kraamaat@gmail.com
+ +92 333-430-6384


پنجاب دے ایکے تے پنجابی بولی دے حق لین لئی اِکمٹھ ہون دا ویلا   پنجابی زبان نُوں پرائمری توں پڑھائی وسیلا بنان لئی نال تحریک چلائی جاوے: الیاس گھمن ……٭رویل خبر٭


نمائندا رویل December 27, 2021


لاہور (اُچیچا نمایندا) ہُن اوہ ویلا آ گیا اے کہ دھرتی ماں پنجاب تے پاکستان دے پاک وجود دے خلاف بیرونی اشاریاں تے سازشاں کرن والیاں شیطانی طاقتا نُوں مونہ توڑ جواب دین لئی اکٹھے ہو کے جدوجہد کیتی جاوے تے ماں بولی پنجابی زبان نُوں پرائمری توں پڑھائی وسیلا بنان لئی اِک منظم انداز نال تحریک چلائی جاوے۔ ایہ گلاں پنجابی سٹوڈنٹس ایسوسی ایشن کراچی تے سندھ پنجابی سٹوڈنٹس ایسوسی ایشن دے پرانے آگوواں ولوں گلبرگ لاہور ہوئے اکٹھ وچ کیتیاں گئیاں۔ الیاس گھُمن دی پردھانگی وچ ہوئی ایس بیٹھک وچ اوہناں توں وکھ بولن والیاں وچ فیاض چٹھا‘ مقبول چودھری‘ ڈاکٹر افتخار احمد آرائیں‘ جاوید گورایا‘ مشتاق ماما بھولا‘ راشد جاوید چغتائی‘ زاہد خاں‘ پروفیسر یوسف غوری تے ہور کئی آگوواں اپنے وچار سانجھے کیتے جد کہ اعجاز احمد ضیاء نے بُلا ر دیاں ذمے واریاں ادا کیتیاں۔ دیس تے دیسوں باہر وَسن والے پی ایس اے دے پرانے ممبراں عہد کیتا کہ اوہ پنجاب‘ پنجابی تے پنجابیت دی بھلیائی وچ اپنا بھرواں کردار ادا کرن گے۔ ایس موقع تے کینڈا توں آئے محند اشرف‘ سعودی عرب توں محمد عمران ظہیر تے آسٹریلیا توں آئے محمد سعید آرائیں نُوں سواگی پھُل پیش کیتے گئے۔ پردیساں وچ وڈی گنتی وچ رہندے پی ایس اے ولوں بولدیاں ایہناں پروہنیاں آکھیا کہ اوہ سمندروں پار رہندی پنجابی کمیونٹی نُوں لہر وچ اپنا بھرواں حصّا پان دا کہن گے۔