انڈسٹری توں پیسا کمان والیاں اوکھے ویلے مونہ موڑ لیا: سنگیتا……٭رویل خبر٭

لاہور (نمایندا رویل) سینئر اداکارا تے ہدایتکارا سنگیتا نے کہیا اے کہ کئی پروڈیوسر ایہو جہے نیں جہناں نے فلم انڈسٹری توں بے پناہ دولت کمائی پر جدوں فلم انڈسٹری نُوں اوہناں دی لوڑ سی تے اوہ اِک پاسے ہو گئے‘ فلم کم ای پڑھے لکھے لوکاں دا اے۔ اِک انٹرویو وچ سنگیتا نے کہیا کہ بدقسمتی نال فلم انڈسٹری اوہناں لوکاں دے ہتھاں وچ چلی گئی جہناں نُوں پتا ای نہیں سی کہ ایہ شعبا ہے کیہ۔ اوہناں نے اداکاری دے حوالے توں کہیا کہ جدوں تک فنکار سکرپٹ وچ ملن والے کردار نُوں محسوس کر کے نہ ادا کرے تے اوس ویلے تک ایس کردار وچ حقیقی رنگ ای نہیں بھریا جا سکدا۔ اوہناں نے کہیا کہ ساڈے دور وچ انج ہوندا سی کہ جدوں پتا ہوندا اے کہ سویرے رون دھون دا سین عکسبند کروانا اے تے اسیں رات توں ایہدے لئی ذہنی طور اُتے تیار ہوندے ساں۔