وزیراعظم ، قائداعظم محمد علی جناح ؒ دے سُفنیاں نُوں عملی شکل دین لئی جتن کر رہے نیں، کرسمس دا تہوار ایکے‘ محبت تے آپسی تعلقات نُوں ودھان دا موقع دیندا اے: سردار عثمان بزدار۔۔۔۔۔٭رویل خبر٭

لاہور (نمایندا رویل) وزیر اعلا پنجاب سردار عثمان بزدار نے بانی پاکستان قائداعظم محمد علی جناح ؒ دے جمن دیہاڑ تے کرسمس دے موقع اُتے اپنے پیغام وچ کہیا اے کہ قائداعظم ورگے مدبر صدیاں بعد جمدے نیں۔ قائداعظم محمد علی جناح ؒ نے مسلمانان برصغیر نُوں غلامی دیاں زنجیراں توں نجات دلوائی۔ قائداعظم محمد علی جناح ؒ دی ولولا انگیز قیادت وچ مسلماناں لئی ازاد وطن دا خاب حقیقت وچ بدلیا۔ قائداعظم ؒ نے ایکے‘ تنظیم تے ایمان دے اصولاں نُوں اپناون دی تلقین کیتی۔ تحمل‘ برداشت تے رواداری اُتے مبنی فلاحی معاشرے دا قیام بانی پاکستان محمد علی جناح ؒ دا خاب سی۔ اوہناں نے کہیا کہ بدقسمتی نال ماضی دے حکمراناں نے قائداعظم ؒ دے اصولاں توں روگردانی کیتی۔ پچھلے کرپٹ حکمراناں نے قائد ؒ دے پاکستان نُوں بری طرحاں نوچیا تے ایسے وجھا توں پاکستان اپنی اصل منزل توں ہٹ گیا۔ قائداعظم ؒ دیاں تعلیمات تے افکار اُتے عمل کر کے اسیں پاکستان نُوں حقیقی معنیاں وچ فلاحی ریاست بنا سکدے آں۔ اوہناں نے کہا کہ وزیراعظم عمران خان دی قیادت و چ پاکستان تحریک انصاف دی حکومت ایس مشن دی تکمیل لئی پرعزم اے۔ وزیراعظم عمران خان قائداعظم محمد علی جناح ؒ دے خاباں نُوں عملی شکل دین لئی جدوجہد کر رہے نیں۔ انشاء اللہ لوکائی دے تعاون نال قائداعظم دے وژن دے مطابق وزیراعظم عمران خان دی قیادت وچ پاکستان نُوں فلاحی ریاست بناواں گے۔ اوہناں نے کہیا کہ قائداعظم ؒ نُوں خراج عقیدت پیش کرن دا بہترین طریقا ایہا ے کہ سیاسی تے ذاتی مفادات نُوں پچھے سُٹ کے بحیثیت قوم اپنیاں صفاں وچ ایکے تے اکسُرتا دی مثالی فضا پیدا کیتی جاوے۔ اج دے دن سانوں قائداعظم ؒ دے فرمودات دے مطابق پاکستان نُوں عظیم توں عظیم تر ملک بنان لئی اپنیاں ساریاں توانائیاں استعمال وچ لیان دے عزم دا اعادا کرنا پوے گا۔ایس توں وکھ وزیراعلا پنجاب نے کرسمس بارے اپنے پیغام وچ کہیا کہ 25 دسمبر دا دن مسلماناں تے مسیحی برادری لئی اِکو جہیاں خُشیاں بھریا دیہاڑ اے۔ ایہ حضرت عیسی علیہ السلام دا جمن دیہاڑ اے۔ کرسمس دا تہوار ایکے‘ محبت تے آپسی تعلقات نُوں ودھان دا موقع فراہم کردا اے۔ خُشیاں ونڈن نال محبت‘ بھائی چارے تے اخوت وچ وادھا ہوندا اے۔ وزیراعلا عثمان بزدار نے کرسمس اُتے مسیحی برادری نُوں مبارکباد دیندیاں ہویاں کہیا کہ امن تے محبت دا فروغ حضرت عیسیٰ علیہ السلام دیاں تعلیمات دی اُچیچتا اے۔