قرآن وچ اللہ پاک حکم دیندا اے کہ چنگیائی دے نال کھلونا اے‘ برائی نال لڑنا اے:عمران خان……٭رویل خبر٭

اسلام آباد (نیوز ڈیسک) وزیراعظم عمران خان نے کہیا اے کہ میں چاہندا آں کہ پوری قوم 27 مارچ نُوں میرا ساتھ دیوے تے دَسّے کہ اسیں بدی دے نال نہیں آں سگوں نیکی د ے نال کھلوتے آں۔ اپنے اِک ویڈیو پیغام وچ وزیراعظم عمران خان نے قوم نُوں 27 مارچ دے جلسے دی دعوت دیندیاں ہویاں کہیا اے کہ قرآن وچ اللہ پاک حکم دیندا اے کہ چنگیائی دے نال کھلونا اے‘ برائی نال لڑنا اے۔ اوہناں دا کہنا سی کہ پچھلے 30 ورھیاں توں ڈاکوواں دا اِک ٹولا ملک وچ کرپشن کر رہیا اے تے ملک نُوں لُٹ رہیا اے ایہنے اکٹھے ہو کے پارلیمانی نمایندیاں دے ضمیر دیاں قیمتاں لائیاں نیں۔ اوہناں نے کہیا ایہ لوک عوامی نمایندیاں نُوں کھلے عام خرید رہے نیں‘ میں چاہندا آں کہ 27 مارچ نُوں پوری قوم میرے نال نکلے تے دَسّے کہ اسیں ایس ملک وچ جمہوریت دے خلاف‘ لوکائی دے خلاف تے قوم دے خلاف ہون والے جرم دی مخالفت کردے آں۔ عمران خان نے کہیا کہ ایہناں نُوں دسن کہ چوری دے پیسیاں نال جہڑے تُسیں عوامی نمایندیاں دے ضمیر خرید رہے او قوم ایہدے خلا ف اے۔ سارے پاکستان نُوں ایہ پتا ہونا چاہیدا اے کہ کے دی ہمت نہیں ہونی چاہیدی اے کہ اوہ ایس طرحاں ہارس ٹریڈنگ کر کے عوامی نمایندیاں دے ضمیر خریدے۔ ایس توں وکھ وزیراعظمع مران خان دی صدارت ہیٹھ سیاسی کمیٹی دا اجلاس ہویا جہدے وچ وزیراعظم نُوں سپریم کورٹ وچ صدارتی ریفرنس اُتے سنوائی بارے بریفنگ دِتی گئی‘ وزیراعظم نال قانونی ٹیم دی وی ملاقات ہوئی‘ ملکی سیاسی صورتحال‘ اتحادی جماعتاں تے ارکان نال رابطیاں دا جایزا لیا گیا۔ وسیلیاں دے مطابق حکومت نے قومی اسمبلی دے حوالے توں اپنی حکمت عملی تیار کر لئی اے۔ وزیراعظم دا کہنا سی کہ اسیں آخرتک ایس مافیا دا مقابلا کراں گے‘ تحریک عدم اعتماد کامیاب نہیں ہووے گی۔ وزیراعظم نے کہیا کہ ایہ اوہناں دی غلط فہمی اے کہ میں دباء وچ آ جاواں گا‘ 27 مارچ نُوں لوکائی دَسّے گی کہ اوہ کہدے نال اے۔