مدرسیاں دے خلاف حکومت دی سطح اُتے سازشاں کیتیاں جا رہیاں نیں: مولانا فضل الرحمان……٭رویل خبر٭

اسلام آباد (نیوز ڈیسک) جمعیت علمائے اسلام (ف) دے آگو مولانا فضل الرحمان نے کہیا اے کہ آئندا پورے ملک وچ انتخابی نتیجے پشاور ورگے ہون گے‘ لبرل ازم دے ناں اُتے حیوانی معاشرے دی تشکیل چاہن والیاں قوتاں نال ساڈی جنگ جاری اے‘ ملا تنگ نظر نہیں وسیع النظر نیں‘ علماء ہمت کرن پورے ملک دا نظام ایہناں دے ہتھ وچ ہووے گا۔ جمعیت علمائے اسلام (ف) دے آگو مولانا فضل الرحمان نے تقریب نال خطاب کردیاں ہویاں کہیا کہ مسلمان حکمراناں دی ذمے داری اے کہا وہ اسلامی علوم دی حفاظت کرن‘ ساڈے حکمران مدرسیاں دا خاتما چاہندے نیں۔ اوہناں نے کہیا کہ حکمران حدیث تے فقہ دے علوم دی حفاظت دی بجائے ایہناں نُوں غیر موثر کرنا چاہندے نیں‘ مدرسیاں دے خلاف حکومت دی سطح اُتے سازشاں کیتیاں جا رہیاں نیں‘ ایہناں نُوں پیار نال کہنا چاہندے آں کہ ایہناں سازشاں توں باز آ جاؤ‘ تُسیں کدی مدرسیاں نُوں ختم نہیں کر سکدے۔ اوہناں نے کہیا کہ کہندے نیں مدرسیاں نُوں قومی دھارے وچ لیانا چاہندے آں‘ قومی دھارے توں اسیں نہیں تُسیں باہر او‘ اسیں ق ومی دھارے وچ آن لئی تیار آں تُسیں اپنے آپ نُوں اسلامی دھارے وچ لے آؤ۔ اوہناں نے کہیا کہ ملا نُوں تنگ نظر ہون دا الزام دِتا جاندا اے‘ ملا وسیع النظر نیں۔ اوہناں نے کہیا کہ اج وی عقوبت خانیاں دیاں کندھاں اُتے لگا خون امریکی مظالم دی گواہی دیندا اے‘ امریکا جدوں دوحا وچ معاہدا کر رہیا سی تے اودوں انسانی حقاں دی شق وی شامل کردا۔ اوہناں نے کہیا کہ اسیں جمہوریت پسند آں تے مثبت سیاست دی گل کردے آں‘ اسیں پرامن سیاست‘ آئین تے مستحکم پاکستان دی گل کردے آں‘ استحکام دے ذمے دارں نے دھاندلیاں کر کے پاکستان نُوں غیر مستحکم بنایا‘ اسیں کہندے ساں کہ دھاندلی دیاں پیداوار حکومتاں نیں‘ اوہناں نے تھوڑا جہیا ہتھ پچھے کیتا تے تُسیں خیبر پختونخوا دا نتیجا ویکھ لیا‘ پشاور وچ ایم این اے‘ ایم پی ایز تے بیورو کریسی اوہناں دی سی۔ اوہناں نے کہیا کہ پورے ملک وچ ہُن ایہو نتیجے ہون گے‘ پاکستان نُوں امن تے خشحال معیشت دی ضرورت اے۔ مولانا فضل الرحمان نے کہیا کہ اسلام جان تے مال تے عزت تے آبرو دے تحفظ دا علمبردار دین اے‘ دین اسلام دے ناں اُتے ایہو جہے سکالر پیدا ہو رہے نیں جہڑے اسلام دی تشریح ایہو جہی کردے نیں جہڑی مغرب لئی قبولن جوگ ہووے۔