قانون تے آئین راویت توں اُچا اے: شہباز شریف۔مقابلے توں نَسیا جا رہیا اے: بلاول زرداری ……٭رویل خبر٭

اسلام آباد (این ایل آئی) قومی اسمبلی وچ اپوزیشن لیڈر شہباز شریف نے سپیکر قومی اسمبلی نُوں خبردار کیتا اے کہ جے پیر والے دن کوئی غیر آئینی عمل دُہرایا تے فیر ہر حربا استعما ل کراں گے تے دما دم مست قلندر ہووے گا جد کہ بلاول بھٹو دا کہنا سی کہ اسمبلی دے آندے سیشن وچ عمران خان پچھلے وزیراعظم ہو جان گے۔ قومی اسمبلی اجلاس دے بعد پارلیمنٹ ہاؤس دے باہر میڈیا نال گل کردیاں ہویاں شہباز شریف نے کہیا کہ سپیکر نے فیر پی ٹی آئی دے ورکراں وانگوں قانون تے روایتاں نُوں پیراں ہیٹھ مدھ دِتا‘ 8 مارچ نُوں قرار داد جمع کروائی گئی جہدے بعد 14 دن وچ سپیکر اجلاس سدن دا پابند سی‘ 22 تاریخ نوں تاریخ مُکنی سی‘ او آئی سی دا اجلاس 22 تے 23 نُوں سی‘ اسیں ڈنکے دی چوٹ اُتے کہیا کہ ایہناں دناں وچ لانگ مارچ کراں گے نہ احتجاج‘ اوہ ساڈے پروہنے نیں۔ اوہناں نے کہیا کہ سپیکر نُوں کیہ مشکل سی اوہ 21 مارچ توں پہلے اجلاس سد سکدے سن‘ ایہ قانونی معالا سی پر سپیکر نے عمران نیازی نال رَل کے سازش کیتی‘ اوہ آرٹیکل 6 دے مرتکب ہوئے نیں۔ شہباز شریف دا کہنا سی کہ میں فاتحہ خوانی دے بعد پوائنٹ آف آرڈر اُتے کھڑا ہویا‘ گل تے دور دی گل‘ سپیکر نے ویکھنا وی گوارا نہ کیتا‘ اوہ اُٹھ کے چلے گئے‘ سپیکر دا ایہ کردار تواریخ وچ کالے لفظاں وچ قایم رہوے گا۔ اوہناں نے ہور کہیا کہ ممبران دی فاتحہ روایت اے پر قانون تے آئین راویت توں اُچا اے‘ اج بہت اہم موضوع سی‘ عدم اعتماد اُتے ووٹنگ ہونی سی‘ روایتاں اپنی تھاں پر قانون دی پابندی کردیاں ہویاں تحریک نُوں ٹیک آپ کردے تے ووٹنگ کرواندے‘ اوہناں نے ساڈی اِک نہ سُنی‘ سپیکر نے پاکستان دی تواریک وچ اِک ایہو جہیا گھناؤنا کردار ادا کیتا جہنوں پوری قوم ہمیشا بُرے لفظاں وچ یاد رکھے گی۔ اپوزیشن لیڈر دا کہنا سی کہ پاکستان تواریخ دے اہم موڑ اُتے اے‘ قوم دی نظر پارلیمان اُتے لگی اے پر تُسیں دھاندلی دھونس راہیں آئین نُوں مجروح کرو تے اپنی من مانی کرو ایہدی اجازت نہیں دِتی جا سکدی‘ ہُن پیر والے دن اجلاس دُبارا سدیا اے‘ ڈنکے دی چوٹ اُتے کہندے آں سپیکر نے فیر ایہو جہیا عمل کیتا جہڑا غیر آئینی ہویا تے اسیں ہر آئینی قانونی تے سیاسی حربا استعمال کراں گے تاں جے عدم اعتماد دی حرمت نُوں برقرار رکھیے۔ شہباز شریف نے کہیا کہ اسد قیصر عمران نیازی دے سٹوج نیں‘ وارننگ دیندا آں پیر والے دن ایس طرحاں دی حرکت کیتی تے ساڈے توں کوئی نہ پُچھے۔ ایس موقع اُتے بلاول زرداری نے کہیا کہ وزیراعظم مقابلے توں نَس رہے نیں‘ ایہ پہلی وار نہیں ہویا‘ فاتحہ دا بہانا سی‘ جون 2012 وچ جدوں وزیراعظم دا الیکشن ہونا سی اودوں وی فوزیہ وہاب دا انتقال ہویا پر اسیں فاتحہ پڑھی پر جہڑی آئینی ذمے داری سی‘ وزیراعظم دا الیکشن اوہ وی پوری کیتی پر سپیکر عمران دے سہولت کاربن گئے نیں۔ اوہناں نے کہیا کہ عدم اعتماد پیش کیتی تے دن وچ ای خوف نظر آیا‘ سندھ ہاؤس اُتے حملا کیتا گیا‘ ایہ اوہ حربا استعمال کر رہے نیں کہ کسے نہ کسے طریقے نال ایہ نَس سکن‘ ایہ کہو جہیا کپتان اے جہڑا پچ چھڈ کے نَس رہیا اے پر اسیں متحد آں‘ اسیں ایہناں نُوں نَسن نہیں دواں گے تے ایہ کدوں تک نَس سکدے نیں‘ عد م اعتماد ساڈا جمہوری حق اے‘ ایہ اپنی اکثریت گوا چکے نیں‘ہُن جویں ای اگلا سیشن شروع ہووے گا عمران خان پچھلے وزیراعظم بن جان گے۔