ ہوندا اے تے بہت سارے ٹیکس اُسِدھے وی ہوندے نیں جو لوک دیندے پئے نیں۔

افغانستان‘ جہدے وصل دی تمنا وچ اسیں مجنوں وانگ اپنی ساری زندگی برباد کر لئی‘ اوہدے ایس رومان نے سانوں بربادی دیاں آخری حداں تیکر اپڑا دتا ہویا اے۔ اسیں ترلے کر کر کے دنیا کولوں منگ کر رہے آں کہ اوہ افغانستان دا خیال کرے پر دنیا ساڈی سُنن دی بجائے سانوں شک شبھے دی نظر نال ویکھدی اے۔ شاہ نالوں ودھ کے شاہ دی ایہ وفاداری عجیب وی اے۔ افغانستان توں آئے لکھاں مہاجرساڈی لوکائی دے سر اُتے سوار نیں تے ساڈی دھون اُتے نہوں رکھ کے ساڈے وسیلے کھا رہے نیں‘ نال سانوں گھوردے وی نیں۔ اجہی حالت نال تے لوکائی دے بھکھ ننگ وچ افغان بھراواں دی مدد‘ ثواب دے کم نالوں ودھ کے لوکائی دے زخماں اُتے لون برورن والی گل اے۔

٭٭٭٭٭