kraamaat@gmail.com
+ +92 333-430-6384


استعفا نہں سرپرایز ۔۔۔۔۔٭رویل کالم٭


جمیل احمد پال March 24, 2022


استعفا نہیں سرپرایز ۔۔۔۔۔٭رویل کالم٭

وزیر اعظم دا ایہ بیان لگ بھگ سارے ای اخباراں دی شہ سرخی بن گیا کہ اوہ استعفا نہیںسرپرایز دین گے۔ اوہناں نے معمول مطابق ایہ وی آکھیا کہ اوہ مجرماں تے چوراں نال نہیں بیٹھن گے۔ نال ایہ دھمکاوا وی دتا کہ جے حکومت ڈِگ پئی تاں اوہ چین نال نہیں بیٹھن گے۔اوہناں نے ایہ گل ایس ضمن وچ آکھی سی کہ جے چوری دے پیسے نال حکومت ڈِگائی گئی تاں وڈا طوفان آوے گا۔ ایہ گلاں اوہناں نے وزیر اعظم ہاؤس وچ پرچاکاراں نال گل کردیاں آکھیاں۔

جیوں جیوں بے وساہی لہر دی پارلیمنٹ وچ پیشی دے دن نیڑے آوندے جا رہے نیںتیوں تیوں حکومتی وڈیاراں تے اپوزیشن والیاں دے مونہ وچ اگ دے بھانبڑ تیز ہوندے جا رہے نیں تے لگدا اےدوویں فریق ساریاں حداں ٹپ کے اک دُوجے دا ناں نشان وی دنیا توں غایب کرن نوں اُتارو ہوئے پھردے نیں۔ دوہاں دِھراں دے بیاناں توں ایس سماج اندر تیزی نال مکدی پئی رواداری تے تحمل مزاجی دا اندازا لایا جا سکدا اے۔ وزیر اعظم وی اسمبلی نالوں ودھ کے ایہدا جواب اسمبلی توں باہر دین نوں اتارو ہوئے پھردے نیں۔ اوہناں نے چوراں تے مجرماں نال نہ بیٹھن دی گل وی شاید مذاق نال ای کیتی اے۔ اوہناں دے آل دوال ہُن وی بہت سارے چور ڈاکو موجود نیں البتا حکمران جماعت وچ ہوون پاروں نیک پروین َثابت کیتے جا رہے نیں۔نیب وی اودوں ای جاگدا اے جدوں بندا حکمران جماعت دے نال نہ ہووے۔

بہتر سی کہ وزیر اعظم بے وساہی لہر دی پیشی سمے پارلیمنٹ ساہمنے اپنے سارے فیوض و برکاترکھ دیندے تے ممبراں نوں فیصلا کرن دیندے۔ ایہدے نالوں وی چنگی گل ایہ سی کہ اوہ سنگ چھڈ گئے اپنے ساتھیاں دی گنتی توں اندازا لا لیندےجے اوہ سادی اکثریت گوا بیٹھے نیں تاں استعفا دے کے اخلاقی جرئت دا وکھالا کردے۔ سونے تے سہاگا ایہ ہوندا کہ اوہ اپنیاں غلطیاں دا ااعتراف کردےقوم توں معافی منگدے تے آکھدے کہ اوہناں نے ساڈھے تن سالاں وچ سبق سکھ لیا اے تے جے اگوں موقع ملیا تاں اوہ ایہناں غلطیاں دی دُہرائی نہیں کرن گے۔ ایہ عمل اوہناں نوں ہیرو بنا دیندا تے ثابت کر دیندا کہ اوہناں نوں اقتدار دی بھُکھ نہیں سگوں اوہ لوکائی دی سیوا لئی ایس کھیتر وچ آئے سن تے ایہدا اخلاقی جواز گوا بیٹھن دے بعد سیٹ چھڈ کے پاسے ہو گئے نیں۔ ایہدے نال اوہناں دی مڑ چونکاری وچ وی کجھ نہ کجھ فایدا ہوندابھاویں اوہناں نے مہنگائی تے ہور کئی ڈھنگ نال لوکاں دیاں چیکاں اسمان تیکر اپڑا دتیاں نیں پر لوکائی اوہناں دی اخلاقی برتری ویکھ کے شاید اوہناں نوں فیر ووٹ دین دا رسک لے لیندی۔

پر وزیر اعظم نے اپنے عمل نال ثابت کر دتا کہ اقتدار دا نشاشرابہیروین یاں کسے وی نشے نالوں ودھ کے ہوندا اے تے ہر نشے وانگ دماغ اُتے پردا وی پا دیندا اے تے فیر بندا ایس نشے توں ساری عمر باہر نہیں آونا چاہندا۔

ٌ٭٭٭٭٭