اِک نویں کتاب ”انگریزی کِویں سکھیے؟‘……٭رویل کالم٭

اِک نویں کتاب ”انگریزی کِویں سکھیے؟‘……٭رویل کالم٭

انگریزی زبان نوں پوری دُنیا دی زبان مِتھیا جاندا اے۔پنجاب اندر پڑھیاراں نوں جس زبان نوں سکھن لئی اوکڑاں آندیاں نیں اوہ انگریزی زبان اِی اے،تے ایہدے کئی کارن نیں۔

دنیا دے جِنے وی تعلیم دے ماہر نیں اوہناں دا کہنا اے کہ ماں بولی وچ جِنی اَسانی نال تے چھیتی پڑھیاراں دے کنسیپٹ (Concept) کلیئر ہوندے نیں اونی اَسانی نال تے چھیتی کسے وی دوجی بولی وچ کلیئر نہیں ہوندے۔ ایہو اِی نہیں سگوں ماں بولی توں وکھ جے کسے دوجی زبان نوں سکھن لئی ماں بولی دااِی سہارا لیا جائے تے کم اَسان ہو جاندا اے۔

جدوں اسیں پنجابی توں انگریزی سکھن دی گل کرنے آں تے سانوں ایس موضوع اُتے کوئی وی کتاب پاکستان وچ نہیں لبھدی سی، ایہ وکھری گل اے کہ چڑھدے پنجاب وچ تے ایس حوالے نال کئی کتاباں موجود نیں پر پڑھیاراں دے گُرمکھی نہ جانن کارن ایہ کم اوہناں لئی اوکھا اے۔ پر ہُن ڈاکٹر کرامت مُغل ہوراں نے ”انگریزی کویں سکھیے؟“ ورگی کتاب لکھ کے پڑھیاراں دیاں اوکڑاں نوں اَسان کر دِتا اے۔

ڈاکٹر کرامت مُغل کہانیکار، ناول نگار، نقاد، پرچاکار،پنجابی سیوک ہون دے نال نال ترجما کار وی نیں۔ اوہ انگریزی زبان دیاں لکھتاں داپنجابی وچ وی ترجما کردے رہندے نیں۔ پنجابی کہانیاں دے ترجمے وچ اوہناں نے ”لاگوس توں اجنبی“ دا اک کہانی پراگا وی پنجابی اَدب نوں دان کیتا اے ایس دے نال نال ہیلن کیلر دے جیون دے حوالے نال وی اک کتاب بالاں لئی ”وڈیاں ہمتاں والی“ ہیلن گیر تھامپسن نوں وی پنجابی وچ ترجمایا اے۔

ڈاکٹر کرامت مُغل پنجابی پڑھیاراں دیاں اوکڑاں نوں اُستاد ہون وجھوں چنگی طرحاں سمجھدے نیں ایہو کارن اے کہ اوہ پڑھیاراں نوں پنجابی دے نال نال اوہ زبان وی سکھاندے رہندے نیں جس نال اوہ دُنیا دے ادب توں جانو ہو سکدے نیں تے ایس سلسلے وچ اوہناں دی اپروکت کتاب پنجابی پڑھن والیاں لئی انملی ثابت ہو سکدی اے۔ایس کتاب وچ انگریزی زبان سکھن لئی جو طریقے دَسے گئے نیں اوہناں نوں اَسان بیانن ڈھنگ نال بیانیا گیا اے تے اوہ اصطلاحواں ورتیاں نیں جو عام پرچلت نیں تے پڑھن والے نوں کسے طرحاں دی مشقت وچ نہیں پاندیاں نیں۔جویں اسم،فعل،حرف،کلما،جملا،فعل حال،ماضی،مستقبل ورگے لفظ بھاویں فارسی دے نیں پر اِک لمے چر توں پنجاب اندر بولے تے سمجھے جا رہے نیں جس کر کے اوہناں نوں ایس راہیں نویں زبان سکھاون دا چارا کرنا ای مناسب سی جو ایس دے لکھاری نے اپنایا اے تے ایہ اصطلاحواں وی کسے طرحاں اوپریاں نہیں جاپدیاں۔

کتاب وچ جُملے، قسماں تے کلام دے انگ، فعل، زمانے توں وکھ ڈایریکٹ ان ڈایرکٹ، واحد، جمع،مذکر، مونث،فعل معروف و مجہول تے روز ورتے جاون والیاں لفظاں دی انگریزی دے نال نال کجھ جملیاں نوں ترجمایا وی اے۔

کتاب ’رویل پبلیکشنز‘ لاہور ولوں چھپ چکی اے۔ جہدے کُل صفحے 120نیں تے مُل 300 رُپئے اے۔ ایہ کتاب ’سلیکھ بک میکرز لاہور‘ توں مل سکدی اے۔

)شکریے نال روزوار ”لوکائی“ توں(