ساڈے کول وی اپوزیشن دے کجھ بندے نیں‘ اتحادی سوچ سمجھ کے فیصلا کرن:شیخ رشید……٭رویل خبر٭

لاہور (نیوز ڈیسک) وفاقی وزیر داخلا شیخ رشید نے کہیا اے کہ اپوزیشن دے کول ساڈے کجھ بندے نیں تے ساڈے کول وی اپوزیشن دے کجھ بندے نیں‘ اتحادی سوچ سمجھ کے فیصلا کرن‘ عثمان بزدار عمران خان نُوں چھڈ کے کدھرے نہیں جا رہے‘ملک وچ چوناں چھیتی وی ہو سکدیاں نیں‘ تحریک عدم اعتماد والے دن اپوزیشن نُوں وڈا سرپرائز ملے گا‘ جہڑے لوک پارٹیا بدل رہے نیں اوہناں نُوں پتا ہونا چاہیدا اے کہ پارٹیاں بدلن نال کوئی عزت نہیں ملدی۔ پاک فوج تے عدلیا دے خلاف سوشل میڈیا اُتے پوسٹ کرن والیاں دے خلاف کارروائی کیتی جاوے گی۔ لاہور وچ پریس کانفرنس کردیاں ہویاں شیخ رشید نے کہیا کہ اپوزیشن والے 25 یاں 26 تاریخ نُوں نکلن گے تے میں اسلام آباد انتظامیا نُوں کہیا اے کہ ایہناں نال رابطا کرن‘ اسیں 2000 رینجرز‘ 1000 ایف سی تے 9000 پولیس سنے 12 ہزار اہلکارسیکیورٹی اُتے مقرر کیتے نیں۔ اوہناں دا کہنا سی کہ جے لوڑ پئی تے 1000 ایف سی یاں اِک ہزار رینجرز ہور بلا لواں گے‘ ایہ کم اسیں سپریم کورٹ دی ہدایت اُتے کیتا اے کہ دوجاں جماعتاں نُوں جلسے دی اجازت دے دِتی اے‘ مسلم لیگ (ن) دی ہُن تک کوئی درخاست نہیں آئی‘ کل کوئی شرارت یاں کوئی مسئلا ہو جاوے تے وزارت داخلا ایہدی ذمے دار نہیں ہووے گی‘ قوم وچ اینا جذبا پہلے کدی نہیں ویکھیا‘ ایہ خُد داری دی لڑائی اے۔