نیشنل کمانڈ اینڈ اپریشن سنٹر ولوں بوسٹر ڈوز دی منظوری، ہیلتھ ورکرز تے پنجاہ ورھیاں توں اُپر نوں پہلے مرحلے وچ لائی جاوے ……٭رویل خبر٭

اسلام آباد (نیوز ڈیسک) نیشنل کمانڈ اینڈ اپریشن سنٹر (این سی او سی) نے کرونا ویکسینیشن دے حوالے نال سخت اقدمات کرن دا فیصلا کردیاں ہویاں 3 کیٹیگریاں لئی بوسٹر ڈوز لان دی منظوری دے دِتی جد کہ ویکسینیشن نہ کروان والے بندیاں نوں موقعے اُتے ای ویکسین لان دا فیصلا کیتا گیا اے۔ تفصیلات مطابق وفاقی وزیر برائے منصوبا بندی‘ ترقی تے خصوصی اقدامات اسد عمر دی صدارت ہیٹھ این سی او سی دا اجلاس ہویا جہدے وچ نیشنل کوآرڈینیٹر میجر جنرل محمد ظفر اقبال‘ معاون خصوصی صحت ڈاکٹر فیصل سلطان تے صوبائی صحت دے وزیراں تے چیف سیکرٹریاں نے ورچویل رلت کیتی۔ اجلاس وچ بیتے دیہاڑے ہون والے اجلاس وچ وبائی روگ دے چارٹ دے آنکڑے‘ قومی ویکسین دی حکمت عملی تے ملک بھر وچ بیماری دے پھیلا دی روک تھام بارے اقدامات اُتے وچار وٹاندرا کیتا گیا۔ فورم نوں کووڈ دے مثبت کیساں دی شرح‘ بیماری دے پھیلا‘ موتاں دی گنتی تے نویں داخلیاں بارے دسیا گیا۔ فورم نے شہریاں دے لحاظ نال کووڈ ویکسینیشن دے مجموعی پراسز اُتے تفصیل نال وچار وٹاندرا کیتا۔ این سی او سی مطابق فورم نے 3 کیٹیگریاں لئی بوسٹرڈوز ایڈمنسٹریشن دی منظوری دے دِتی‘ اوہناں کیٹیگریاں وچ ہیلتھ کئیر ورکرز‘ 50 سال توں اُتے تے امیونو کمپرومایزڈ شامل نیں۔ ایہ خوراک مفت ہووے گی تے ایہنوں ویکسین دی آخری خوراک دے 6 مہینیاں بعد دِتا جا سکدا اے۔ فورم دا ویکیسینیشن دے حوالے نال سخت اقدامات کرن اُتے اتفاق ہویا۔ ویکسینیشن ٹیماں نوں مختلف عوامی مقاماں اُتے تعینات کیتا جاوے تاں جے موقعے اُتے موجود بندیاں نوں ویکسین لائی جا سکے۔ ویکسین دی خصوصی مہم چلائی جاوے گی۔ فورم نے صوبیاں تے متعلقا حکام نوں ویکسینیشن دے حوالے نال زیرو ٹالرینس دی پالیسی دا مظاہرا کرن دی ہدایت کردیاں ہویاں کہیا گیا کہ سارے صوبے ویکسینیشن دے ہدف حاصل کرن لئی فوری طور تے ویکسینیشن مہم شروع کرن گے۔ اجلاس وچ صوبائی نمایندیاں نے کرونا وایریس دی نویں قسم اُتے توجا دین دی ضرورت اُتے وی زور دِتا تے ویکسینیشن دی صورت حال تے تارکن وطن دی جانچ لئی ہوائی اڈیاں اُتے ضروری اقدامات کرن دی تجویز دِتی۔ این سی او سی دا کہنا اے کہ جہناں نوں دوجی خوراک نہیں ملی اوہناں لوکاں تک پہنچن لئی کال سنٹر قایم کیتے گئے نیں‘ ملک بھر وچ کل 40 کال سنٹر قایم کیتے گئے نیں۔ ویکسین دی دوجی خوراک نوں یقینی بنان لئی اوہناں نمبراں وچ وی وادھا کیتا جاوے گا۔ دوجے پاسے عالمی ادارا صحت نے حکومتاں کولوں مطالبا کردیاں ہویاں کہیا اے کہ گھبراؤ نہیں تے کرونا وایرس دی نویں تے تیزی نال کھلردی ہوئی قسم اومی کرون خلاف معقول اقدامات چکو۔فرانسیسی خبر رساں ادارے اے ایف پی مطابق اک بریفنگ دوران عالمی ادارا صحت دے آگو ٹیڈروس ادہانوم نے سارے رکن ملکاں کولوں مطالبا کیتا کہ اوہ معقول تے خطرے نوں گھٹ کرن لئی مناسب اقدامات چکن۔ اوہناں نے کہیا کہ کرونا وایرس دی نویں قسم خلاف عالمی سطح اُتے ردعمل پرسکون تے مربوط ہونا چاہیدا اے۔ عالمی ادارا صحت نے کہیا اے کہ صرف سفری پابندیاں نال اومی کرون دے پھیلا نوں نہیں روکیا جا سکدا۔ تقریبن اک ہفتے پہلے اومی کرون وایرس جنوبی افریقا وچ ساہمنے آیا سی جہڑا تیزی نال کئی ملکاں وچ کھلر گیا۔ کرونا دی نویں قسم ساہمنے آن دے بعد درجناں ملکاں نے سفری پابندیاں دا اعلان کردیاں ہویاں اپنیاں سرحداں نوں بند کر دِتا۔ انڈیا دا بھارت بائیوٹیک تحقیق کر رہیا اے کہ کیہ ایہدی ویکسین اومی کرون خلاف کم کر سکدی اے۔