سعودی عرب نال لازوال رشتا‘ سعو دی قرضے نال سادی معیشت نوں سہارا ملے گا:شیخ رشید……٭رویل خبر٭

راولپنڈی (نیوز ڈیسک) وفاقی وزیر داخلا شیخ رشید نے کہیا اے کہ 6 مہینے بعد بلدیاتی الیکشن ہونے نیں فیر عام انتخابات دا ڈھول وجے گا۔ آندے انتخابات الیکٹرونک ووٹنگ مشین راہیں ہون گے۔ اوورسیز پاکستانیاں نوں ووٹ دا حق ملنا تواریخی اقدام اے۔ نالایق تے نااہل اپوزیشن آندے انتخابات وچ وی شکست دے بعد دھاندلی دا شور مچائے گی۔ تبلیغی جماعتاں نوں آن لاین ویزے دتے جا رہے نیں۔ سعودی عرب نال لازوال رشتا‘ سعو دی قرضے نال سادی معیشت نوں سہارا ملے گا۔ راولپنڈی وچ 60 کالج بنائے تے غریباں دیاں ساریاں وستیاں وچ سرکاری سکولاں تے کالجاں نوں اپ گریڈ کیتا جا رہیا اے۔دھی پڑھی لکھی ہووے گی تے شہر وچ کوئی منشیات فروش یاں قبضا مافیا سر نہیں چک سکے گا۔ ایہناں خیالات دا اظہار اوہناں نے بدھ دے دیہاڑے ایسوسی ایٹ کالج برائے خواتین ایف بلاک سٹیلایٹ ٹاؤن وچ نویں ملٹی پریز ہال دی افتتاحی تقریب نا ل خطاب تے میڈیا نال گل بات کردیاں ہویاں کیتا۔ ایس موقعے اُتے ڈایریکٹر کالجز شیر احمد ستی‘ کالج پرنسپل تے پڑھیارناں دی کثیر گنتی موجود سی۔ شیخ رشید نے کہیا کہ مدینہ دی ریاست وچ وفاقی کابینا نے سبھ توں اہم فیصلا کیتا اے کہ ساریاں تبلیغی جماعتاں نوں آن لاین ویزے دتے جان گے تے وزیراعظم عمران خان نوں ایہ کریڈٹ جاندا اے کہ اوور سیز پاکستانیاں نوں ووٹ دا حق دوا دِتا کیوں جے اوورسیز پاکستانی اوتھے دن رات محنت کر کے پاکستان وچ اپنے بچیاں تے رشتے داراں نوں پیسے گھل رہے نیں ایس لئی ووٹ اوہناں دا حق اے۔اوہناں نے کہیا کہ اپوزیشن ہُن جو مرضی کرے آندا انتخابات الیکٹرونک ووٹنگ مشین راہیں ای ہون گے۔ اوہناں نے کہیا کہ پنجاب دے 40 حلقیاں وچ اوورسیز دے ووٹاں دا فیصلا الیکٹرونک ووٹنگ مشین راہیں ہووے گا تے جدوں پی ٹی آئی اوہناں ووٹاں نال بھاری اکثریت نال جتے گی تے اپوزیشن اک وار فیر دھاندلی دا شور مچائے گی۔ 6 مہینے بعد بلدیاتی الیکشن ہونے نیں فیر الیکشن دا ڈھول وجے گا۔ اوہناں نے کہیا کہ مہنگائی دا حل لبھنا اے کیوں جے مہنگائی پاروں تنخاہ دار طقبا متاثر ہو رہیا اے۔ اوہناں نے کہیا کہ سعودی عرب نال پاکستان دا لازوال رشتا اے۔ سعودیا نے جہڑا قرضا دتا اوہدے اُتے سعودی حکومت دے بہت مشکور آں‘ ایہدے نال پاکستان دی معیشت نوں سہارا دین وچ مدد ملے گی۔ اوہناں نے کہیا کہ مہنگائی ضرور اے پر اسیں ایہدا حل لبھنا اے۔ پاکستان دے معاشی مسئلے نیں‘ مہنگائی پاروں عام بندا تنخاہ دار طبقا متاثر اے جہدا احساس اے۔ چین وی ساڈا بہترین دوست اے۔ اوہناں نے کہیا کہ میں بیرون ملک دوریاں دے شوقین وزیراں وچ شامل نہیں جہناں لئی عمران خان نے کئی وار کہیا وزیر بیرونی ملکاں وچ زیادا دوریاں اُتے نہ جان۔ میں تے راولپنڈی توں باہر جانا ای نہیں چاہندا۔ راولپنڈی دا تیلی محلا بھابڑ بازار مینوں بیرون ملک توں زیادا پسند نیں۔