پنجابی کلچر دیہاڑ ……٭رویل کالم٭

پنجابی کلچر دیہاڑ ……٭رویل کالم٭

وچکار صرف دو دن رہ گئے نیں‘ پنجابی کلچر دیہاڑ مناون نوں۔14 مارچ یعنی پہلی چیتر دے دن ایہ پورے پنجاب وچ گج وج کے منایا جاوے گا۔ سرکار ولوں ایس واری پچھلے سال نالوں ودھ کے کلچر دیہاڑ بارے مختلف تجویزاں پیش کیتیاں گئیاں نیں۔ سکولاں وچ وی پنجابی لباس پاون‘ دفتراں وچ پگ بنھن تے انج دِیاں ہدایتاں دِتیاں گئیاں نیں۔ میانوالی دے ڈسٹرکٹ ایجوکیشن دفتر ولوں ایس بارے جو ہدایتات دتیاں گئیاں نیں‘ اوہ کافی دلچسپ نیں۔ اوہناں وچ پنجابی لباس پگڑی‘ کھسے ورتن دے نال نال مردا نا سکولاں وچ ککڑ‘ بٹیر دیاں لڑائیاں‘ بنٹے کھیڈن تے ایہو جہے کھیڈاں دے نال نال زنانا سکولاں وچ ٹوپی والا برقعاپاون لئی وی آکھیا گیا اے۔ اجے شروع شروع دا معاملا اے تے سرکار نوں آپ وی پتا نہیں کہ کلچر دیہاڑ کویں منایا جاندا اے۔ جو وی ہووے‘ ایہ گل پکی اے کہ پنجابی کلچر دیہاڑ ایس واری پہلاں نالوں ودھ کے زور شور نال منایا جاوے گا۔

مادری زبان دیہاڑ وی ایدکیں پہلاں نالوں بہت بہتر انداز نال منایا گیا۔ کوئی دو درجن شہراں اندر تقریباں تے وکھالے ہوئے۔ رلتیاں دی گنتی وی پہلاں نالوں ودھ کے سی۔ ماں بولی دیہاڑ تے کلچر دیہاڑ وچ ودھ توں ودھ لوکاں دی رلت‘ پنجابیاں اندر جاگرتی ودھن دا ثبوت اے۔ جدوں پوری پنجابی قوم ایس بارے اِک سُر ہووے گی تاں پنجابی زبان دے حقاں دی منزل ساڈے ساہمنے ہووے گی۔

پنجابی دے کجھ سیوک تے آگو حضرات ایس سلسلے وچ مختلف تحفظات وی رکھدے نیں۔ اوہناں دے خیال وچ کلچر دیہاڑ دے نال ”پنجابی“ دی بجائے ”پنجاب“ دا لفظ بیوروکریسی دی سازش اے تے اوہ ایہدے اولھے وچ پنجاب اندر مختلف قسم دے کلچر جنم دے کے پنجاب دی ونڈ دی راہ ہموار کر رہے نیں۔ کجھناں دے خیال وچ کلچر دیہاڑ پہلی چیتر دی بجائے پہلی وساکھ نوں منایا جانا چاہیدا اے۔

اجہے سجناں دے خلوص تے نیت وچ کوئی شک نہیں پر کجھ معاملے ساہمنے رکھنے بہتر ہوون گے۔ وساکھ دا مہینا شروع ہوون نال گرمی و چ چنگا بھلا وادھا ہو جاندا اے۔ بعض واری تاں گھراں وچ پکھے وی چل پیندے نیں۔ کیہ بہتر نہیں کہ چنگے موسم وچ ایہ دیہاڑ منایا جاوے۔ اُنج وی بکرمی سال وچ پہلی وساکھ دے نال نال پہلی چیتر نوں نانک شاہی سال وچ سال دا پہلا دن ہون دا مان حاصل اے۔ بہار دا مہینا‘ پنجابی کلچر دی بہار وکھان لئی زیادا بہتر اے۔

جتھے تک ایس گل دا تعلق اے کہ بیوروکریسی‘ پنجاب دی ونڈ کرن لئی پنجابی کلچر دیہاڑ دی ورتوں کردی اے‘ ایہ عمل تاں کلچر دیہاڑ دے تصور توں وی بہت پہلاں دا جاری اے۔ کیہ اسیں اینے طاقت ور ہو گئے آں کہ بیوروکریسی یاں حکومت کولوں اپنی گل طاقت تے زور نال منوا سکیے؟ جس دن اسیں اینے جوگے ہو گئے‘ بیوروکریسی ساڈے کولوں پچھ کے پنجابی بارے ہر قدم چُکیا کرے گی۔ اجے تے جو دستیاب اے‘ پنجابی لئی ورتیے‘ کلچر دیہاڑ نوں اپنی من مرضی مطابق منائیے۔ رحیم یار خان‘ ڈیرا غازی خان تے پنجاب دے جنوبی شہراں وچ مادری زبان پنجابی دیہاڑ نے ثابت کر دتا اے کہ پنجابی جاگ گئے تاں پنجاب اندر صرف پنجابی زبان تے پنجابی کلچر ای نظر آوے گا۔

شکریے نال روزوار ”لوکائی“ توں

٭٭٭ ٭ ٭