اداکاری وچ حقیقت لیاون دا شوق، شاہد کپور نُوں سنگی اداکارا نے زور دار چپیڑ مار دِتی ……٭رویل خبر٭

ممبئی (نیوز ڈیسک) شاہد کپور اپنی اداکاری وچ حقیقت دا عنصر پیدا کرن لئی جانے جاندے نیں۔ 31 دسمبر نُوں سینما دی زینت بنن جا رہی فلم جرسی وچ شاہد کپور تے ایکٹریس مرونال ٹھاکر نے اداکاری دے جوہر وکھائے نیں۔ فلم دی ہدایتکاری گوتم تنانوری نے کیتی اے۔ فلم وچ ہیروئن دا کردار نبھان والی مرونال ٹھاکر نے شوٹنگ دے دوران اِک سین دا ذکر کردیاں ہویاں مداحاں نال اِک واقع شیئر کیتا کہ کس طرحاں شاہد کپور نے اوہناں نُوں اپنے خوف اُتے قابو پان وچ مدد کیتی۔ فلم دے ٹریلر وچ وی لوک ایس سین نُوں ویکھ سکدے نیں۔ مرونال ٹھاکر نے دَسیا کہ فلم وچ اِک سین اے جہدے وچ اوہناں نُوں ساہد کپور نُوں چپیڑ مارنی سی تے اوہ ڈر رہے سن کہ کدھر زور نال نہ وج جاوے۔ شاہد کپور نے اوہناں دی ڈھارس بندھائی تے کہیا کہ میں آپ ایہ چاہندا آں کہ تُسیں مینوں زور نال چپیڑ مارو تے فیر اوہناں نے شاہد نُوں چپیڑ مار دِتی۔