امجد شریف تے اوہناں دی پنجابی شاعری ۔۔۔۔۔۔٭رویل لیکھ٭

امجد شریف پنجابی تے اردو زبان دے سچجے سوجھوان تے شاعر نیں ۔اوہناں نے اپنی نویکلی فکر تے اُچی خیال اڈاری پاروں پنجابی زبان دے موجودہ تے خاص کربال لکھاریاں وچ اپنی خاص تے اُچیچی تھاں بنائی اے ۔پنجابی ساہت تے خاص طور تے بچیاں دے ادب واسطے اوہناں دی خدمات نوں نندیا یا وساریا نہیں جا سکدا ۔ہن تیکر اوہناں دیاں چھے کتاباں چھاپے چڑھ چکیاں نیں جہناں دی ترتیب کجھ ایسراں اے۔

١۔ہوکے بھردیاں سدھراں۲۰١١ء

۲۔جب ہم بچھڑے تھے ۲۰١۹ء

۳۔روشن ہیں سبھی تارے ۲۰۲۰ء

۴۔دھرتی ،چن تے پھل ۲۰۲۰ء

۵۔جگنوتارے ہم ۲۰۲۰ء

٦۔فرض نبھاندے تارے ۲۰۲١ء

ادبی دنیا وچ امجد شریف دے ناں نال مشہور تے معروف شاعر دا اصل نام محمد شریف تے ولدیت محمد صدیق اے ۔آپ یکم جنوری انیس سو چُہتر نوں گجرانوالا دی تحصیل نوشہرہ ورکاں دے اک پنڈ ارگن بنگلہ وچ پیدا ہوئے ۔آپ نے میس کمیونیکیشن نال بی اے تے اردو وچ ایم اے کیتاہویااے ۔ایسے کرکے آپ اَدھے صحافی تے اَدھے استاد نیں۔آپ ملت سائنس کالج گوجرانوالہ دے پرچے ماہنامہ وادی ادب گوجرانوالہ دے چیف ایڈیٹر کے وادی اَدب پبلیکیشنز گوجرانوالہ نام دے کتاباں چھا پن والے ادارے کے مالک بھی نیں ۔آپ جی دی ہتھلی کتاب فرض نبھا دے تارے ایس ویلے میرے مکھ رکھی ہوئی ہے ۔ایہدے وچ اوہناں دیاں بالاں واسطے لکھیاں گیاں نظماں تے گیت شامل نیں ۔گیتاں تے نظماں دی ایس چون نوں عظمی شریف ہوراں نے سودھیا اے۔ایہ کتاب 2021 وچ چھاپے چڑھی تے ایہدامکھ مہورت سجاد کمپوزنگ سنٹر گوجرانوالہ وچ بنایا گیا اے جد کے اس کتاب نوں چھاپن واسطے محمد اشرف مغل سینئر ہیڈ ماسٹر، ارشاد النبی باجوہ ماہر تعلیم تے منیر احمد طاہر ماہر تعلیم ہوراں نے آہر کیتا اے ۔ایس کتاب دا چڑھاوا جناب طاہر فاروق دا دی ادب دوستی دے ناں چڑھایا گیا اے ۔کتاب دی ایس چون وچ 28 گیت تے نظماں شامل نیں۔ایس توں اڈ 2 تبصرے وی شامل نیں جہناں وچوں اک ڈاکٹر صائمہ بتول نے ﴿بھاگاں والی دھرتی دا بھاگاں والا بھرا ﴾دے ناں نال لکھیا اے تے دوسرا ڈاکٹر محمد ریاض شاہد نے ﴿دھرتی چند تے پھل امجد شریف ﴾دے ناں لکھیا اے۔امجد شریف دی ایس کتاب دے وچ شامل نظماں دا جائزہ لیے تے ایہ گل سامنے اوندی اے کہ انہاں نے بچیاں دے وچارتے ذہن مدنظر رکھے نیں ۔خیال تے لفظالی دوہیں ای بچیاں دی سوچ اور اوہناں دے وچار دی پدھر دے مطابق اے ۔انہاں نے مذہبی نظماں وی لکھیاں نیں جہناں وچ حمد، نعت یا داتا دربار نام دیاں نظماں شامل نیں۔

کھاندے پئے آں تیرا ساءیں

توں اے سبھ توں اچا ساءیں

ہرشے دے وچ ہرویلے ای

دسدا تیرا جلوہ سائیں﴿حمد﴾

۔ قومی ہیروز وچوں صرف علامہ اقبال اتے نظم شامل ات جد کہ ایس توں اڈ دیس پیار دے گیت بھی شامل نیں تے سرحداں دی حفاظت کرنے والے پاک فوج دے جواناں بارے نظم جیون کرماں والے راکھے وی شامل اے۔

شیراں ورگی دکھ ایہناں دی

کڈی سوہنی اکھ ایہنان دی

تکنی سبھ توں وکھ ایہنان دی

عزتاں شرماں والے راکھے

جیون کرماں والے راکھے ﴿ جیون کرماں والے راکھے﴾

ایس توں علاوہ باقی ساریاں گلاں بچیاں دیاں کھیڈاں،بازیاں،کھڈونیاں،لکھن پڑھن تے اوہناں دے سکول تے گھر نال وابستہ دوجیاں چیزاں تے گلاں باتاں دے بارے وچ نیں جنہاں وچ ایک دوجے نال چھیڑ چھاڑ بھی شامل اےتے ایہدے نال نال پیار محبت دے جذبے وی نیں۔ انہاں دے بے ساختہ اظہار تے بچگانا لفظالی نےایس کتاب نوں ہور وی بامعنی بنا کے بچیاں واسطے بہت آسان تے من کھچویں بنا دیا اے۔بال ادب کسے وی زبان دا سرما یا ہندا اے تے امجد شریف جیہے لوگ ایہدے وچ ہمیش وادھا کردے رہندے نے تے ایسے پاروں اوہ اپنے بچیاں دی تعلیمی تے ادبی ضرورت وی پوری کردے نیں تے نال نل اپنا ناں وی امر کرجاندے نیں۔پنجابی وچ بال ادب دی جد وی گل ہوووے گی امجد شریف دے ناں باجھوں ہمیشا ادھی ادھورہ رہوے گی۔کسے لکھاری دی ایس توں ودھ کیہ شان ہوسکدی اے؟

امجد شریف دیں نظمان دے خیال تے لفظالی دیاں کجھ مثالاں ویکھو

تاں ای گلی ڈنڈا پھڑیا

تاں ای کھیڈدا شوقا اے چڑھیا

کل دے پیپر ہوگئے نیں﴿ کل دے پیپر ہوگئے نیں﴾

جے توں عزت پانی اے

جے توں عظمت پانی اے

جے توں طاقت پانی اے

دھپ چھاں جرنی پینی اے

محنت کرنی پینی اے ﴿ محنت کرنی پینی اے﴾

جد علم دا سورج چڑھنا اے

فر ہر بچے نے پڑھنا اے

جد ہر بچے نے پڑھنا اے

فرسبھ نے اگے ودھنا اے﴿ جد علم دا سورج چڑھنا اے﴾

حالے منزل آئی نہیں

حالے پندھ لمیرا اے

حالے ہمت کرنے آں

حالے اگے چلنے آں

حالے اگے ودھنے آں﴿ حالے منزل آئی نہیں﴾

٭٭٭٭٭