پاکستان ڈیمو کریٹک موومنٹ ولوں تحریک عدم اعتماد لیان دا اعلان ……٭رویل خبر٭

لاہور (نیوز ڈیسک) مولانا فضل الرحمان دی اگوائی وچ ہون والے اجلاس وچ پاکستان ڈیمو کریٹک موومنٹ (پی ڈی ایم) نے حکومت دے خلاف تحریک عدم اعتماد لیان دا اعلان کر دِتا اے‘ پیپلز پارٹی نُوں وی اعتماد وچ لیا جاوے گا جد کہ حکومتی اتحادیاں نال رابطیاں دا وی فیصلا کیتا گیا اے۔ لاہور وچ مولانا فضل الرحمان دی صدارت ہیٹھ اپوزیشن دے اگوائی اجلاس وچ مختلف امور اُتے مشاورت کیتی گئی جد کہ مریم نواز تے شہباز شریف ولوں عشائیے دا وی اہتمام کیتا گیا۔ مولانا فضل الرحمان دی اگوائی وچ ہون والا اجلاس ڈھائی گھنٹے تک جاری رہیا‘ اجلاس وچ مختلف امور اُتے وچار وٹاندرا کیتا گیا۔ ماڈل ٹاؤن وچ ہون والے الاس وچ مولانا فضل الرحمان‘ شہباز شریف‘ حمزہ شہباز‘ مریم نواز‘ اکرم درانی‘ رانا ثناء اللہ‘ خواجا سعد رفیق تے ہور مختلف جماعتاں دے آگو رلتی ہوئے۔ اجلاس وچ پاکستان مسلم لیگ (ن) دے قائد تے پچھلے وزیراعظم میاں نواز شریف نے لندن توں ورچوئل رلت کیتی ج دکہ اجلاس وچ پہلے لانگ مارچ ہووے یاں ان ہاؤس تبدیلی سنے سارے آپشن اُتے غور کیتا گیا۔ اجلاس دے بعد پی ڈی ایم دے آگو مولانا فضل الرحمان نے قومی اسمبلی وچ اپوزیشن لیڈر تے پاکستان مسلم لیگ (ن) دی نائب صدر مریم نواز دے نال میڈیا نال گل بات کردیاں ہویاں کہیا کہ فیصل اہویا اے کہ حکومت دے خلاف تحریک عدم اعتماد لیاواں گے‘ سیاسی لوک آں‘ اتفاق رائے تے سوچ سمجھ دے نال فیصلے کردے آں‘ ہُن حالات بدل گئے نیں تے حالات دا انتظار کرناپیندا اے۔ مولانا فضل الرحمان دا کہنا سی کہ سیاست وچ وڈے فیصلیاں لئی دل وی وڈا کرنا پیندا اے‘ عدم اعتماد لیان لئی حکومت دیاں اتحادی جماعتاں نال وی رابطے کراں گے‘ حکومت دیاں اتحادی جماعتاں نال رابطیاں لئی ٹیم بنا دِتی گئی اے تے تحریک عد م اعتماد لیان توں پہلے ہوم ورک مکمل کراں گے۔ اوہناں نے ہور کہیا کہ پی ڈی ایم دیاں ساریاں جماعتاں نے اتفاق کیتا اے کہ اسیں تحریک عدم اعتماد لیاواں گے‘ حکومتی اتحادی جماعتاں توں درخاستاں کراں گے کہ اوہ ایکا ختم کرن۔ آگو پی ڈی ایم نے کہیا کہ 23 مارچ نُوں لانگ مارچ کرن دا فیصلا برقرار اے‘ پہلے کھیڈ کسے ہور دے ہتھ وچ سی‘ ہُن ویلا تے ماحول بدل چُکیا اے‘ وفاق توں لے کے صوبیاں تک جتھے ہو سکیا عدم اعتماد لیاواں گے‘ سندھ وچ نہیں لیاواں گے۔ قائد حزب اختلاف شہباز سریف نے کہیا کہ اسیں اپنے ولوں بھرویں کوشش تے جتن کراں گے‘ غربت تے بیروزگاری نے گھراں وچ ڈیرے لائے ہوئے نیں۔ایس توں پہلاں رانا ثناء اللہ نے میڈیا نال گل بات کردیاں ہویاں کہیا سی کہ ساڈے کول نمبر گیم پوری‘ تحریک عدم اعتماد کامیاب ہووے گی‘ تواریخ دا تعین خُفیا طور اُتے ہووے گا‘ سانوں امپائرز دی لوڑ نہیں‘ اپنے سیاسی ایجنڈے اُتے عمل پیرا آں‘ حکومت دا جانا پکّا اے تے سمجھ لوو ایہ جان دی تیاری کر رہے نیں۔ دوجے پاسے حکومتی میڈیکل بورڈ نے نواز شریف دیاں میڈیکل رپورٹاں نامکمل متھ کے رَد کر دتیاں۔ میڈیا رپورٹاں مطابق لندن وچ مقیم مسلم لیگ (ن) دے قائد تے پچھلے وزیراعظم نواز شریف دے ڈاکٹر دی رپورٹ اِک واری فیر رَد کر دِتی گئی تے حکومتی میڈیکل بورڈ نے نواز شریف دیاں میڈیکل رپورٹاں نُوں نامکمل متھ دِتا۔ میڈیکل بورڈ دا مؤقف اے کہ امریکی نژاد ڈاکٹر فیاض شاول دیاں رپورٹاں مکمل نہیں نیں‘ ڈاکٹر فیاض شاول نے صرف نواز شریف دی صحت اُتے تحریر گھلی اے‘ کسے میڈیکل ادارے یاں لیبارٹری دیاں میڈیکل رپورٹاں نال موجود نہیں۔ میڈیکل بورڈ نے محکما صحت پنجاب نُوں نواز شریف دیاں رپورٹاں اُتے تحریری طور اُتے اگاہ کر دِتا اے۔ 9 رکنی میڈیکل بورڈ نے پہلے وی نواز شریف دیاں رپورٹاں نامکمل متھیاں سن۔