بزم فروغِ فکر و فن ولوں دسویں ورھے وار پنجابی مشاعرے دا پربندھ۔۔۔۔۔٭رویل خبر٭

ڈاکٹر اکبر علی غازی(رپورٹ)، 9 جنوری 2022ء نوں سیالکوٹ وچ اک عظیم الشان مشاعرے دا پربندھ کیتا گیا۔ ایہ پربندھ بزم فروغِ فکر و فن محفل سجناں دی لدھڑ سیالکوٹ نے کیتا سی۔ایہ ادبی تنظیم عدنان قلزم رانجھا ہوراں 2011ء وچ قائم کیتی سی جہدے سرپرست ڈاکٹر اکبر علی غازی تے جنرل سیکرٹری جی ایم واصف نیں۔ ایس پنجابی ادبی تنظیم دا ایہ دسواں ورھے وار مشاعرہ سی جہدی صدارت پنجابی تے اردو دے منے پرمنے شاعر ڈاکٹر دانش عزیز نے کیتی۔ ایس اکٹھ نوں ”اک شام علی احمد گجراتی دے ناں“ دا ناں دتا گیا سی۔ صاحبِ شام توں وکھ سٹیج اُتے خالد ندیم شانی(میانوالی)، مرلی چوہان(میاں چنوں)، افضل پارس (لاہور)، محمد ایوب صابر (سیالکوٹ)، شیراز غفور(ڈیرہ غازی خان)، نصیر احمد(لاہور)،محمد انیس طارق(سیالکوٹ)، جی اے نجم(لاہور)، محمداسلم شوق (لاہور)، افتخار شاہد(ڈسکہ)، اکرم ریحان(کنگن پور)تے سرپرستِ اعلی دے طور تے ڈاکٹر اکبر علی غازی موجود سن۔ پروگرام دے بلاوے دی ذمہ داری پروفیسر آصف علی علوی(سیالکوٹ) ہوراں نبھائی۔ سبھ توں پہلاں قاری عبدالرشید ہوراں تلاوت کلام پاک دی سعادت حاصل کیتی جدوں کہ نعتِ رسول مقبول ﷺ دی سعادت پنجابی تے اردو دے نعت نگار تجمل حسین تجمل دے حصے وچ آئی۔

اکٹھ وچ تلاوت تے نعت شریف توں بعد صدر محفل ڈاکٹر دانش عزیز تے صاحبِ شام علی احمد گجراتی دے سر تے پنجابی رہتل دی شان پگ بنھی گئی۔ پگ بنھائی دی ایہ سعادت راقم دے حصے وچ آئی جدوں کہ ایس کم وچ محفل دے پربندھکاں عدنان قلزم رانجھا تے جی ایم واصف نے میرا ہتھ وٹایا۔ ایس توں بعد مشاعرے دا باقاعدہ مڈھ مقامی شاعراں توں بنھیا گیا۔ مشاعرے دے ایس حصے وچ دانش تسلیم، میاں محمد جمیل انجم، جمیل ساحل، انور محمود انور، جی ایم واصف، عامر رفیق عامر، رمضان جانی، سجاد احمد جان، شہزاد عجمی، امتیاز حسین چٹھہ، اویس باسل، رانا عثمان احامر، وسیم جوتش، نعمت اللہ ارشد گھمن، رضا المصطفے، ریاض راہی، رحمان امجد مراد، مرزا سیف اللہ ساجد، طاہر خیال، مقصود یاور، فریحہ باجوہ، سمیرا ساجد، محمود حیدر پیرزادہ، محمود کیفی، شبیر بلو صراف تے مجمان عدنان قلزم رانجھا ہوراں اپنا کلام پیش کیتا۔ ایس پروگرام وچ آدری پرہنیاں دے طور تے لاہور دیاں شاعراں عفی گجر، سعادت علی سعدی، محمد آصف انصاری، نبیل نجم، اقبال بزمی، عطاء العزیز، علی جوشا، شہباز یادش، حُسن بانو تے زاہدہ جبین راؤ ہوراں رلت کیتی۔ پروگرام دے آخر وچ شاعراں تے قلمکاراں نوں یادگاری شیلڈاں پیش کیتیاں گئیاں تے ان پانی وی پیش کیتا گیا۔ چار وجے شام نوں شروع ہون والا ایہہ مان جوگ مشاعرہ رات دس وجے تک جاری رہیا۔ بہتے شاعراں نے اپنا کلام پنجابی زبان وچ پیش کیتا جدوں کہ کجھ شاعراں نے پنجابی دے نال نال اردو کلام وی سنایا۔ اشتہار دے مطابق ایہہ مشاعرہ دی ٹریک سکول سسٹم گھوئینکی وچ ہونا سی پر بارش تے کجھ انتظامی کارناں توں ایس مشاعرے نوں السبطینی میرج ہال پکی کوٹلی سیالکوٹ وچ کروایا گیا۔ شیلڈاں دے حوالے نال سجاد احمد جان، اسلم شیخ تے سوچاں دی مہکار سیالکوٹ دی پوری ٹیم دا تعاون قابلِ قدر اے۔ان شاء اللہ اک لمے عرصے تک ایہمشاعرہ یاد رہوے گا۔