حق گوئی میرا ایمان اے ایہ ووٹ لین دی کوشش نہیں‘ پاکستان ہن اُٹھے گا تے اپنے نبیؐ دی ہر سنت اُتے چلے گا ……٭رویل خبر٭

مانسہرا (نیوز ڈیسک) وزیراعظم عمران خان نے کہیا اے کہ 3 چوہے رَل کے میرا شکار کرن آ رہے نیں میں ایہناں نُوں ہراواں گا۔ ٹھاکرا سٹیڈیم مانسہرا وچ عوامی اجتماع نال خطاب کردیاں ہویاں وزیراعظم عمران خان دا کہنا سی کہ میں ہر جلسے وچ کہندا آں کہ فضل الرحمان نُوں ڈیزل نہیں کہواں گا‘ پر میں کیہ کراں میں جدوں تقریر لئی کھلوندا آں تے پنڈال وچ کھلوتی لوکائی ڈیزل دے نعرے لاندی اے‘ میں اپنی حکومت دے ہر چنگے تے بُرے ویلے وچ کوشش کیتی کہ ڈیزل دی قیمت گھٹ کراں۔ وزیراعظم دا کہنا سی کہ اللہ تے رسول گواہ نیں کہ ووٹ لین لئی مذہب نُوں استعمال نہیں کردا‘ میں اپنے ووٹ لئی کسے دا ناں نہیں لیندا نہ کسے دا ناں ایس لئی لیندا آں کہ میرا ناں وڈا ہووے‘ میں اوہ آں جہڑا کرکٹ دی دنیا دا ہیرا اے‘ میں تہانوں اپنے تجربے توں سکھانا چاہندا آں کہ صحیح راہ کہڑا اے تے ناکامی دا راہ کہڑا اے‘ جدوں اسیں نماز پڑھدے آں تے اللہ توں منگدے آں کہ اللہ اوس راہ اُتے چلا جہدے اُتے تیریاں نعمتاں نیں اوہدے اُتے نہ چلا جہدے وچ تباہی تے تیرا غضب اے۔ عمران خان نے کہیا کہ لوکاں دے ضمیر نُوں خریدن لئی 20 توں 25 کروڑ دی آفر کیتی جا رہی اے‘ ساڈے رکن قومی اسمبلی صالح محمد نُوں اپوزیشن ولوں 25 کروڑ رُپئے دی پیشکش ہوئی جہنوں اوہناں نے ٹھکرا دِتا‘ جدوں اوہناں توں کوئی پیسے نہیں لیندا تے ایہ چوہے رَل کے تہانوں بلیک میل کردے نیں‘ ایہ اوہ ویلا ہوندا اے کہ مشکل ویلے وچ تُسیں کہدے نال کھلوتے او‘ سوکھے راہ اُتے تے سارے چلد ے نیں‘ 3 شیواں واضح نیں جنا پیسا اے اوہ اللہ دے ہتھ وچ اے‘ عزت تے ذلت اللہ دے ہتھ وچ اے‘ جہڑے سمجھدے نیں کہ انسان انسان نُوں ذلیل کر سکدا اے‘ ایہو جہیا کجھ نہیں اے کیوں جے ایہ سبھ اللہ نے اپنے ہتھ وچ رکھیا اے‘ اللہ تعالیٰ قرآن وچ کہندا اے کہ جہڑے لوک ایمان لے آئے اوہناں دے دل توں خوف ختم کر دیندا آں‘ جہڑے بے ایمان ہوندے نیں اوہ بزدل تے کمزور ہوند ے نیں‘ اللہ نے میر ے توں تے میری حکومت توں اوہ کم لیا جو 50 ورھیاں وچ کوئی حکومت نہ کر سکی‘ اسیں یو این وچ ریزولیشن پا س کروائی‘ ہُن 15 مارچ نُوں ہر سال یو این وچ اسلامو فوبیا دا دیہاڑ منایا جاوے گا۔ عمران خان نے کہیا کہ حق گوئی میرا ایمان اے ایہ ووٹ لین دی کوشش نہیں‘ پاکستان ہن اُٹھے گا تے اپنے نبیؐ دی ہر سنت اُتے چلے گا۔ وزیراعظم دا کہناسی اپوزیشن والے چاہندے نیں کہ جویں اوہناں نُوں مشرف نے این آر او دِتا سی تے کرپشن دے کیسز معاف کیتے سن عمران خان وی ایہناں نُوں معاف کر دیوے‘ جس دن میں ایہناں دے کیسز معاف کیتے تے پاکستان نال سبھ توں وڈی غداری ہووے گی‘ تحریک عدم اعتماد ایسے لئی شروع کیتی گئی کہ ایہ لوک بچ جان۔ مینوں چوہیاں اُتے تھوڑا ترس آ رہیا اے‘ ایہ 3 چوہے جہڑے میرا شکار کرن نکلے نیں میں ایہناں دا شکار کراں گا تے ایہناں نُوں شکست دواں گا۔ عمران خان نے کہیا کہ چوہا نمبر ون شہباز شریف نے شیروانی سلوا لئی سی تے وزیراعظم بنن دے خاب ویکھ رہیا سی تے کَہ رہیا سی کہ جے میں عمران خان دی تھاں ہوندا تے امریکا نُوں ناراض نہ کردا‘ میں تے کوئی وی بوٹ ویکھاں پالش کر دیندا آں‘ اج توں شہباز شریف دا ناں چیری بلاسم رکھ دِتا اے‘ ہُن شریف خاندان دے ملک نُوں لُٹن دے دن چلے گئے‘ تے شہباز شریف نے جہڑی شیروانی سلوائی سی اوہ کسے ہور نُوں دے دین‘ ہُن ایہ لوک لندن وچ ای سیاست کرن گے‘ تے تھوڑے عرصے بعد انگلینڈ والے پاکستان توں قرضے منگیا کرن گے‘ کیوں جے ایہ اوس ملک دا وی دیوالیا کڈھ دین گے۔ وزیراعظم دا کہنا سی کہ میں قوم نُوں دعوت دیندا آں کہ اوہ نکلن تے چوہیاں نُوں دَس دین کہ اسیں امر بالمعروف دے نال کھلوتے آں‘ تے جہنے قوم دی معیشت نُوں تباہ کیتا‘ لوکائی دا پیسا چوری کیتا تے باہر دے ملکاں وچ گھلیا‘ اوہدی قبر کڈھاں گے‘ اوہناں دی قبر اُتے نواں پاکستان کھڑا ہووے گا‘ اسیں مثال بننا اے ایہو جہیا نظام لیانا اے جہڑا ایس ملک نُوں دنیا دے ترقی یافتا ملکاں وچ کھڑا کرے گا۔ اوہناں نے کہیا کہ اللہ نے اجازت نہیں دِتی کہ جدوں حق تے باطل دی جنگ ہووے تے بندا پچھے کھلووے تے کہوے کہ میں نیوٹرل آں‘ ساڈا معاشرا ایس ویلے امر بالمعروف اُتے نہیں چل رہیا‘ ایہدے اُلٹ ہور ملکاں وچ لوکائی تے میڈیا بدی تے برائی دے خلاف کھلو جاندے نیں‘ جد کہ ایتھے کسے دے چپڑاسی دے اکاؤنٹ توں کروڑاں رُپئے نکلن تے فیر وی لوک اوہنوں بُرا نہیں کہندے‘ اِک بھگوڑا ملک توں نَس جاوے فیر وی اوہ لوکاں دا لیڈر ہووے‘ جے ایتھے امربالمعروف دا معاشرا ہووے تے لوکائی تے کیہ ایہدی پارٹی وی ایہنوں چھڈ دیوے‘ ایہ ایس وجھا توں اے کہ اسیں اللہ دی نہیں سُندے۔عمران خان نے کہیا کہ میں چیلنج کردا آں کہ پاکستان دی تواریخ وچ ایہناں ساڈھے 3 ورھیاں وچ جہڑی کمکاری ایس حکومت نے وکھائی‘ کسے حکومت نے 50 ورھیاں وچ نہیں وکھائی‘ ساڈی معیشت ویکھ لوو‘ ساڈا ٹیکس ویکھ لوو ایس عرصے وچ سبھ توں دھ ٹیکس جمع ہویا‘ ساڈیاں فصلاں دی تواریخی پیداوار ہوئی اے‘ اسیں کساناں دا دھیان رکھیا تے اوہناں نُوں اوہ قیمت دِتی جہڑی پہلے دی نہیں دِتی گئی‘ ساڈی انڈسٹری چل پئی اے‘ آئی ٹی انڈسٹری 75 فیصد اگے ودھی اے‘ ایماندار حکومت دا فرق ایہ اے کہ ریکوڈک اُتے پاکستان نُوں 2000 ارب ڈالر دا جرمانا ہویا سی‘ پر مینوں فخر اے کہ 3 ورھیاں دی مسلسل جدوجہد دے بعد اج اوہی کمپنی واپس آ گئی اے جہنے ساڈے اُتے کیس بنایا سی‘ ہُن اوہ ایسے منصوبے اُتے 9 ارب ڈالر سرمایا کاری کرے گی‘ پاکستان وچ ڈالر آن گے‘ بلوچستان ترقی کرے گا‘ ساڈیاں سڑکاں ویکھ لوو تحقیق کر لوو کہ ساڈی حکومت وچ سڑکاں دا تخمینا کیہ اے تے ماضی وچ ایہناں دا تخمینا کیہ سی‘ اسیں قوم دے 1000 ارب رُپئے بچائے تے ڈبل سڑکاں بنائیاں‘ ریلوے نُوں تواریخ وچ پہلی وار کسارے توں نفع اُتے لے آئے آں‘ اسیں ماضی وچ بجلی تے گیس اُتے کیتے گئے معاہدے دی نسبت نویں معاہدے کر کے 700 ارب رُپئے قوم دے بچائے۔