مشیراں دے غلط مشوریاں اُتے محتاط رہو:چودھری شجاعت حسین ……٭رویل خبر٭

لاہور(نیوز ڈیسک) پاکستان مسلم لیگ (ق) دے آگو تے پچھلے وزیراعظم چودھری شجاعت حسین نے عمران خان نُوں مشیراں دے غلط مشوریاں اُتے محتاط رہن دا کَہ دِتا۔ چودھری شجاعت حسین نے اپنے جاری بیان وچ کہیا کہ پہلی وار وزیراعظم عمران خان نُوں کَہ رہیا آں اوہ اپنے مشیراں تے سیاسی ترجماناں دے غلط مشوریاں توں نہ صرف محتاط سگوں خبردار رہن‘ جدوں عمران خان نُوں اوہناں دے مشیر کوئی ایڈوائس دیندے نیں تے ایہدے وچ کوئی نہ کوئی گل ضرور ہوندی اے‘ اوہ اپنی سوچ دے مطابق شیواں نُوں اُچھالدے نیں جہدا نقصان صرف عمران خان نُوں ای ہوندا اے۔ پاکستان مسلم لیگ (ق) دے آگو نے ہور کہیا کہ عمران خان دا ایہ بیان کسے دشمن نما دوست نے دِتا ہووے گا جہدے وچ اوہناں نے کہیا کہ مینوں اسمبلی وچ بولن نہیں دِتا جاناد‘ میڈیا وچ آ کے بولدا آں‘ جے مینوں ہٹایا گیا تے پہلے توں ودھ خطرناک بن جاواں گا‘ وزیراعظم نُوں اسمبلی وچ بولن نہیں دِتا جاندا تے اوتھے بیٹھے مراعات یافتا ارکان کیہ گونگے بولے نیں جہڑے دوجیاں نُوں عمران خان دے خلاف بولن دیندے نیں۔ اوہناں دا کہنا سی کہ جے اسیں کسے قسم دے بیان نُوں درستگی لئی کہیے تے اوہ ان پڑھ مشیر فورن عمران خان دے کن وچ کہندے نیں کہ تُسیں ایہناں دے نال کوئی نرم رویا اختیا ر نہ کرو۔ اصل گل مشیراں نُوں پتا ہوندی اے پر اوہ موقع دی کھوج وچ رہندے نیں کہ کس طرحاں وزیراعظم نُوں اپنے مطلب دے مطابق گائیڈ کرن۔