نواز شریف دی تاحیات نا اہلی ختم کرن لئی تحریک شروع  ہو چکی اے:شہزاد اکبر……٭رویل خبر٭

لاہور (نمایندا رویل) وزیراعظم دے مشیر برائے احتساب تے داخلا شہزاد اکبر نے کہیا اے کہ نواز شریف دی تاحیات نا اہلی ختم کرن لئی تحریک شروع ہو گئی ایہدے لئی بہت پیسا خرچ کیتا جا رہیا اے‘ اِک واری فیر تکنیکی انصاف لئی کوششاں کیتیاں جا رہیاں نیں‘ مریم نواز نے چِٹّا جھوٹھ بولیا اے‘ ہائیکورٹ بارے اوہناں دا بیان توہین عدالت اے۔ عدالت نے وکیل نُوں سٹریچر اُتے لیان دا نہیں کہیا سی‘ مریم نواز دے وکیل نُوں کرونا نہیں سی لَک وچ تکلیف سی‘ وکیل اوس ویلے عدالت وچ موجود سن‘ عدالت نے کہیا سی تُسیں کھلو نہیں سکدے تے بَہ کے دلایل دے دوو‘ ہائیکورٹ توں استدعا کیتی مریم نواز دے مقدمیاں دی روزانا سنوائی کیتی جاوے۔ نجی ٹی وی نُوں انٹرویو وچ شہزاد اکبر نے کہیا کہ مریم نواز دے وکیل نُوں کرونا بعد وچ ہویا سی اوس ویلے نہیں‘ ساڈے عدالتی نظام دیاں کجھ مجبوریاں نیں تے کجھ ساڈیاں کوتاہیاں نیں‘ تحریک انصاف اپنے احتساب دے مشن توں پچھے نہیں ہٹی‘ پی ٹی آئی دور حکومت وچ 30 احتساب عدالتاں دا وادھا ہویا اے‘ حکومت نے احتساب عدالتاں وچ ججز وی تعینات کیتے۔ اوہناں نے کہیا کہ تحریک انصاف تے احتساب دے گراؤنڈ اُتے کھلوتی اے‘ شہباز شریف تے آصف زرداری آپس وچ ای کھیڈ رہے نیں‘ میری پیاری بھین مریم اورنگزیب دی چابی بھری جاندی اے‘ شہباز شریف دے خلاف مقدمے تے پاکستان وچ نیں‘ جھوٹھی خبر اُتے ہُن تک شہباز شریف نے میرے اُتے ہتک عزت دا کیس کیوں نہیں کیتا۔ اوہناں نے کہیا کہ نواز شریف دی تاحیات نا اہلی ختم کرن لئی تحریک شروع ہو گئی اے‘ تاحیات نا اہلی ختم کرن لئی بہت پیسا خرچ کیتا جا رہیا اے‘ اِک واری فیر تکنیکی انصاف لئی کوششاں کیتیاں جا رہیاں نیں۔ اوہناں نے کہیا کہ مریم نواز نے اِک واری فیر اپنی آڈیو ہون دا اعتراف کر لیا اے‘ اوہناں نے تے اپنی آڈیو دا فرانزک دا وی نہیں کہیا۔