شاہد شیدائی ہوراں دا ناول " پہلی نیندر مگروں" چھپ گیا۔ـــ رویل

لاہور(تازا ترین، 21 دسمبر 2019ء) منے پرمنے دانشور،شاعر تے "کاغذی پیرہن " دے مُدیر شاہد شیدائی ہوریں پنجابی زبان و ادب نال موہ رکھن والے جی نیں۔اوہناں نے اِک لمے چر توں پنجابی زبان و ادب دی بڑی خموشی نال سیوا کیتی اےا وہناں نے " کاغذی پیرہن " وچ پنجابی واسطے ضرور تھاں رکھنی ہوندی اے تے پنجابی شاعری ،کہانی تے ہور لیکھ اوہ چھاپدے رہندے نیں تے پنجابی دی سیوا کردے رہندے نیں۔پچھلے دنیں اوہناں نے پنجابی پیاریاں دی ایہ گل منّ ای لئی کہ اوہ اپنی ماں بولی وچ وی لکھن گے۔آپ دا تعلق امرتسر توں اے تے پنجابی زبان دا جو محاورا اوہناں کول اے اوہدے وچ تے اجوکے سمے دی پنجابی دا مشرت آپ دی لکھت وچ سوہنے ڈھنگ نال ویکھیا جا سکدا اے۔شاہد شیدائی ہوراں دے ایس ناول وچ صدیاں پہلے دے سماج نوں ویکھیا جا سکدا اے تے کہانی دی بُنتر تے کرداراں تے ڈھیر محنت کیتی گئی اے۔ منے پرمنے کہانیکار الیاس گھمن ہوراں نے ایس ناول دا فلیپ لکھیا اے۔ اوہ کہندے نیں" مینوں پک اے کہ ایہ ودھیا پنجابی لیکھنی اپنی اُچی تھاں آپ بناوے گی" ایس ناول نوں بڑی خوبصورتی نال سلیکھ بُک میکرز نے چھاپدیاں ہوئیاں اپنی روایت نوں برقرار رکھیا اے۔ کتاب دے کُل صفحے120 نیں تے مُل 300 روپے اے۔