دیس دا اصل مسئلا کرپشن اے،  صرف اینا دَس دو  لندن وچ فلیٹ کتھوں لئے‘ نواز شریف نُوں عدالت نے سزا دِتی اوہ برطانیا نَس گئے:عمران خان ……٭رویل خبر٭

اسلام آباد (نیوز ڈیسک) وزیراعظم عمران خان نے کہیا اے کہ سانوں اپنیاں اخلاقیات دا معیار اُچا کرنا پوے گا‘ جہڑی قوم دیاں اخلاقیات ختم ہو جان یاں اوہناں وچ چنگے بُرے دی تمیز ختم ہو جاوے تے اوہ قوم ختم ہو جاندی اے‘ ساڈا سسٹم کرپٹ اے تے ایہنوں ٹھیک کرن وچ ویلا لگے گا‘ مینوں افسوس اے ججز دی کانفرنس وچ اِک سزا یافتا ملزم توں تقریر کروائی گئی‘ ایہ ٹیپاں سارا ڈراما اے جد کہ ملک دا اصل مسئلا کرپشن اے‘ پاکستان وچ پہلی وار گھر بنان لئی حکومت سود دے بغیر قرضے دیوے گی‘ صحت انصاف راہیں لوکائی 7 توں 10 لکھ رُپئے تک علاج کسے وی ہسپتال وچ کروا سکن گے۔ ایہناں خیالاں دا اظہا ر اوہناں نے بدھ والے دن اسلام آباد وچ کامیاب نوجوان پروگرام کنونشن نال خطاب کردیاں ہویاں کیتا۔ وزیراعظم عمران خان دا کہنا سی کہ عثمان ڈار نُوں خراج تحسین پیش کردا آں‘ عثمان ڈار نے محنت تے جنون دے نال کم کیتا‘ کئی لوک سمجھدے سن کہ کجھ نہیں ہووے گا پر عثمان محنت کردا رہیا‘ کامیاب جوان پروگرام ساڈے منصوبیاں وچ سبھ توں ودھ کامیاب ہووے گا‘ 9 سال دا سی تے اپنی والدا دے نال لاہور سٹیڈیم وچ ٹیسٹ میچ ویکھن گیا سی‘ اپنی والدا نُوں کہیا کہ میں ٹیسٹ کھڈاری بننا چاہندا آں‘ ساریاں نے مینوں کہیا کہ تُسیں ٹیسٹ کھڈاری نہیں بن سکدے‘ میں محنت کیتی‘ غلطیاں توں سکھیا تے اللہ نے مینوں کامیابی عطا کیتی‘ کوئی وی انسان اج تک محنت دے بغیر کامیاب نہیں ہوئی‘ کوئی انسان شارٹ کٹ راہیں کامیاب نہیں ہو سکدا‘ وڈیس وچ رکھن والا بندا ای وڈا بندا بن سکدا اے‘ کامیاب اوہ بندا ہو ندا اے جہڑا وڈی سوچ تے وڈا خاب رکھدا اے تے فیر ہار نہیں مندا‘ اپنیاں غلطیاں توں سکھ کے انسان اُتے چلا جاندا اے۔ مہنگائی دے حوالے توں عمران خان نے کہیا کہ دنیا وچ لاک ڈاؤن لگا‘ کاروبار تے سپلائی لائن متاثر ہوئی‘ ایہ ویلا ساڈے لئی مشکل اے‘ دنیا وچ کرونا دی وجھا توں بُرا ویلا سی‘ ہر شے مہنگی ہو گئی‘ ایہ ویلا ایس پوری دنیا دا مسئلا اے۔ 40 لکھ خانداناں نُوں سود دے بغیر گھر لئے قرضے دِتے جان گے۔ مینوں سبھ توں ودھ فخر یونیورسل ہیلتھ کوریج اُتے اے۔ ہر شہر نُوں اسیں ہیلتھ انشورنس دے رہے آں۔ عمران خان دا کہنا سی کہ نوجواناں دے ہتھ وچ ایس ملک دا مستقبل اے‘ انسان اودوں ای کامیاب ہوندا ا ے جدوں اوہ بُرے ویلے توں سکھدا اے‘ پاکستان سنے پوری دنیا اُتے مشکل ویلا آیا ہویا اے‘ ایہ سبھ کرونا دی وجھا توں اے‘ پر اسیں پاکستانی معیشت نُوں بہتری ول لے کے گئے‘ ساڈی پالیسیاں دیاں تعریفاں دنیا وچ کیتیاں گئیاں۔ وزیراعظم نے کہیا کہ اج کل ہر پاسے ٹیپاں نکل رہیاں نیں‘ ججز دے ناں آ رہے نیں‘ ایہ سبھ ڈراما اے‘ 25 سال پہلے جدوں س یاست وچ آیا سی تے کہیا سی کہ پاکستان دا سبھ توں وڈا مسئلا کرپشن اے‘ کرپشن کرن والے ایہ پیسا باہر گھل کے ملک دا ڈبل نقصان کردے نیں‘ جہڑے ملک دے حکمران پیسا چوری کرن اوہ ملک اگے نہیں ودھ سکدا‘ 2016 وچ پاناما کیس آیا۔ پاناما وچ آف شور کمپنیاں وچ پیسا لُکان والیاں دے ناں آئے۔ ایہدے وچ نواز شریف دا ناں وی آیا تے جدوں کیسز چلے تے نواز شریف نا اہل ہو گئے‘ تے اواز آئی مینوں کیوں کڈھیا‘ پاناما وچ آیا لندن دے چار مہنگے فلیٹاں دی مالکن مریم صفدر نیں‘ تُسیں مینوں صرف اینا دَس دوو کہ لندن وچ 4 فلیٹ کتھوں لئے‘ نواز شریف نُوں عدالت نے سزا دِتی تے اوہ برطانیا نَس گئے۔ وزیراعظم نے کہیا کہ جواب دوو کہ تہانوں ایہ 4 فلیٹ لئے کتھوں؟‘ ساریاں شیواں کر رہے نیں پر جواب نہیں دے رہے نیں‘ عدالتاں نُوں دَس دوو ایہ پیسا کتھوں آیا‘ میرے اُتے کیس کیتا‘ میرا لندن وچ فلیٹ سی پر سپریم کورٹ وچ 40 سال پرانے معاہدے د ے کاغذات دِتے جد کہ میں تے عہدیدار نہیں سی اِک کھڈاری سی تے عدالت نے جو منگیا اوہ میں دے دِتا‘ 10 مہینے لگے۔ اوہناں نے کہیا کہ ایہناں نے پہلے اسمبلی وچ جھوٹھ بولیا‘ فیر قطری خط آ گیا‘ اوہ فراڈ نکلیا‘ فیر کلیبری فونٹ آ گئی اوہ وی فراڈ نکلی‘ تے حالے تک اوہ اِک کاغذ نہیں دے سکے کہ لندن دے فلیٹ کہناں پیسیاں نال لئے گئے کیوں جے چوری دا پیسا سی۔