تحریک انصا ف دی حکومت لوکائی نال کیتے وعدے نبھا رہی اے:سردار عثما ن بزدار……٭رویل خبر٭

لاہور (نمایندا رویل) وزیر اعلا پنجاب سردار عثما ن بزدار نے کہیا اے کہ اپوزیشن دے کول کوئی ایجنڈا نہیں‘ صرف نان ایشوز اُتے سیاست کیتی جا رہی اے۔ اپوزیشن دیاں صفاں وچ انتشار اے۔ رَد شدا عناصر صرف اپنا سیاسی قد ودھان لئی تنقید برائے تنقید کر رہے نیں۔ قوم نُوں ماضی دی لُٹ مار دا دور نہیں بھُلیا۔ الزامات لان والے پہلے اپنے کرپشن آلود گلمیاں وچ جھاتی مارن۔ اوہناں نے کہیا کہ ملک نُوں کنگال کرن والیاں دی سیاست ہمیشا لئی ختم ہو چکی اے تے لوکائی نُوں کھوکھلے نعریاں نال بہلان دا دور لنگھ چُکیا اے۔ پچھلے دور وچ لوکائی نُوں ریلیف دین دی بجائے تکلیف دِتی گئی۔ وزیر اعلا عثمان بزدار نے کہیا کہ تحریک انصا ف دی حکومت لوکائی نال کیتے گئے وعدے نبھا رہی اے۔ حکومت نے لوکائی دی فلاح تے بہبود لئی عملن اقدامات کیتے نیں تے وزیراعظم عمران خان دی صورت وچ پاکستان نُوں کھرا تے مخلص لیڈر مِلیا اے۔ اوہناں نے کہیا کہ 3 ورھیاں دے دوران او ہ کم کیتے جہڑے پچھلیاں حکومتاں نہ کر سکیاں‘ ترقی دے سفر وچ کسے نُوں حائل نہیں ہون دواں گے۔ وزیر اعلا نے کہیا کہ جنوری توں نواں پاکستان صحت کارڈ دے تواریخ ساز فلاح منصوبے دا اغاز کیتا جا رہیا اے جد کہ ڈیرا غازی خان ڈویژن تے ساہیوال ڈویژن وچ صحت کارڈ پہلے ای دِتا جا چُکیا اے۔