جہڑی حکومت آئی ایم ایف دیاں شرطاں مَنّے اوہ ناقابل اعتبار،لوکائی مہنگائی دی اگ وچ سڑ رہی اے  :شہباز شریف ……٭رویل خبر٭

لاہور (نیوز ڈیسک) مسلم لیگ (ن) دے صدر تے پارلیمنٹ وچ قاید حزب اختلاف شہباز شریف نے کہیا اے کہ تیل دیاں قیمتاں وچ کمی لوکائی لئی لولی پاپ اے۔ حکومت عالمی منڈی وچ تیل دیاں قیمتاں دا لوکائی نوں فایدے دیوے‘ لوکائی نوں چکر نہ دیوے۔ مہنگائی دا سبھ توں اُچی سطح اُتے پہنچنا معیشت دی تباہی دی دلیل اے۔ جہڑی حکومت آئی ایم ایف دیاں لوکائی تے قومی مفاد دیاں دشمن شرطاں تسلیم کرے اوہ ناقابل اعتبار اے۔ اپنے اک بیان وچ شہباز شریف دا کہنا سی کہ مہنگائی دا سال دی سبھ توں اُچی سطح اُتے پہنچنا غریباں لئی قیامت تے معیشت دی تباہی دی دلیل اے۔ مہنگائی 13 سال دی سبھ توں اُچی سطح اُتے پہنچ چکی اے تے لوکائی ایس اگ وچ سڑ رہی اے‘ حکومتی بیاناں نال ایہ اگ نہیں بجھے گی۔ شہباز شریف نے کہیا کہ مہیناوار 11.5 فیصد مہنگائی ہونا حکومت دے لوکائی اُتے ظلم تے معاشی بربادی دا اعتراف جرم اے۔ غریب لوکائی گھیو دا ڈبا خریدن توں مجبور ہو چکی اے۔ ٹماٹر‘ گھیو‘ خوردنی تیل‘ چاؤل‘ پھل‘ سبزیاں‘ آنڈے‘ گوشت‘ دُدھ‘ چینی‘ دوائیاں‘ تعمیراتی سامان مہنگا ہو گیا۔ لوکائی مہنگائی‘ بے روزگاری تے گزارا نہ ہون اُتے خُدکشیاں کر رہی اے تے حکمران اوہناں نوں نہ گھبران دی تلقین کر رہے نیں۔ اپوزیشن لیڈر دا کہنا سی کہ جاری کھاتیاں دے کسارے مسلسل ودھ رہے نیں۔ چالو مالی ورھے دے جولائی توں اکتوبر جاری کھاتیاں دا کسارا ودھ کے 5.1 ارب ڈالر تک جا پہنچیا اے۔ پارلیمنٹ تے قومی اقتصادی کونسل نے ایہنوں 2.3 ارب ڈالر تک رکھن دی منظوری دتی سی۔ درآمدات وچ ہوشربا وادھے نال ٹیکس وصولیاں اُتے حکومت دا خُش ہونا خُدفریبی دی انتہا اے۔ کیہ ایہ کفایت شعاری اے‘ ایہ چنگے دن آئے نیں؟ شہباز شریف نے کہیا کہ تیل دیاں قیمتاں وچ کمی لوکائی لئی لولی پاپ اے۔ ادھی رات نوں مہنگائی دا بمب سُٹن والی حکومت اُتے لوکائی نوں اعتبار نہیں۔ حکومت عالمی منڈیاں وچ تیل دیاں قیمتاں دا لوکائی نوں فایدا دیوے‘ لوکائی نوں چکر نہ دیوے‘ لوکائی نوں ریلیف دینا ہوندا تے آئی ایم ایف دیاں شرطاں اُتے اک ہور منی بجٹ دا بمب قوم اُتے نہ سُٹیا جاندا۔ قوم خبردار رہوے آئی ایم ایف دی شرط دے تحت پٹرولیم ڈویلپمنٹ لیوی وچ 4 رُپئے مہیناوار وادھا ہونا اے۔ جہڑی حکومت بجٹ دے ناں اُتے قوم نوں دھوکھا دیوے‘ آئی ایم ایف دیاں لوکائی تے قومی مفاد دیاں دشمن شرطاں تسلیم کرے اوہ اعتبار دے قابل نہیں اے۔ صحت انصاف کارڈ نال لوکائی نوں دوائی تے علاج دیاں سہولتاں نہیں مل رہیاں‘ لوکائی دیاں شکایتاں ودھ رہیاں نیں‘ کوئی جواب دین والا نہیں تے قوم ظالم ٹولے نوں برداشت کرن نوں تیار نہیں۔ لوکائی دے ریلیف‘ منی بجٹ تے مہنگائی توں نجات دی راہ صرف عمران نیازی دی حکومت توں نجات اے۔