جہناں دا ٹکٹ لوکائی کٹ چکی اے اوہ اپنی ٹکٹ دی فکر کرن‘ نواز شریف تے شہباز شریف دے خلاف بس الزام ای نیں ثبوت کوئی نہیں:رانا ثناء اللہ ……٭رویل خبر٭

لاہور (نیوز ڈیسک) پاکستان مسلم لیگ (ن) پنجاب دے صدر رانا ثناء اللہ نے کہیا اے کہ نواز شریف حالے آئے نہیں حکومت دی ”ٹلی“ وج چُکی اے‘ نواز شریف دے واپس آن دا خوف حکمراناں نُوں سون نہیں دے رہیا‘ تُسیں جو کرنا اے کرو‘ جو کہنا اے کہوو پر تہانوں جانا تے پوے گا۔ اپنے بیان وچ اوہناں نے کہیا کہ نالائقی‘ نا اہلی تے کرپشن دا سونامی لیان والیاں دیاں چیکاں نکل رہیاں نیں‘ نیازی سنے ہر وزیر تے ترجمان دا بیان تے پریس کانفرنس صرف نواز شریف‘ شہباز شریف توں شروع تے ایہناں اُتے ختم ہوندا اے‘ عمران نیازی تے پنڈی دے شطیطان نُوں اِک ای پیغام اے کہ ’بس تُسیں گھبرانا نہیں اے“ چپڑاسی دے بیان توں ثابت ہو گیا کہ نہ صرف گھبرائے ہوئے نیں سگوں ”بونترے“ ہوئے وی نیں‘ عمران نیازی نے گھبراہٹ وچ پارٹی آئین ای ختم کر دِتا اے‘ ایس ویلے پی ی آئی بطور جماعت قانونن ختم ہو چکی اے۔ اوہناں نے کہیا کہ پوری قوم اپنے قائد محمد نواز شریف دا استقبال کرن لئی تیاراے‘ جہناں دا ٹکٹ لوکائی کٹ چکی اے اوہ اپنی ٹکٹ دی فکر کرن‘ نواز شریف تے شہباز شریف دے خلاف بس الزام ای نیں ثبوت کوئی نہیں‘ جدوں نواز شریف آن گے تے عمران نیازی‘ شیدا ٹلی تے کرائے دے ترجماناں نُوں لُکن دی تھاں نہیں ملے گی۔