پنجاب وچ سموگ مُکاء کریک ڈاؤن

انسپکٹر جنرل پولیس دے حکم مطابق پنجاب وچ سموگ مکاء کریک ڈاؤن تیز کر دتا گیا اے۔ دُوجے پاسے کمشنر لاہور ولوں سموگ مکاء سایکل ریلی تے جانکاری پروگرام منعقد کیتا گیا۔ پولیس ولوں سموگ دا کارن بنن والیاں ماحول دشمن سرگرمیاں دے مکاء لئی کارروائی تیز کر دتی گئی اے۔ وادھو دھواں چھڈدیاں گڈیاں‘ فصلاں دا بچ کھچ بالن تے فضائی آلودگی ودھان والیاں فیکٹریاں تے بھٹھیاں لئی کارروائی تیز کر دتی گئی اے۔ پنجاب پولیس ولوں دسیا گیا اے کہ ایس سلسلے وچ 2620مقدمے درج کیتے گئے نیں جد کہ 2794 ملزماں نوں گرفتار کیتا گیا اے۔ سموگ بارے ریلی وچ لوکاں نوں ایہدے نقصاناں بارے جانکاری دتی گئی تے دسیا گیا کہ ایہدے پاروں کہڑے کہڑے روگ عام ہو رہے نیں۔ سموگ دا اک تعلق تاں قدرتی ماحول تے باہری عوامل نال اے جد کہ ساڈے ایتھے ایہدے ودھن دا اک کارن لوکاں وچ شعور دی انہوند وی اے۔ بھٹھے تاں لمے چراں توں چل رہے نیں‘ فصلاں دی واڈھی دے بعد بچ کھچ نوں وی اگ لائی جاندی رہی اے پر دن بدن ودھدی جا رہی ٹریفک تے اوہدے پاروں پیدا ہون والا دھواں پرانا ہو کے وی نواں اے کیوں جے ایہدے وچ دن بدن وادھا ہو رہیا اے۔ فیکٹریاں وی لمے چراں توں فضائی آلودگی کھلاردیاں پئیاں نیں پر ویلے دے نال نال فیکٹریاں دی گنتی وی ودھدی جا رہی اے۔ ایہ سارا کجھ سموگ یاں گہر نوں ودھاون وچ وڈاکردار ادا کر رہیا اے۔ ایہدے مگر ساڈے لوکاں دا شعور تے ”سانوں کیہ“ رویّا وی اے۔ فیکٹری لان والے نوں پتا ہوندا اے کہ ایہدے فضائی اثرات کیہ ہوون گے‘ ایہدے بارے قانون وی موجود نیں پر عمل کرن دی نوبت ای نہیں آوندی۔ جتھے کوئی سرکاری محکما ایہدے لئی کوئی کارروائی کردا اے‘ محکمے دے ملازم دا مونہ بند کر دتا جاندا اے۔ اجہے مندکارے پاروں پوری قوم سموگ دا عذاب بھگتدی تے بیماریاں وچ اپنا حِصّا وصول کردی اے۔ ایہدے بارے اک تاں ضروری اے کہ تعلیمی نصاب وچ فوری طور اُتے اجہی جانکاری شامل کیتی جاوے جہدے پاروں پڑھن والے لوکاں نوں سموگ دی پیداوار تے ایہدے ماڑے اثرات بارے پوری طرحاں پتا ہووے تے جے اوہ اجہے کارے کرن توں پرہیز کرن۔ تعلیم دے نال نال قانون وچ وی سختی نال عمل درآمد یقینی بنانا ضروری اے۔جے ماحولیات تے ہور ذمے دار محکمیاں دے لوکاں دا مونہ بند کرن دا سلسلا جاری رہیا تاں مسئلے دا حل کدی وی نہیں نکل سکنا۔ لاہور تے ہور شہراں دا دنیادے آلودا ترین شہراں وچ شمار‘ ساڈی ان گہلی دا بھرواں ثبوت اے تے شرمندگی دا کارن وی۔