kraamaat@gmail.com
+ +92 333-430-6384


سمگلنگ پاروں ملک دی معیشت نوں شدید نقصان اپڑیا،بناوٹی گھاٹ تے مُل ودھ جاندے نیں:عمران خان……٭رویل خبر٭


نمائندا رویل December 02, 2021


اسلام آباد (نیوز ڈیسک) وزیراعظم عمران خان نے کنک‘ یوریا‘ چینی‘ آٹا تے پٹرول دی سمگلنگ تے منی لانڈرنگ دی روک تھام لئی ہنگامی اقدامات لین دی ہدایت کردیاں ہویاں کہیا اے کہ ایہناں اقدامات دا مقصد عام بندے نوں ریلیف فراہم کرنا اے۔ ضروری شیواں دیاں قیمتاں وچ فرق سمگلنگ دی وجھا بندی اے‘ سمگلنگ نال مصنوعی قلت پیدا ہوندی اے جہدے نال قیمتاں ودھ جاندیاں نیں۔ بدھ نوں وزیراعظم عمران خان دی صدارت ہیٹھ سمگلنگ تے منی لانڈرنگ دی روک تھام دے اقدامات دے حوالے نال جایزا اجلاس منعقد ہویا۔ اجلاس وچ وفاقی وزیراں شیخ رشید‘ اسد عمر‘ خسرو بختیار‘ سید فخر امام‘ حماد اظہر‘مشیر خزانا شوکت ترین‘ مشیر تجارت عبدالرزاق داؤ‘ معاون خصوصی ڈاکٹر شہباز گل‘ گورنر سٹیٹ بینک‘ چیئرمین ایف بی آر‘ سینئر سول تے عسکری حکام شریک ہوئے۔ اجلاس نوں دسیا گیا کہ ایف آئی اے نے ڈالر دی منی لانڈرنگ تے غیر قانونی ہولڈنگ خلاف وسیع تحقیقات کیتیاں نیں۔ بارڈر کراسنگز اُتے افرادی قوت ودھائی جا رہی اے تاں جے مال دی چیکنگ تے نقل و حرکت دی ٹریکنگ ممکن ہو سکے۔ اجلاس نوں اگاہ کیتا گیا کہ غیر قانونی پٹرول دی سمگلنگ نوں روکن تے ذخیرا اندوزاں خلاف اپریشن وچ خاطر خاہ کامیابی حاصل ہوئی اے۔ ایس موقعے اُتے وزیراعظم عمران خان نے کہیا کہ سمگلنگ پاروں ملک دی معیشت نوں شدید نقصان پہنچیا اے۔ اوہناں نے کہیا کہ کنک‘ یوریا‘ چینی‘ آٹا تے پترول دی سمگلنگ تے منی لانڈرنگ دی روک تھام لئی ہنگائی اقدامات لئے جان۔ اوہناں نے کہیا کہ اقدامات دا مقصد عام بندے نوں ریلیف فراہم کرنا اے۔ اوہناں نے کہیا کہ ضروری شیواں دیاں قیمتاں وچ فرق سمگلنگ دی وجھا بندی اے۔ اوہناں نے کہیا کہ سمگلنگ پاروں مصنوعی قلت پیدا ہوندی اے جہدی وجھا توں قیمتاں ودھ جاندیاں نیں۔