ترقیاتی منصوبیاں واسطے عثمان بزدار نال صوبے دے وزیراں نال ملاقاتاں ……٭رویل خبر٭

لاہور (نیوز ڈیسک) وزیر اعلا پنجاب سردار عثمان بزدار نال صوبائی وزراء تے اراکین پنجاب اسمبلی نے وکھریاں وکھریاں ملاقاتاں کیتیاں جہدے وچ سیاسی امور تے ترقیاتی منصوبیاں دے بارے وچ گل بات کیتی گئی۔ وزیر اعلا عثمان بزدار نے منتخب نمایندیاں نُوں اوہناں دے حلقیاں دے مسئلے چھیتی حل کروان دی یقین دہانی کروائی۔ ملاقاتاں وچ صوبائی وزراء تے اراکین پنجاب اسمبلی نے وزیر اعلا عثمان بزار اُتے بھرویں اعتماد دا اظہار کیتا۔ وزیر اعلا عثمان بزدار نے ایس موقع اُتے گل بات کردیاں ہویاں کہیا کہ ترقی مخالف عناصر پراپیگنڈے راہیں لوکائی نُوں گمراہ نہیں کر سکدے۔ اسیں لوکائی دی خدمت کر رہے آں تے مخالفین بے بنیاد الزاماں دی سیاست۔ ملک نُوں استحکام دی لوڑ اے‘ انتشار دی نہیں۔ موجودا حالات وچ اپوزیشن جماعتاں ڈیڈھ انچ دی مسیت بنا کے منفی سیاست کر رہیاں نیں۔ اوہناں نے کہیا کہ وزیراعظم دی قیادت وچ اسیں سبھ متحد آں‘ وزیراعظم عمران خان نے قوم نُوں عزت نال جینا سکھایا اے تے پوری قوم وزیراعظم عمران خان دے پچھے کھلوتی اے‘ 27 مارچ دا جلسا اپوزیشن دے خلاف عوامی ریفرنڈم ثابت ہووے گا‘ اپوزیشن انتشار دی سیاست کر کے ملک نُوں عدم استحکام نال دوچار کرنا چاہندی اے۔وزیر اعلا عثمان بزدار نے کہیا کہ جنوبی پنجاب صوبے دا بل تحریک انصاف دی حکومت دا تواریخ ساز اقدام اے۔ جنوبی پنجاب صوبے دا بل ساڈی حکومت دے اِک ہور وعدے دی تکمیل ول ٹھوس قدم اے تے ان شاء اللہ پی ٹی آئی دی حکومت جنوبی پنجا ب صوبا بنائے گی۔ اوہناں نے کہیا کہ جنوبی پنجاب سیکرٹریٹ دا قیام تے مکمل آپ مختاری دا اعزاز وی ساڈی حکومت نُوں حاصل اے۔