kraamaat@gmail.com
+ +92 333-430-6384


مِنی بجٹ.................................٭رویل کالم٭


جمیل احمد پال December 31, 2021


مِنی بجٹ……٭رویل کالم٭

جمعرات والے دن پارلیمنٹ وچ منی بجٹ پیش کیتا گیا۔ منی بجٹ بارے حکومتی پارٹی تے اپوزیشن کئی دناں توں دو بدو ہون دے جتن وچ سن۔ حکومت کول ایہدے بارے اپنے ای جواز نیں جد کہ اپوزیشن ایہنوں تے سٹیٹ بینک آپ مختیاری بل نوں ڈھاکا دی شکست نالوں ودھ کے ماڑا آکھ رہے سن۔ اپوزیشن دے خیال وچ ایہدے توں اگلا قدم ایٹمی اثاثے ہوون گے۔

دوہاں دھراں کول ایہدے بارے اپنے اپنے نظریے نیں۔ اپوزیشن ایہنوں ایس انداز نال پیش کر رہی اے کہ ایہدے نتیجے وچ مہنگائی دا سونامی اک واری فیر لہراں ماردا آ جاوے گا۔ حکومتی بھونپو اوہی پرانا راگ الاپ رہے نیں کہ منی بجٹ دا لوکائی اُتے اثر نہیں پوے گا۔ ظاہر اے حکومتی موقف نوں کسے طرحاں وی ٹھیک نہیں منیا جا سکدا۔ منی بجٹ ورگا کوئی کارا ای نہیںپٹرول وستاں وچ معمولی جہیا وادھا وی مہنگائی وچ کنی گنا وادھا کر دیندا اے۔ ایس ویلے مہنگائی دی شرح جو ساڈھے یارھاں فیصد دسی جا رہی اےمنی بجٹ لازمن اوہدے وچ ہور وادھے دا کارن بنے گا۔ایس لئی حکومتی موقف کسے طرحاں وی ٹھیک نہیں منیا جا سکدا۔ ایہ وکھری گل اے کہ کاں چٹا وانگوں حکومت دے خیال وچ اجے وی پاکستان دنیا دا سبھ نالوں سستا دیس اے۔

منی بجٹ دی لوڑ ای کیوں پیندی اے؟ ایہدا مطلب ہوندا اے کہ یاں تے حکومت ولوں پیش کیتے گئے بجٹ وچ وڈیاں خامیاں رہ گئیاں سن تے اوہ حقیقت دے مطابق نہیں سی جس پاروں ادھا مالی سال بیتن دے نال ای اوہدے اُتے نظر َثانی دی لوڑ پے گئی تے حکومت دے خیال وچ جتھے جتھے لوکائی دے چھوڈے لاہے جا سکدے سن پر نہیں سن لاہے گئےہُن اوتھے وار کرنا ضروری ہو گیا اے۔ ایہدا دوجا کارن ایہ وی ہو سکدا اے کہ بجٹ دے مطابق حکومت ولوں اللے تللے کرن دے بعد ہور پیسے دی لوڑ پے گئی جس پاروں ٹیکساں وچ وادھے کر کے خرچے کڈھے جاون گے۔

پاکستان اندر حکومت کوئی وی ہووےغیر حقیقت پسندانا انداز نال بجٹ ای نہیںہور معاملات وچ وی لوکائی نال جھوٹھ بول کے تے سبز باغ وکھا کے ڈنگ ٹپاؤ پالیسیاں چلاندی اے جو بہت چھیتی اپنا پھسپھسا پن وکھا کے پالیسی اتے نظرثانی کرن نوں مجبور ہو جاندی اے۔ چالو بجٹ جدوں پیش کیتا گیا سی تاں وی حکومتی بھونپوواں نے ایہنوں دنیا دے بہترین بجٹ گان مطابق آکھیا سی۔ہُن اوہی لوک نویں سریوں نویں لفظاں دی جگالی کر کے لوکاں دا من پرچان دے جتن وچ نیں۔ اودوں وی جھوٹھ بولے گئے سنہن وی نویں جھوٹھ بولے جا رہے نیں۔

جنا چر بجٹ وچ حقیقت پسندی نوں نہیں مُکھ رکھیا جاندا تے غیر پیداواری خرچے نہیں گھٹائے جاندےنہ تے لوکائی دا ساہ سوکھا ہووے گا تے نہ ای منی بجٹ ورگے کارے رُک سکن گے۔