امریکا نے سانوں ورتیا…… اسیں کیوں ورتیجے؟ ……٭رویل کالم٭

امریکا نے سانوں ورتیا…… اسیں کیوں ورتیجے؟ ……٭رویل کالم٭

وزیر اعظم ہوراں اِکو ساہ وچ دو گلاں کیتیاں۔ اوہناں نے فرمایا‘ امریکا نے ہمیشا سانوں اپنے مطلب لئی ورتیا‘ جدوں ضرورت پئی اوہنے سانوں دوست بنایاتے مطلب نکلن اُتے چھڈ دتا۔ نال ای ایہ وی فرمایا کہ امریکا وی پاکستان دا چنگا دوست اے پر اوہدے نال چین ورگی دوستی نہیں۔

حیرانی دی گل اے‘ جہڑا دوست مطلب ویلے دا دوست ہوندا اے تے مطلب نکلن مگروں چھڈ جاندا اے‘ اوہنوں کویں چنگا دوست آکھیا جا سکدا اے جد کہ وزیر اعظم ہوری ایہو گل آکھ رہے نیں۔ایس گل نوں پاسے رکھ کے کہ اوہناں دی ایہ گل کس حد تیکر قومانتری سفارتی اخلاقیات دے مطابق اے تے ایہدے کیہ نتیجے نکل سکدے نیں‘ اسیں ایس سلسلے وچ کجھ گلاں یاد کرن دا جتن کراں گے۔

دوستی وچ اِکو ویلے ”مطلب دے تعلقات“تے ”چنگے تعلقات“ نہیں ہو سکدے۔ تعلقات یاں چنگے ہوندے نیں تے یاں فیر مطلب دے۔ مطلب دے تعلقات نوں وی تعلقات نہیں سگوں کاروبار کہنا زیادا مناسب ہوندا اے۔ تے ایہو کجھ امریکا نے ساڈے نال کیتا۔ امریکی کاروباری لوک نیں۔ نہ وی ہوون تاں اج دی دنیا اندر مخلصانا تے برادرانا تعلقات ناں دی کوئی چیز موجود نہیں۔ تعلقات دی بنیاد آپسی مفادات ہوندے نیں تے ساری دنیا وچ ایہو اصول چلدا اے۔ ساڈی خارجا پالیسی اج وی ہزار سال پرانیاں لیہاں اُتے ٹر رہی اے جدوں بادشاہواں وچکار برادرانا تعلقات ہوندے سن تے اک دوجے نال تحفے تے کنیزاں دا وٹاندرا ہوندا سی۔ اج دی دنیا اندر لین دین تے تجارت دا نظام چلدا اے۔ ست ست سال جنگاں لڑن والے یورپی اج اِکو دیس ورگا روپ وٹا گئے نیں تے اکو کرنسی چلا رہے نیں۔ ترکی تے مصر دے تعلقات اپنے سابقا جانی دشمن اسرائیل نال بہت چنگے نیں تے تجارت ہو رہی اے۔ مُلکاں وچکار بھائی یاں بھین دا رشتا نہ ہوندا اے تے نہ ہو سکدا اے۔ایہ تے انسان ہوندے نیں جہناں دے بھیناں بھرا ہوندے نیں تے برادرانا تعلقات وی۔

امریکا نے سانوں کدی وی نہیں ورتیا‘ سگوں اسیں ورتے گئے۔ اوہنے ساڈے نال کاروبار کیتا‘ سانوں کسے نہ کسے ”پراجیکٹ“ دا ٹھیکا دتا۔اساں اوہ ٹھیکا نبھایا تے بعد وچ اِکپاسی برادرانا تعلقات وی سمجھ بیٹھے۔ افغانستان وچ ساڈی کمکاری دے اسیں پورے پورے پیسے وصولے۔ ہور وی دنیابھر وچ جتھے جتھے پراجیکٹ ملیا‘ اسیں پورے پورے پیسے وصول کیتے۔ کاروبار تے تجارت وچ معاملا مُکن دے بعد اگلا سودا تے ٹھیکا ہوندا اے‘ برادرانا تعلقات نہیں۔

ہر پراجیکٹ دی پوری فیس وصولن دے بعد ساڈا حق ای نہیں بندا کہ اسیں عشق و محبت دیاں پینگھاں دی توقع وی کریے۔ عشق وکھرا محکما اے تے کاروبار وکھرا۔ دُکاندار جے گاہکاں نال پیار محبت شروع کر دیوے تاں کاروبار دا بھٹھا بہا لوے گا۔