جدوں تک وزیر خزانا آں ،عمران خان دے سُفنے پورا کردا رہواں گا:شوکت ترین ……٭رویل خبر٭

اسلام آباد (نیوز ڈیسک) وفاقی وزیر خزانا شوکت ترین نے کہیا اے کہ غریباں دا روٹی‘ کپڑا تے مکان دا خاب کدی پورا نہیں ہویا‘ ورھیاں توں غریب لوکائی نُوں خاب وکھائے جا رہے نیں‘ ہُن اِک بندا آیا اے جہڑا ریاست مدینہ اُتے یقین رکھدا اے تے غریباں لئی اقدامات کر رہیا اے‘ ہر فصل لئی ڈیڈھ لکھ رُپئے بلا سود قرضے دِتے جان گے‘ سال دیاں دوہاں فصلاں لئی 3 لکھ رُپئے‘ زراعت دے سامان لئی 2 لکھ رُپئے دے قرضے دِتے جان گے‘ کاروبار لئی 1 خاندان نُوں بلا سود 5 لکھ توں 25 لکھ رُپئے تک بلا سود قرضے دِتے جان گے‘ وزیراعظم دی ہدایت دے مطابق جے کسے گھر وچ کوئی بیماری ہووے گی تے اوہدے وچ صحت کارڈ راہیں مفت علاج فراہم کیتا جاوے گا‘ جدوں تک وزیر خزانا آں میں عمران خان دا ایہ خاب پورا کردا رہواں گا۔ جمعرات نُوں کامیاب پاکستان پروگرام دے تحت بلا سود قرضا جات دی فراہمی دی تقریب دے دے وفاقی وزیر خزانا شوکت ترین اُچیچے پروہنے سن۔ چیئرمین اخوت اسلامک مائیکرو فنانس نے پروگرام دے اغراض و مقاصد دے بارے وچ اگاہ کیتا۔ تقریب نال خطاب کردیاں ہویاں شوکت ترین نے کہیا کہ جہڑ ے لوک بینک دی رسائی توں محروم نیں اوہناں نُوں براہ راست قرضے فراہم کیتے جا رہے نیں‘ ایس سلسلے وچ وزیراعظم پاکستان نے خصوصی اقدامات دیاں ہدایتاں دِتیاں نیں۔ اوہناں نے ہور کہیا کہ گھراں دی اُساری لئی 20 لکھ توں 25 لکھ دا بناسود قرضا لیا جا سکدا اے‘ ایہدے اُتے تھوڑے جہے چارجز نیں‘ 40 لکھ گھراں نُوں میرٹ اُتے شفافیت نال بلا سود قرضے فراہم کر رہے آں‘ فلاحی ریاست ول قدم رکھ دِتا گیا اے۔