kraamaat@gmail.com
+ +92 333-430-6384
نمائندا رویل
March 21, 2022
پاک ٹی ہاؤس وچ جَگت کہانی سناون دیہاڑ اُپر ہویا پنجابی کہانی دربار ، 13 کہانیکاراں نے اپنیاں کہانیاں سُنائیاں ۔۔۔۔۔٭رویل خبر٭
لاہور (علی عثمان باجوہ ) جَگت کہانی سناون دیہاڑ (ورلڈ سٹوری ٹیلِنگ ڈے) پاکستان وچ پہلی وار منا کے تاریخ رقم کیتی گئی۔
۲۰ مارچ نوں ہر سال منائے جاون والے ایس جَگت دیہاڑ دی شروعات سویڈن دے اک شہر “سِکسا” توں ۱۹۹۱ وِچ ہوئی سی۔ ۱۹۹۷ وچ آسٹریلیا نے وی ایہ دن منانا شروع کیتا۔ ناروے، ڈنمارک، فِن لینڈ ۲۰۰۲ وچ ایس دن نوں مناون دی ریت وچ شامل ہوئے_ ۲۰۰۴ نوں ایس دیہاڑ نوں جَگت کہانی سناون دیہاڑ مِتھ لیا گیا۔ایس دیہاڑ دا ہر سال اک تھیم (موضوع) دِتا جاندا ہے۔
۲۰۰۴ وچ ایس دا موضوع “پنچھی” سی۔
۲۰۰۵ وچ پُلاں بارے کہانیاں سُنائیاں گئیاں۔
۲۰۰۶ وچ چن بارےایسے طرحاں آوارہ گردی، گوانڈی، چانن تے پرچھاویں، پانی، رُکھ، بلاواں، خاہشاں دے ریجھاں، روپ بدلی (transformation)، سیانے بیوقوف ورگے موضوعات اگلے ورھیاں وچ آوندے گئے_ کرونا مہاماری دے چلدے ۲۰۲۱ نوں “نویں شروعات” دا سال متھیا گیا اور ایس ورھے یعنی ۲۰۲۲ وچ “گواچا لبھ گیا” (lost and found) دا تھیم رکھیا گیا ہے۔
پنجابی دے کہانی کاراں اتے سوجھواناں ایہ فیصلہ کیتا کہ ایس دیہاڑ نوں پنجابی کہانیاں راہیں منایا جاوےاج دے دور دے وڈے کہانی کار رَل بیٹھے تے محفل سجائی گئی کہانی کاراں نوں اسٹیج تے alphabetical order وچ بلایا گیا اور اک توں ودھ اک کہانی سُنن نوں لبھی
اک وجے توں لے کے چار وجے تک کہانیاں سُنائیاں گئیاں جہناں وچ بال کہانی وی شامل سی جہڑی نِکّے بالاں لئی پیش کیتی گئی۔ پنجابی زبان وچ مشاعرے اکثر ہوندے نے پر ایس دیہاڑ اُتے تیرھاں (۱۳) کہانی کاراں دا اکٹھیاں ہونا تے اپنیاں لکھتاں پیش کرنا پنجابی کہانی نوں ہُنگارا دیوے گا۔کہانی کاراں وچ انجم قریشی اعظم، اعجاز، افتخار وڑائچ کالروی ، الیاس گھُمن، پروین ملک، جاوید پنچھی، حمید رازی، ڈاکٹر سعید بھُٹا، صابر علی صابر، علی عثمان باجوہ، نرگس نور اتے نصیر احمد نصیر شامل سن۔
پنجاب ہاؤس اتے بھلیکھا میڈیا ہاؤس دے چئیرمین مدثر اقبال بٹ ہوراں ایس موقعے اُتے سارے کہانی کاراں نوں مبارکباد دتی تے نال ای بھلیکھا ولوں کیتے جاون والے اکٹھ کہ جہڑا کرتار پُر وچ ہووے گا دی دس پائی۔ ایس اکٹھ وچ بھارت تے پاکستان دوہاں پاسیاں دے پنجابی رلت کرن گے۔
الیاس گھمن صاحب نے اخیر وچ پنجابی ورثا پاکستان ولوں ساریاں دا دھن واد کیتا تے اخیری گل بات ایتھے مکائی کہ ایسے مہینے وچ دُلا بھٹی (عبداللہ بھٹی) شہیدی دیہاڑ اتے بھگت سنگھ شہیدی دیہاڑ گج وج کے منایا جاوے گا۔
لاہور دی ادبی تاریخ جد وی لکھی جاوے گی تے الیاس گھمن صاحب دا ایہ اپرالا سُنہری اکھراں نال لکھیا جاوے گا کہ جہناں پورے پاکستان وچ سبھ توں پہلاں ایہ دن مناون دا جتن کیتا اور میرے لئی وی خشی دی گل ہوے گی کہ میں اوہناں دے ایس کم وچ بانہ بیلی بنیا۔
محمد آصف خاں، راجا رسالو، استاد دامن، احمد راہی، مشتاق بٹ، احمد بشیر، مسعود کھدر پوش، سبط الحسن ضیغم اتے دوجے پنجابی سیوکاں تے ادیباں دا لایا ایہ بوٹا ہُن پھل دیون لگا ہے۔ ایس موقعے تے اوہناں سبھ نوں وی یاد کیتا گیاآس ہے پنجابی زبان اتے سُلیکھ اوہ مقام چھیتی حاصل کر لے گا کہ جس دی سبھ نوں اُڈیک ہے۔
٭٭٭٭٭
