تحریک انصاف دا ووٹر تے لوکائی ساڈے نال کھلوتی اے  پارٹی امیدواراں دیاں ٹکٹاں داآپ جایزا لے کے فیصلا کراں گا، پارٹی ترجماناں دے اجلاس وچ عمران خان دا خطاب……٭ رویل خبر٭

اسلام آباد (نیوز ڈیسک) وزیراعظم عمران خان نے پورے ملک وچ پاکستان تحریک انصاف دیاں ساریاں تنظیماں مُکا دِتیاں نیں تے آئینی کمیٹی تشکیل دے دِتی اے‘ اگے توں مقامی قیادت کسے امیدوار دے رشتے دار دی نامزدگی دا فیصلا نہیں کرے گی جد کہ عمران خان نے اگے توں ٹکٹاں آپ ونڈن دا اعلان کیتا اے۔تفصیلات دے مطابق وزیراعظم عمران خان دی صدارت ہیٹھ جمعے نُوں پارٹی ترجماناں دا اجلاس ہویا۔ اجلاس وچ ملکی سیاسی تے معاشی صورتحال دا جایزا لیا گیا تے پنجاب تے خیبر پختونخوا دیاں بلدیاتی چوناں اُتے مشاورت کیتی گئی۔ اجلاس دوران خیبر پختونخوا تے پنجاب وچ بلدیاتی چوناں تے اگے آن والیاں چوناں لئی پارٹی حکمت عملی بارے اہم فیصلے کر لئے گئے۔ وسیلیاں مطابق وزیراعظم نے سیاسی حکمت عملی طے کر لئی اے‘ آندیاں چوناں لئی حکمت عملی مرحلا وار ہووے گی‘ پہلے مرحلے وچ 21 ارکان اُتے مشتمل قایم سیاسی کمیٹی نُوں با اختیار بنایا جاوے گا‘ دوجے مرحلے وچ تنظیماں تحلیل کیتیاں جان گیاں‘ تحریک انصاف دی سپریم کمیٹی وی نویں سیاسی پلان دے تحت تشکیل دِتی گئی‘ سپریم کمیٹی 21 ارکان اُتے مشتمل‘ صوبیاں نُو ں نمایندگی دِتی گئی‘ سیاسی کمیٹی نویں تنظیم سازی تے پارٹی نُوں متحرک کرن اُتے کم کرے گی۔ وزیراعظم نے وزیر اعلا کے پی محمود خان نُوں صوبے وچ پارٹی کارکناں نُوں منظم کرن دی ہدایت کر دِتی۔ وسیلیاں مطابق وزیراعظم عمران خان سپریم سیاسی کمیٹی دے آگو نیں‘ پنجاب توں وزیر اعلا عثمان بزدار‘ گورنر چودھری سرور‘ شاہ محمود قریشی‘ شفقت محمود‘ عامر محمود کیانی‘ سیف اللہ نیازی‘خیبر پختونخوا توں وزیر اعلا محمود خان‘ پرویز خٹک‘ اسد قیصر‘ علی امین گنڈا پور‘ سندھ توں اسد عمر‘ عمران اسماعیل‘ علی زیدی‘ بلوچستان توں قاسم سوری‘ گورنر آغا ظہور جد کہ وفاقی وزیر اطلاعات فواد چودھری‘ اعجاز چودھری تے شیری مزاری نُوں وی کمیٹی وچ نمایندگی دِتی گئی اے۔ وسیلیاں دے مطابق اجلاس وچ خیالاں دا اظہار کردیاں ہویاں وزیراعظم نے کہیا کہ کے بی بلدیاتی الیکشن بارے الیکشن کمیشن دے نتیجے دا انتظار اے‘ وزیراعظم دا کہنا اے کہ حتمی نتیجے آن دے بعد سارے معاملات دا جایزا لواں گے۔ تحریک انصاف دا ووٹر تے لوکائی ساڈے نال کھلوتی اے۔ وزیراعظم نے خیبر پختونکوا دیاں بلدیاتی چوناں وچ پچھلیاں غلطیاں نہ دُہران دی ہدایت کردیاں ہویاں کہیا کہ پارٹی امیدواراں دیاں ٹکٹاں داآپ جایزا لے کے فیصلا کراں گا۔ اوہناں دا کہنا سی کہ ووٹاں دی گنتی دے مطابق تحریک انصاف ملک دی مقبول ترین جماعت اے‘ ن لیگ تے پیپلز پارٹی دا کے پی الیکشن بارے خُشی مناونا حیران کن اے۔ وسیلیاں دے مطابق وزیراعظم نے ایس موقع اُتے کہیا کہ نواز شریف دی سزا ختم ہون بارے قیاس آرائیاں ہو رہیاں نیں۔ ایہ کویں ممکن اے کہ سزا یافتا بندے دی سزا ختم ہو جاوے۔ نواز شریف نے لوکائی دا پیسا لُٹیا تے باہر منتقل کیتا۔ پاناما وچ نواز شریف دا ناں آیا تے عدالت نے ڈس کوالیفائی کیتا۔ نواز شریف اج تک منی ٹریل وی نہیں دے سکے۔ اِک مجرم دی سزا ختم کر کے کویں چوتھی وار وزیراعظم بنایا جا سکدا اے۔ وزیراعظم دا کہنا سی کہ نواز شریف دی نا اہلی ختم کرن لئی راہ کڈھے جا رہے نیں۔ نواز شریف دی سزا ختم کرن دا کوئی اخلاقی جواز نہیں۔ نواز شریف دی جہڑی نا اہلی ہوئی جے اوہ کرپشن نہیں تے ہور کیہ کرپشن ہوندی اے۔ وزیراعظم نے کہیا کہ نواز شریف دی سزا ختم کرنی اے تے ساریاں جیلاں کھول دینیاں چاہیدیاں نیں۔ وزیراعظم نے کہیا کہ چھوٹے کیساں وچ ملوث لوک جیلاں وچ تے وڈے چوراں لئی راہ کڈھن دیاں گلاں ہو رہیاں نیں۔ وسیلیاں دے مطابق وزیراعظم نے ترجماناں نُوں اہم ٹاسک سونپ دِتا تے ہدایت کیتی اے کہ نواز شریف دی کرپشن تے نا اہلی نُوں اجاگر کیتا جاوے۔ ایس توں وکھ میرا گھر ہاؤسنگ قرضا سکیم دی تقریب نال خطاب کردیاں ہویاں وزیراعظم عمران خان نے کہیا کہ کسے حکومت نے غریب طبقے لئی گھر بنان دا نہیں سوچیا‘ ہُن عام بندا وی قسطاں اُتے اپنا گھر لے سکدا اے‘ جویں جویں معیشت ودھے گی سبسڈی وچ وی وادھا کراں گے‘ تواریخ وچ پہلی وار اسیں اِک نصاب ول جا رہے آں‘ نواں پاکستان ہاؤسنگ پروگرام ملک نُوں اُتے لے کے جاوے گا۔ اوہناں نے کہیا کہ تنخاہ دار طبقا اپنا ذاتی گھر نہیں خرید سکدا تے اسیں سوچدے ساں کہ کویں غیرب بندے نُوں اپنا گھر دِتا جاوے جد کہا وور سیز پاکستانی دی وی خاہش ہوندیا ے کہ پاکستان وچ اوہناں دا اپنا گھر ہووے۔ اوہناں نے کہیا کہ حکومتاں صرف ایلیٹ کلاس دا سوچدیاں نیں‘ کسے حکومت نے غریب طبقے لئی گھر بنان دا نہیں سوچیا پر ہُن عام بندا وی قسطاں اُتے اپنا گھر لے سکدا اے پر ایہ پاکستان وچ بہت پہلے ہو جانا چاہیدا سی۔دوجے پاسے پریس بریفنگ دیندیاں ہویاں وفاقی وزیر اطلاعات فواد چودھری نے کہیا کہ اجلاس وچ تنظیماں دیاں کمزوریاں اُتے گلبات کیتی گئی‘ خیبر پختونخوا وچ جس طریقے نال تنظیماں نُوں حصّا لینا چاہیدا اے یاں جس طرحاں توں تحریک انصاف نُوں اِک وڈی جماعت دے طور اُتے کردار ادا کرنا چاہیدا سی اوہ نظر نہیں آیا۔ خیبر پختونکوا دیاں چوناں وچ جہو جہے نتیجے ملنے چاہیدے سن نظر نہیں آئے‘ ایس لئی وزیراعظم نے خیبر پختونخوا دیاں بلدیاتی چوناں و چ میرٹ دے اُلٹ خانداناں وچ ٹکٹ دین دیاں شکایتاں اُتے برہمی دا اظہار کردیاں ہویاں پی ٹی آئی دی قومی قیادت نال مشاورت دے بعد تحریک انصاف دیاں ساریاں تنظیماں نُوں تحلیل کرن دا فیصلا کیتا اے‘ تحریک انصاف دے سارے آرگنائزر ز نُوں عہدیاں توں ہٹا کے اِک نویں کمیٹی تشکیل دِتی گئی اے جہدے وچ مرکزی قیادت شامل ہووے گی۔ نویں تشکیل پان والی کمیٹی اپنے آئین اُتے کم کرے گی تے وزیراعظم نُوں پیش کرے گی‘ پنجاب دیاں مقامی حکومتاں دیاں چوناں دیاں ٹکٹاں دا معاملا وی ایہو کمیٹی ویکھے گی۔ تنظیم سازی دے بعد نواں سٹرکچر تشکیل دِتا جاو ے گا۔