مہنگائی ہور ودھ رہی اے‘ ایہ ملک لئی چنگیاں خبراں نہیں:شہباز شریف ……٭رویل خبر٭

اسلام آباد (نمایندا رویل) پاکستان مسلم لیگ (ن) دے صدر تے قائد حزب اختلاف شہباز شریف نے کہیا اے کہ ایس مہینے وچ تجارتی کسارا ریکارڈ 5 ارب ڈالر توں بُہتا ہونا معاشی تباہی دی علامت اے۔ موجودا مالی سال دے پہلے پنج مہینیاں وچ تجارتی کسارا ریکارڈ 20 ار ب 648 ملین ڈالر ہوچکیا اے۔ بدھ نُوں اپنے اِک بیان وچ اپوزیشن لیڈر شہباز شریف دا کہنا سی کہ تجارتی کسارے وچ ریکارڈ وادھا ملکی درآمدات تے برآمدات وچ عدم توازن دا واضح ثبوت اے‘ تازا آنکڑے دَس رہے نیں کہ ملک وچ ڈالر دی آمد وچ کمی ہو گئی اے‘ رُپئے دی قدر اُتے دباء ودھ رہیا اے جہدی وجھا توں ایہدی قدر و چ مسلسل کمی آ رہی اے‘ ڈالر 180 نُوں ٹَپ چُکیا اے‘ مہنگائی ہور ودھ رہی اے‘ ایہ ملک لئی چنگیاں خبراں نہیں‘ معیشت ’ریورس گئیر‘ وچ اے‘ معیشت‘ صنعت‘ کاروبار‘ تجارت تے روزگار سبھ دا حال خراب اے‘ 100 توں ودھ شیواں اُتے 17 فیصد جی ایس ٹی دا اِکو جہیا اطلاق مہنگائی وچ ہور وادھے دا کارن بنے گا۔ اوہناں دا کہنا اے کہ فراط زر یاں مہنگائی بُہتی ہووے تے دنیا وچ جی ایس ٹی گھٹ کیتا جاندا اے‘ پاکستان وچ پُٹھی گنگا وگ رہی اے‘ ایس حکومتی اقدام نال مہنگائی وچ وادھے دے ہولناک نتیجے نکلن گے‘ ایس اقدام دا مطلب ایہ اے کہ حکومت ٹیکس دے دایرے وچ وادھا نہیں کر سکی‘ ایہ قدم عمران نیازی دے ایس دعوے اُتے اِک ہور یوٹرن اے کہ میں ٹیکس ریونیو دو گنا کر دواں گا پر اوہ ناکام ہوئے‘ ایس ملک وچ جی ایس ٹی پہلے ای بُہتا اے‘ اوتھے 17 فیصد دے لوڑی دیاں شیواں اُتے اطلاق نال مہنگائی ہور ودھ جاو یگی‘ لوڑی دیاں شیواں یاں ایس پی آئی دیاں قیمتاں وچ پہلے ای 19.5 فیصد مہنگائی دا آپ حکومت اعتراف کر رہی اے‘ مشیر خزانا کدی مہنگائی وچ کمی تے کدی وادھے دے متضاد بیانات دے رہے نیں‘ کدی کہیا جاندا اے کہ پاکستان سستا ترین ملک اے تے کدی ملبا عالمی حالات اُتے پایا جاندا اے‘ منی بجٹ مسلط کرن‘ قوم تے ملک دے مستقبل نال کھیڈن دی بجائے حکومت استعفا دیوے۔