ماں بولی دیہاڑ نوں  پنجاب اسمبلی دے ساہمنے احتجاجی مظاہرا تے پنجابی زبان، ذریعا تعلیم بناون دی  منگ حکومت دے ساہمنے رکھاں گے: پنجابی تنظیماں دے نمایندیاں دا اُچیچا اجلاس۔۔۔۔٭رویل خبر٭

لاہور (اُچیچی رپورٹ) پنجابی یونین دے اہتمام ہیٹھ پچھلے دن پنجاب ہاؤس وچ پنجابی زبان دے ودھا تے حقاں دے حصول لئی پورے ملک وچ سرگرم پنجابی تنظیماں دے نمایندیاں دا اہم اجلاس ہویا۔ اجلاس وچ پچھلے ہون والے اجلاساں وچ کیتے جان والے فیصلیاں تے 21 فروری نُوں مادری زباناں دے عالمی دیہاڑ دے موقع اُتے پنجابی زبان دے نال ہون والے امتیازی سلوک خلاف تے پنجابی زبان دے حقاں دا مطالبا کرن لئی پنجاب اسمبلی دے ساہمنے کیت یجان والے ساریاں پنجابی تنظیماں دے سانجھے احتجاجی مظہارے دے انتظاماں دا جایزا لیا گیا‘ اجلاس دی مجمانی پنجابی یونین دے چیئرمین مدثر اقبال بٹ تے وائس چیئرمین بلال مدثر بٹ نے کیتی۔ اجلاس وچ مختلف پہلوواں دا جایزا لین دے بعد اِک واری فیر اتفاق رائے نال 21 فروری نُوں ہر صورت احتجاجی ظاہرا کرن دا فیصلا کیتا گیا۔ مجمان مدثر اقبال بٹ نے سانجھے اعلامیے دا اعلان کردیاں ہویاں کہیا کہ پاکستان سپر لیگ کرکٹ میچاں دی وجھا توں 21 فروری نُوں مال روڈ اُتے کجھ مسئلیاں دا ساہمنا کرنا پے سکدا اے پر اسیں ہر صورت پنجاب اسمبلی دے ساہمنے اپنا احتجاجی مظاہرا کراں گے تے پنجابی نُوں ذریعا تعلیم بنان د اپنا مطالبا حکومت دے ساہمنے رکھاں گے۔ اوہناں نے کہیا کہ اسیں پرامن لوک آں تے پرامن طریقے نال اپنی گل کراں گے۔ اجلاس وچ پنجابی تنظیماں دے جہناں نمایندیاں نے رلت کیتی اوہناں وچ پنجابی شاعربابا نجمی،دانشور تے صحافی الیاس گھمن،پنجابی پرچار دے ولوں احمد رضا وٹو،پنجابی ادبی بورڈدی سیکرٹری پروین ملک،پنجابی دی سرگرم کارکن دیپ سعیدہ،نذیر جوئیا،بابا وارث،افضل ساحر،یوسف پنجابی،جاوید پنچھی،آصف رضا،احمد اقبال بزمی،اسلم گل،سجاد حیدرتے آصف رضا شامل سن۔ اجلاس دے شروع وچ مجمان پنجابی یونین دے چیئرمین مدثر بٹ نے گلبات دا اغاز کردیاں ہویاں پچھلیاں میٹنگز دی کارروائی دا مختصر جایزا پیش کیتا۔ ایس موقع اُتے الیاس گھمن ولوں سارے رلتیاں دے گلیاں وچ پنجابی سافے پائے گئے تے 21 فروری دے احتجاجی مظاہرے لئی سراں اُتے بنھن لئی کالے رنگ دیاں پٹیاں وی ونڈیاں جہناں اُتے پنجابی نُوں پرائمری تک ذریعا تعلیم بنائے جان دا مطالبا وی لکھیا اے۔ ایس دوران دیب سعیدہ نے گلبات وچ حصا لیندیاں ہویاں کہیا کہس انوں ایہو جہے سافے ڈیزائن کرنے چاہیدے نیں جہناں اُتے پنجابی کلچر تے ثقافت دی جھلک نظر آئے‘ جویں سندھی اجرک ہوندا اے تے سانوں ساریاں نُوں احتجاجی مظاہرے وچ وی ایہناں سافیاں دے نال رلت کرنی چاہیدی اے۔ ایہدے اُتے الیاس گھُمن نے دَسیا کہ 21 فروری دے احتجاجی مظہارے لئی وڈی گنتی وچ سافے‘ احتجاجی پٹیاں‘ سٹیکر تے پمفلٹ بنوا لئے گئے نیں جہڑے رلتیاں وچ ونڈے جان گے۔مدثر اقبال نے دَسیا کہ ایہو جہے ای 5 ہزار پمفلٹ بنوا کے اسلام آباد وی گھل دِتے گئے نیں۔ ایس موقع اُتے نذیر جوئیا نے سوشل میڈیا اُتے کئی لوکاں دیاں ایہو جہیاں پوسٹاں ول توجا دلوائی جہناں وچ دوجیاں زباناں اُتے تنقید دا عنصر پایا جاندا اے ایہدے اُتے پنجابی ادبی بورڈ دی سیکرٹری پروین ملک نے کہیا کہ سانوں اپنی زبان دے فروغ تے حق دی گل کرنی چاہیدی اے‘ کسے ہور زبان اُتے نہ تے تنقید کرنی چاہیدی اے نہ اوہدی تضحیک دی حوصلا افزائی کرنی چاہیدی اے۔ الیاس گھُمن نے کہیا کہ ساڈا مقصد اپنی ماں بولی نُوں اوہدا مقام تے حق دلوانا اے‘ ساڈے لئی دنیا دیاں ساریاں مادری زباناں احترام جوگ نیں۔ احمد رضا وٹو نے کہیا کہ سانوں ساریاں زباناں اد احترام کردیاں ہویاں اپنی ماں بولی د ے حقاں دی اواز اُچی کرنی اے جہدی اجلاس دے سارے رلتیاں نے تائید کیتی۔ اجلاس وچ مدثر اقبال بٹ تے الیاس گھُمن نے اجلاس دیاں تیاریاں دے حوالے توں دَسیا کہ ساڈیاں تیاریاں مکمل نیں جہدی نگرانی احمد رضا وٹو دی اگوائی وچ قایم 5 رکنی کمیٹی کر رہی اے جہدا حتمی جایزا لین لئی 20 فروری نُوں میٹنگ ہووے گی۔ اجلاس وچ اتفاق رائے نال 21 فروری دے پروگرام نُوں وسعت دے کے الحمرا وچ اِک سیمینار منعقد کرن دا فیصلا وی کیتا گیا۔ افضل ساحر نے کہیا کہ میرے ذمے جہڑا وی کم لایا جاوے گا میں ا وہنوں پورا کراں گا‘ ایہدے اُتے اوہناں دی اگوائی وچ 5 رکنی ٹیم تشکیل دے دِتی گئی اے جہڑے فنکاراں تے سوشل میڈیا راہیں 21 فروری دے پروگراماں دا پیغام ودھ توں ودھ لوکاں تک پہنچان گے۔ اجلاس دے اخیر اُتے مجمان مدثر اقبال بٹ نے سانجھے اعلامیے دا اعلان کردیاں ہویاں دَسیا کہ حالات کجھ وی ہون اسیں 21 فروری نُوں پنجاب اسمبلی دے ساہمنے احتجاجی مظاہرا ہر صورت کراں گے جہدے انتظاما ت کر لئے گئے نیں۔ احتجاجی مظاہرے دے بعد الحمراہ دے ہال نمبر 2 وچ ماں بولی دے حوالے توں سیمینار ہووے گا جہدے وچ ملک دیاں نامور شخصیا ت رلت کرن گیاں تے لوک فنکار اپنے فن دا مظاہرا وی کرن گے۔ اوہناں نے کہیا کہ ایہناں پروگراماں وچ پنجابی نال محبت کرن والیاں تے پنجابی لئی کم کرن والیاں نُوں چاہیدا اے کہ اوہ سیاسی تے مذہبی وابستگیاں توں بالا تر ہو کے آپ وی رلتی ہون تے دوجے لوکاں تک وی ماں بولی دے حق لئی اواز چُکن دا پیغام گھلن تاں جے 21 فروری نُوں پنجاب اسمبلی دے ساہمنے ہون والے احتجاجی مظہارے وچ ودھ توں ودھ لوک رلت کرن۔ اجلاس دے اخیر اُتے مجماناں ولوں پروہنیاں دی سیوا کیتی گئی۔