اٹارنی جنرل دی شہباز شریف نُوں چِٹھی،نواز شریف دیاں میڈیکل رپورٹاں بورڈ نُوں پیش کرو‘ نہیں تاں توہین عدالت دی درخاست دایر کراں گے ……٭رویل خبر٭

لاہور (نیوز ڈیسک) پچھلے وزیراعظم نواز شریف دی وطن واپسی دے معاملے اُتے اٹارنی جنرل نے اپوزیشن لیڈر شہباز شریف نُوں خط لکھ دِتا۔ خط وچ کہیا گیا کہ 10 دن وچ نواز شریف دیاں میڈیکل رپورٹاں خصوصی بورڈ نُوں پیش کرو‘ رپورٹاں نہ دین اُتے تہاڈے خلاف توہین عدالت دی درخاست دایر کراں گے۔ اٹارنی جنرل نے اپنے خط وچ کہیا اے کہ 16 نومبر 2019 نُوں لاہور ہائیکورٹ نے نواز شریف نُوں باہر جان دی اجازت دِتی سی۔ خط وچ شہباز شریف نُوں ہور کہیا گیا کہ ڈاکٹراں دیاں ہدایتاں دے مطابق نوا ز شریف نُوں باہر جان دی اجازت 4 ہفتیاں لئی سی۔ خط وچ کہیا گیا کہ تُسیں نواز شریف دیاں میڈیکل رپورٹاں نہ دے کے بیان حلفی دی خلاف ورزی کیتی اے۔ اٹارنی جنرل نے خط وچ ایہ وی کہیا کہ تُسیں میڈیکل رپورٹاں نہ دے کے عدالتی حکم دی وی خلاف ورزی کیتی‘ لاہور ہائیکورٹ نال رجوع کرن توں پہلے تہانوں رپورٹاں دین لئی رابطے کر رہیا آں۔ خط وچ ہور کہیا گیا کہ 10 دن وچ نواز شریف دیاں میڈیکل رپورٹاں خصوصی بورڈ نُوں پیش کرو‘ رپورٹاں نہ دین اُتے تہاڈے خلاف توہین عدالت دی درخاست دایر کراں گے۔ پنجاب حکومت نے نواز شریف دیاں میڈیکل رپورٹاں دی پُن چھان لئی کمیٹی بنائی۔ خصوصی میڈیکل بورڈ نے 17 جنوری نُوں رپورٹ پیش کیتی اے۔ اٹارنی جنرل نے خط راہیں کہیا کہ میڈیکل بورڈ دے مطابق نواز سریف دے ٹیسٹاں دی کوئی رپورٹ پیش نہیں کیتی گئی۔ میڈیکل بورڈ نے صاف لفظاں وچ کَہ دِتا اے کہ رپورٹاں نہ ہون اُتے نواز شریف دی صحت اُتے حتمی رائے نہیں دِتی جا سکدی۔ اٹارنی جنرل نے اپوزیشن لیڈر اُتے واضح کیتا کہ میڈیا رپورٹاں مطابق نواز شریف دی لندن وچ طبیعت بہتر اے۔ خط وچ ایہ وی کہیا گیا کہ پچھلے وزیراعظم جدوں باہر گئے سن تے اوہناں دی حالت بڑی نازک دَسّی گئی سی پر جویں ای اوہ لندن اپڑے اوہناں دی حالت بہتر ہو گئی۔ اٹارنی جنرل دے خط وچ شہباز شریف نُوں کہیا گیا کہ لندن جان دے بعد نواز شریف اِک دن وی ہسپتال داخل نہیں رہے‘ اوہناں دیاں سیاسی تے سماجی سرگرمیاں جاری نیں۔