مِنی بجٹ راہیں پاکستان دے ہتھ پَیر بنھن دی تیاری ہو رہی اے:  صدر  مسلم لیگ (ن) شہباز شریف ……٭ رویل خبر٭

لاہور (نمایندا رویل) پاکستان مسلم لیگ (ن) دے صدر شہباز شریف نے کہیا اے کہ زرمبادلا ذخائر وچ کمی توں بچن لئی عالمی کمرشل بینکاں اُتے انحصار ساڈے دھڑکوواں دی تصدیق اے‘ ڈالرز دے حصول لئی غیر ملکی بنکاں اُتے انحصار دی حکومتی پالیسی اگ نال کھیڈن وانگوں اے‘ منی بجٹ کسے صورت منظور نہیں تے ایہ پارلیمنٹ دے ہر رکن دا امتحان اے‘ امید اے حکومتی باضمیر ارکان جراتمندانا سٹینڈ لین گے‘ اتحادی وی ہمت نال کم لین تے کلمہ حق کہن‘ حکومتی اتحادی لوکائی تے پاکستان اُتے ظلم وچ شامل ہوئے تے پی ٹی آئی دے نال اوہ وی جرم وچ بھائیوال کہوان گے۔ اپنے بیان وچ اوہناں نے کہیا کہ منی بجٹ راہیں پاکستان دے ہتھ پَیر بنھن دی تیاری ہو رہی اے‘ 2018 توں ہُن تک موجودا حکومت قرض دی سطح 40 ارب ڈالر اُتے پہنچا چکی اے‘ جو خوفناک اے‘ چالومالی ورھے دے پہلے 5 مہینیاں دے دوران حکومت نے 5 مہینیاں وچ 4 ارب 96 کروڑ ڈالر غیر ملکی قرضا لیا‘ 4 ارب 96 کروڑ ڈالر غیر ملکی قرض وِچوں 3 ارب 45 کروڑ غیر ترقیاتی مقصداں لئی اے‘ 14 ارب ڈالر بجٹ تخمینے وِچوں ہُن تک 4.699 ارب ڈالر جمع ہوئے نیں‘ قرض دے پیسے اُتے معیشت پائیدار ہو سکدی اے تے نہ ای ملک دے حق وچ کوئی عقلمندانا پالیسی اے۔ اوہناں نے کہیا کہ جدوں ساری معیشت‘ دفاع تے حکومتی نظام قرضے اُتے کھلووے گا تے جیو اکنامکس دا فلسفا صرف لطیفا بن جاوے گا۔ اوہناں نے کہای کہ کراچی الیکٹرک ولوں بجلی دی قیمت وچ پونے 6 رُپئے دے وادھے دا تقاضا ظلم اے‘ حکومت ایہو جہے اقدامات کر رہی اے جہد ے نال لوکائی دی آمدن تے قوت خرید ختم ہو کے رہ گئی اے‘ اوپن مارکیٹ وچ کھنڈ دی قیمت وچ فیر وادھا ہو گیا اے‘ ڈالر 180.7 رُپئے دی اُچی ترین سطح اُتے اے تے حکومت ساڈے کول ڈالر نہیں دا کَہ کے ہور عدم استحکام پیدا کر رہی اے‘ حکومت دے کول عقل‘ سنجیدگی‘ درست معاشی پالیسی تے ٹیم نہیں جہدی ایس ویلے پاکستان نُوں اشد ضرورت اے۔