ثاقب نثار نے انصاف دا قتل کیتا، لِیک آڈیو گناہواں دا اعتراف اے: مریم نواز……٭رویل خبر٭

اسلام آباد (نیوز ڈیسک) مسلم لیگ (ن) دی نائب صدر مریم نواز نے کہیا اے کہ پچھلے چیف جسٹس ثاقب نثار دَسن کہنے تہانوں مریم تے نواز شریف نُوں سزا دین اُتے مجبور کیتا۔ پچھلے چیف جسٹس نے انصاف دا قتل کیتا‘ اوہناں دی لِیک آڈیو گناہواں دا اعتراف اے۔ ثاقب نثار دے گناہواں دا بھار عدلیا نہ چُکے‘ عدلیا ایس معاملے توں اپنے آپ نُوں وکھرا کر لوے‘ ججز دے ہتھ وچ اے نواز شریف نُوں انصاف دین تے اپنے چہرے توں ایس داغ نُوں دھون۔ بدھ نُوں اسلام آباد وچ نیوز کانفرنس کردیاں ہویاں مریم نواز نے کہیا کہ نامور امریکی ادارے توں آڈیو دی فرانزک کیتی گئی اے جہدے وچ اوہناں نے کہیا کہ ایہ آڈیو ایڈیٹڈ نہیں اے۔ جدوں ایہ آڈیو ساہمنے آئی تے ثاقب نثار صاحب دا کہنا سی کہ ایہ اوہناں دی آڈیو نہیں اے‘ بعد وچ اِک چینل دی مدد نال اوہناں نے قبول کیتا تے کہیا کہ ایہ آڈیو توڑ جوڑ کے بنائی گئی اے‘ ثاقب نثار نُوں اج نہیں تے کل سچ دَسنا پوے گا۔ ثاقب نثار دی آڈیو گناہواں دا اعتراف اے‘ ثاقب نثار نے انصاف دا قتل کیتا‘ اوہناں دی سازش دے خلاف قدرت دا نظام حرکت وچ آ چُکیا اے‘ کہنے ایہناں نُوں کہیا کہ عمران خان نُوں لیانا اے‘ دَسّو تہانوں کہنے مجبور کیتا کہ نواز شریف تے مینوں سزا دوو تے تُسیں غیر قانونی اقدامات اُتے کیوں مجبور ہوئے تے اوہ کون سی جہنوں تُسیں چیف جسٹس ہوندیاں وی انکار نہیں کر سکدے سوں۔ اوہناں نے کہیا کہ بدقسمتی نال ساڈے فیصلے ادارے دیندے نیں‘ آڈیو وچ ایہناں نے کہیا کہ عمران خان نُوں لیانا اے تے نواز شریف نُوں سزا دینی پوے گی‘ تے دھی نُوں وی سزا دِتی جاوے گی۔ اوہناں نے کہیا کہ میں پروپیگنڈا کرن والے چینل نُوں کہنا چاہندی آں کہ اوہ جملے دَسن جہڑے تُسیں لُکا رہے او تے ساڈی رہنمائی کرو کہ ایہ جملے ثاقب نثار نے کہڑی تقریر و چ کہے سن۔ اوہناں نے کہیا کہ جسٹس شوکت عزیز نے جے کوئی الزام لایا اے جہدے وچ تُسیں اعتراف کیتا اے کیہ اوہ ویڈیو وی جھوٹھی اے۔ اوہناں دا کہنا سی کہ شوکت عزیز دی گواہی دے بعد ارشد ملک جہناں نے نوا ز شریف نُوں سزا سنائی سی اوس ویلے جہڑی میں ویڈیو ریلیز کیتی سی لوکائی دے ساہمنے اے۔ جسٹس کھوسا صاحب نے اوس ویلے کہیا سی کہ فیصلا عدلیا دے چہرے اُتے کالا داغ اے تُسیں اوس جج نُوں کڈھ دِتا پر اوہ فیصلا ہُن وی موجود اے۔ گلگت بلتستان دے جج دا بیان حلفی ساہمنے آیا سی جہدے وچ اوہناں نے کہیا سی کہ چیف جسٹس صاحب نے کسے نُوں فون کیتا جہدے وچ اوہناں نے کہیا کہ الیکشن توں پہلاں مریم تے نواز شریف نُوں ضمانت نہیں دینی۔ آڈیو تے ویڈیو وچ شک تے شبہات ہو سکدے نیں پر گلگت بلتستان دے چیف جج تے شوکت عزیز حیات نیں اوہناں نُوں سَد کے ایس حوالے توں پُچھو۔ اوہناں دا کہنا سی کہ ایہ نواز شریف تے ن لیگ دے حق وچ پنجویں گواہی اے‘ عمران خان نُوں کہیا گیا کہ نواز شریف دے خلاف درخاست ساڈے کول لیاؤ‘ پاناما وچ 450 بندیاں دے ناں آئے‘ کِسے نُوں کجھ نہیں کہیا گیا جہدا ناں نہیں آیا اوہنوں سزا دِتی گئی‘ پُتر توں تنخاہ نہ لین اُتے وزیراعظم نُوں آفس توں باہر کڈھیا گیا۔ مریم نواز نے کہیا کہ ثاقب نثار دے گناہواں دا بھار عدلیا نہ چُکے‘ عدلیا ایس معاملے توں اپنے آپ نُوں وکھرا کر لوے‘ ججزدے ہتھ وچ اے نواز شریف نُوں انصاف دین تے اپنے چہرے توں ایس داغ نُوں دھون‘ اسیں ا یہناں نُوں ایہ موقع دے رہے آں۔ ثاقب نثار 22 کروڑ لوکائی دے مجرمنیں‘ اوہ جنی چھیتی غلطیاںسدھا ر لین گے چنگا اے۔