حکومت 20 دسمبر توں سکول بند کرن اُتے غور کرے:لاہور ہائیکورٹ……٭رویل خبر٭

لاہور (نمایندا رویل) لاہور ہائیکورٹ نے سموگ دی روک تھام لئی اقدامات نہ کرن خلاف درخاست اُتے سنوائی کردیاں ہویاں سموگ دی شدت و چ وادھے اُتے ہرکھ دا وکھالا کردیاں ہویاں کہیا اے کہ حکومت 20 دسمبر توں سکول بند کرن اُتے غور کرے‘ دوجی صورت عدالت فیصلا کرے گی‘ جہناں بھٹھیاں نُوں ماحولیاتی کمیشن نے جرمانے کیتے نیں جے اوہ ادائیگی نہ کرن اوہناں نُوں سِیل کر دِتا جاوے‘ بازاراں دے ویلے وی گھٹ ہونے چاہیدے نیں۔ لاہور ہائیکورٹ دے جسٹس شاہد کریم نے درخاست اُتے سنوائی کیتی۔ فاضل عدالت نے پیمرا توں اگاہی مہم بارے اج جمعے والے دن نوٹیفکیشن منگدیاں ہویاں باربی کیو دُکاناں چھیتی بند کرن دی فوری بند کرن دی تجویز رَد کردیاں ہویاں کہیا اے کہ فوری دُکاناں بند نہیں کروائیاں جا سکدیاں ایہدا دوجا حل ویکھنا چاہیدا اے۔ فاضل عدالت نُوں دَسیا گیا کہ سردی دی شدت وچ وادھے نال گرل مچھلی تے باربی کیو دے کارن دھوویں وچ وادھا ہو گیا اے ایہدے نال سمو گ وچ وادھا ہو رہیا اے‘ استدعا اے مارکیٹاں وی چھیتی بند کرن دا حکم دِتا جاوے۔ فاضل عدالت نے ہور کہیا کہ پوری دنیا وچ مارکیٹاں چھے وجے بند ہو جاندیاں نیں‘ ایتھے بازار چھیتی کھُل کے چھیتی کیوں بند نہیں ہو سکدے‘ پوری دنیا وچ تے شام چھے وجے فلائٹاں وی بند کر دِتیاں جاندیاں نیں‘ بازاراں دے ویلے نُوں وی گھٹ ہونا چاہیدا اے۔ فاضل عدالت نے بھٹھا مالکان نُوں اِک ہفتے وچ جرمانے جمع کروان دا حکم دیندیاں ہویاں کہیا کہ جہناں بھٹھیاں نُوں ماحولیاتی جوڈیشل کمیشن نے جرمانے کیتے نیں جے اوہ ادا نہ کرن تے اوہناں نُوں سیل کر دوو۔ فاضل عدالت نے سیکرٹری سی اینڈ ڈبلیو نُوں بھٹھا چوک اُساری لئی فوکل پرسن متھ دِتا۔ فاضل عدالت نے سموگ دی روک تھام لئی ٹریفک انتظامات نُوں ہور بہتر بنان دی وی ہدایت کردیاں ہویاں کہیا کہ پارکنگ دی تھاں نہ رکھن والے پلازیاں دی پالیسی اُتے وی نظرثانی دی لوڑ اے‘ فول پروف پالیسی دے بغیر اُچیاں اُچیاں عمارتاں دی اُساری دی اجازت دینا بہت وڈی زیادتی اے۔ فاضل عدالت نے حکومت نُوں 20 دسمبر توں سکول بند کرن اُتے غور کرن دا حکم دیندیاں ہویاں کہیا کہ دوجی صورت عدالت فیصلا کرے گی۔ جسٹس شاہد کریم نے کہیا کہ سموگ اُتے قابو پان لئی جنگی بنیاداں اُتے اقدامات کرنے پین گے۔