مِنی بجٹ دا اعلان آندے ہفتے تک، بجلی دی قیمت  وڈا مسئلا نہیں  پٹرول دی قیمت دے بُہتے اثرات پیندے نیں: شوکت ترین……٭رویل خبر٭

اسلام آباد (نیوز ڈیسک) مشیر خزانا شوکت ترین نے اعتراف کیتا اے کہ حکومت نے جے ویلے اُتے مائع قدرتی گیس (ایل این جی) کارگو ز خرید لئے ہوندے تے گیس دے بحران دا ساہمنا نہ کرنا پیندا‘ آئی ایم ایف دے معاہدے دیاں شرطاں پہلے وانگوں سخت نہیں نیں‘ لکی مروت تے دوجیاں تھاواں اُتے گیس لبھی اے‘ مقامی کمپنیاں کجھ نہیں کر رہیاں نیں‘ دسمبر تے جنوری دے وچکار قیمتاں گھٹ ہون گیاں‘ منی بجٹ دا اعلان آندے ہفتے تک کر دِتا جاو یگا۔ انٹرویو چ شوکت ترین نے کہیا کہ ایہدے وچ کوئی شک نہیں اے ملک وچ گیس مہنگی اے۔ ملک وچ گیس دے ڈاڈھے بحران دے حوالے توں سوال اُتے شوکت ترین نے کہیا کہ پچھلے دناں وچ سانوں جو کارگوز لے لینے چاہیدے سن اہ اسیں نہیں لئے‘ پر جے کارگوز ویلے اُتے خرید لئے جاندے تے فیر وی صرف 2 توں 3 مہینیاں دا ای فایدا ہوندا‘ حالے حالات ایہ نیں کہ پٹرول تے گیس دی درآمدات 7 توں 8 ڈالرز ودھ گئیاں نیں۔ اوہناں نے کہیا کہ دسمبر تے جنوری دے وچکار قیمتاں گھٹ ہون گیاں۔ اوہناں نے کہیا کہ لکی مروت تے دوجیاں تھاواں اُتے گیس لبھی اے‘ مقامی کمپنیاں کجھ نہیں کر رہیاں نیں کیوں جے اوہناں دے کول کیش نہیں ہے‘ اوہناں دے اُتے گردشی قرضا اینا اے کہ اوہ ڈویڈنٹ نہیں دے سکدیاں‘ تے جویں ای اوہ ڈیویڈنٹ دین گیاں ایہدی قیمت ودھ جاوے گی۔ آئی ایم ایف دیاں سخت شرطاں دے حوالے توں مشیر خزانا شوکت ترین نے کہیا کہ آئی ایم ایف نال دوجے معاہدیاں دیاں سرطاں پچھلے معاہدے دے مقابلے اینیاں مشکل نہیں نیں۔ اوہناں نے کہیا کہ پچھلے معاہدے وچ 700 ارب رُپئے دے نویں ٹیکسز لانے سن تے بجلی دے فی یونٹ اُتے 4 رُپئے دا ٹیرف ودھانا سی تے مرکزی بینک نُوں ازاد بنانا سی۔ اوہناں نے کہیا کہ میں اپریل وچ عہدا سنبھالیا تے حکومت آئی ایم ایف نال پہلے ای معاہدا کر چکی سی‘ میں حکومت نُوں ٹیکس دین والیاں اُتے بھار گھٹ کر کے ہور ٹیکس کندگان نُوں ٹیکس دے دایرا کار وچ لیان دا مشورا دِتا۔ اوہناں نے کہیا کہ میں حکومت نُوں کہیا کہ گردشی قرضے ودھن دا کارن بے شمار بجلی گھر نیں‘ اج تُسیں ٹریف وچ وادھاو کرو تے ایہدا نقصان عام شہری نُوں بھرنا پوے گا ایس لئی ایہدا کوئی دوجا حل کڈھیا جاوے۔ پیشگی اقدامات دے حوالے توں شوکت ترین نے کہیا کہ آئی ایم ایف نُوں اِک موقع ملیا جدوں میں 2008 وچ آئی ایم ایف گیا سی تے اوہناں نے کہیا سی کہ پاکستان وچ افراط زر دی شرح 18 فیصد اے تے ڈسکاؤنٹ دی شرح 13 فیصد اے تے ایہنوں ہور 5 فیصد ودھاؤ۔ اوہناں نے کہیا کہ آئی ایم ایف نے کہیا کہ ایہ تہاڈا پہلا پیشگی اقدام ہووے گا جہدے اُتے میں ایس عمل توں انکار کر دِتا سی‘ میں کہیا ایہ تیل دی مہنگائی اے جدوں تیل دی قیمت تھلے آ جاوے گی تے اسیں کیہ کراں گے اسیں اپنا بزنس خراب نہیں کر سکدے‘ میں صرف ڈھائی فیصد ڈسکاؤنٹ ریٹ ودھایا‘ ایہ اوس ویلے دی صورتحال سی۔ آئی ایم ایف دیاں موجودا شرطاں دے حوالے توں اوہناں نے کہیا کہ موجودا سیاسی حالات دے پیش نظر اسیں ایہ گل پارلیمنٹ وچ لے جاواں گے تے تِناں معاملیاں اُتے تہانوں فنانس بل لیانا پوے گا۔ اوہناں نے کہیا کہ آئی ایم ایف نے 700 ارب رُپئے ٹیکس دی گل کیتی سی اسیں 300 ار ب رُپئے اُتے متفق ہوئے۔ اوہناں نے کہیا کہ 4 رُپئے 95 پیسے ٹریف ودھاؤ اسیں ادھے ٹیرف ریٹ اُتے اوہناں نُوں راضی کیتا۔ شوکت ترین نے کہیا کہ آئی ایم ایف دے معاہد ے وچ موجود سٹیٹ بینک بارے کئی ایہو جہیاں شرطاں اسیں کڈھ دِتیاں نیں جہڑیاں اسیں پوریاں نہیں کر سکدے۔ اِک سوال دے جواب وچ شوکت ترین نے دَسیا کہ منی بجٹ دا اعلان آندے ہفتے کر دِتا جاوے گا‘ منی بجٹ نال 350 ارب رُپئے دی چھوٹ ختم کیتی گئی اے تے ایہ اوہ لوک نیں جہناں نے کسے نہ کسے انداز وچ چھوٹ حاصل کیتی ہوئی اے۔ اوہناں نے کہیا کہ آئی ایم ایف دا کہنا اے کہ تُسیں ساریاں لئی اِک ٹیکس ریٹ 17 فیصد کر دوو۔ 17 فیصد ٹیکس ریٹ دی وجھا توں مارکیٹ اُتے دباء دے حوالے توں کیتے گئے سوال اُتے شوکت ترین نے کہیا کہ ایہدے نال مارکیٹ وچ تھوڑا بہت دباء پیدا ہووے گا تے ایہدے اثرات نمو اُتے وی پین گے۔ گڈیاں دیاں قیمتاں بارے سوال اُتے اوہناں نے کہیا کہ گڈیاں دی قیمت و چ کمی دا اِک طریقا اپنایا گیا سی‘ جہد ے نال نمو وچ وادھا ہویا‘ سانوں ہُن توں روکنا پوے گا۔ اوہناں دا ودھدے ہوئے کرنٹ اکاؤنٹ کسارے اُتے کہنا سی کہ 15 ارب دے کرنٹ اکاؤنٹ کسارے وچ ویکسین وی شامل اے جو فنڈڈ اے پر اوہناں دا کہنا سی کہ کرنٹ اکاؤنٹ کسارے نُوں گھٹ کرنا پوے گا۔ بجلی قیمت دے حوالے توں مشیر خزانا نے کہیا کہ بجلی دی قیمت وچ 4 رُپئے توں بُہتا وادھا کرن لئی کہیا گیا‘ پر اسیں 1 رُپیا 68 پیسے وادھا کیتا پر اوہناں نے کہیا کہ بجلی دی قیمت اینا وڈا مسئلا نہیں اے پر پٹرول دی قیمت دے بُہتے اثرات پیندے نیں‘ جے پٹرول دی قیمت گھٹ نہیں ہوئی تے ایہ لوکاں لئی بھار ہووے گا۔ اوہناں نے کہیا کہ ڈسکاؤنٹ دی شرح وچ وادھے نال ایہنوں کنٹرول کیتا جا سکدا اے تے ہُن دُبارا اوہ ویلا نہیں آئے گا جدوں شرح سود 13 فیصد توں بُہتی سی۔ شوکت ترین نے شرح تبادلا دے حوالے توں کہیا کہ ایہ سٹیٹ بینک دا معاملا اے‘ میرا خیال اے کہ جدوں تک مہنگائی گھٹ نہیں ہووے گی شرح تبادلا تھلے نہیں آئے گا‘ ایہنوں مستحکم رکھنا ضروری اے۔ اوہناں نے کہیا کہ شرح تبادلا د ا سبھ توں وڈا نقصان مہنگائیا ے تے ایہد ینال کھان دیاں شیواں دی برآمدات اُتے اثر پیندا اے۔ نجکاری بارے سوال اُتے اوہناں نے کہیا کہ ساڈے کول ایہو جہے کئی منصوبے موجود نیں جہدے وچ آر ایل این جی پلانٹس وی شامل نیں‘ ساڈے کول 15 ادارے نیں جہدے وچ ارباں رُپئے دا نقصان ہوندا اے‘ ایہدے لئی اسیں اِک بورڈ بناواں گے‘ سبھ توں پہلے ڈسکوز فیر پی آئی اے تے ایہدے بعد ریلوے سنے ہور اداریاں دی نجکاری ہووے گی