kraamaat@gmail.com
+ +92 333-430-6384


" دِکھاوا"ــــ رویل کہانی


علی انور احمد December 22, 2019


وقار صاحب اپنے پِنڈ نوں آندے پئے سن۔

بڑے اَرام نال موٹرسایکل چلاندے ہوئے۔

اوہناں دے پِچھوں لوکی موٹرسایکل تے گڈیاں بھجاندے آندے تے شُوں کر کے لنگھ جاندے۔ اگوں آون والے وی اِنج تیزی وچ سن جوِیں کدھرے اگ لگی ہووے تے اوہناں ای جا کے بجھانی ہووے۔

اوہ ایہناں تیز رفتاری کرن والے لوکاں نُوں دِل ای دِل وچ بُرابھلاکہندے۔ روا روی وچ اوہناں دے مُونہوں گالھ وی نکل جاندی۔

”سانوں کیہ‘ آپے ڈِگن گے تے منکا بھناون گے۔“ اوہ بُڑبُڑاندے۔

اچان چک اوہناں دی نظر کیلے دے اِک چھِلڑ تے پئی جہڑا سڑک دے وچکار پیا ہویا سی۔

”جہالت دی انتہا اے بھئی۔ ایہ کسے ان پڑھ بے وقوف دی حرکت اے۔“ اوہناں سوچیاں فیر اوہ وی دُوجیاں وانگوں اوہ چھلڑ نظرانداز کردے ہوئے اکلے اکلے موٹرسایکل چلاندے ہوئے اپنے گھرول چلدے گئے۔

اوہناں نُوں کوئی کالھی نہیں سی۔

oooo

اوس دن اوہ شہر جاندے پئے سن۔

اوہناں نال اِک معزز پروہنا وی سی۔

اوہ پروہنا اوہناں دے علم‘ تربیت‘ اخلاق تے چنگے سبھادی بڑی سلاہنا کردا۔ وقار صاحب نے پروہنے نوں بساں دے اڈے تے چھڈ کے اپنے سکولے حاضر ہونا اے۔ اچان چک اوہناں نے بغیر دسے اکو واری موٹرسایکل نوں بریک ماری۔

پچھے بیٹھا پروہنا اک دم اوہناں دی کنڈ نال آ وجیا۔

رب رکھ گیا تے اوہدی جِیبھ دنداں تھلے آ کے ٹُکی نہ گئی۔

وقار صاحب موٹرسایکل روک کے تھلّے اُترے۔ دس بارھاں قدم پچھانہ ہٹے‘ سڑک دے عین وچکار پیا ہویا کیلے دا چھِلڑ چُکیاتے سڑک دے نال نیویں کھیت وچ سُٹ دِتا۔

”ساڈے لوکاں نوں پتانہیں کدوں کیلا کھاون دا ول آنااے“ اوہ پتا نہیں کہنُوں سُناندے پئے سن۔

”لوکاں نوں تمیز نہیں اے سانوں تاں اپنا فرض چیتے اے۔“

معزز پروہنا اوہناں نوں تعریفی نظراں نال ویکھدا رہیا۔

سکولاں وچ اج کل بڑی سختی سی۔

ٹایم دی بڑی سخت پابندی کروائی جاندی پئی سی۔

ایویں ای انکوایری شروع کر دِتی جاندی سی۔

تے وقار صاحب اوس دن واہوا کالھی وچ سن۔

٭……٭……٭