مُکھ وکھالی تقریب تے ماں بولی پنجابی کانفرنس ۔۔۔۔٭رویل خبر٭

چھبیل پور ، ڈسکہ(ڈاکٹر اکبر علی غازی) بھیل انٹرنیشنل ادبی سنگت نے ضلعی بار کونسل ننکانا صاحب وچ اک اُچ کوٹی اکٹھ منعقد کیتا۔ ایس اکٹھ دے کئی پکھ سن۔ پہلے حصے وچ مکھ وکھالی سی تے دوجے حصے وچ لکھاریاں نوں شیلڈاں، میڈل تے کتاباں دے تحفے پیش کیتے گئے۔ ایس حصے وچ چونویاں پروہنیاں نوں جناح کیپاں، پگاں تے تیویاں نوں چُنیاں پوائیاں گئیاں۔ ایس اکٹھ دی اک نویکلی گل ماں بولی پنجابی دی کانفرنس دا پربندھ سی۔

اک اُچیچے پروہنے مخدوم قاری سید شوکت حسین ہوراں دی تلاوت کلام پاک توں اکٹھ دا مڈھ بنھیا گیا تے ایس توں بعد چار نعتاں تے اک عارفانہ کلام پیش کر کے سٹیج سجایا گیا۔ کجھ نعتاں نے تے روح تک نوں سرشار کردتا۔ اصولی طور تے کجھ ہور سجن وی نعتاں سنناں تے سنانا چاہندے سن پر پروگرام دی نوعیت نوں ساہمنے رکھدیاں ہویاں معافی منگی گئی تے پہلی کتاب دی مکھ وکھالی دا کم ٹوریا گیا۔ ڈاکٹر ہارون الرشید تبسم ایس اکٹھ دے پردھان سن جدوں کہ محمد اویس معصومی، ڈاکٹر محمد علی انجم، پروفیسر صغیر آسی، دلبر مولائی، پروفیسر سید شبیر حسین شاہ زاہد، سردار محمد اکرم بُٹر، ڈاکٹر مشرف حسین انجم، عروس فاروقی، پروفیسر عاشق رحیل، صفدر علی حیدری، ڈاکٹر سید مشتاق مہدی، چوہدری محمد انور زاہد ایڈووکیٹ، صادق علی زاہد، رانا محمد اعظم خان ایڈووکیٹ، ملک علی احمد نول ایڈووکیٹ، ڈاکٹر حفیظ احمد، ڈاکٹر احسان اللہ طاہر بٹ تے ڈاکٹر اکبر علی غازی اُچیچے پروہنے سن جدوں کہ اعزازی پروہنیاں وچ استاد نذر حسین نذر، علامہ یونس نوشاہی تے علامہ یاست علی مجددی سن۔

سب توں پہلے ”ادبی ستارے“ دی مکھ وکھالی کیتی گئی۔ ایہ کتاب بھیل ادبی سنگت دی اپنی کھوج دے سٹے وچ سامنے آئی اے۔ جہدے لئی سنگت دے صدر تے روح رواں زاہد اقبال بھیل تے ایہناں دے سجّے ہتھ رائے محمد اعظم جنرل سیکرٹری بھیل ادبی سنگت نوں مبارک باد پیش کیتی جاندی اے۔ بلا شبہ ڈاکٹر مشرف حسین انجم ہوراں دی شخصیت تے فن دے حوالے نال ایہ تخلیق اک چنگا وادھا اے۔ ایس توں بعد ”سیف مہریہ بر فتنہ مرزائیہ“ دی مکھ وکھالی کیتی گئی۔ ایہ کتاب لکھی تے پیرسید مہر علی شاہ گولڑوی ہوراں نے سی پر ایہدا ترجما اردو وچ صادق علی زاہد کیتا تے چھپوایا اے۔ فتنہ مرزائیہ اُتے ایہ کتاب اک جامع کوشش اے جہدی اہمیت ہر دن ودھ رہی اے۔تیجی کتاب بھیل ادبی سنگت ولوں چھپن والے سالانہ مجلے ”قلم و قرطاس“ دی نویں اشاعت سی۔ ایہ رسالہ وڈی تختی دے 160صفحیاں اُتے مشتمل اے جہدے وچ وڈ مُلیاں تحریراں شامل نیں۔ ایہناں تناں کتاباں اُتے پروہنیاں نے اپنے اپنے وچار سانجھے کیتے۔ کجھ سجناں نے گل کجھ لمی کیتی پر مسئلہ اینا سنجیدہ سی پئی لمی گل وی سواد دے رہی سی۔ایس توں بعد شیلڈاں، میڈل، پگاں، چُنیاں تے جناح کیپاں ونڈن دا سلسلا شروع کر دتا گیا۔ ایس سلسلے وچ 178شیلڈاں، 44میڈل، 12پگاں، 12چُنیاں تے 12جناح کیپاں ادیباں تے شاعراں نوں پیش کیتیاں گئیاں۔ حکیم گل شیر گُل آنند راجپوت ہوراں نوں وی جناح کیپ ملی۔ اوہناں ہمیشہ جناح کیپ پائی اے تے جناح صاحب دی اک سوٹی جیہڑی ایہناں دے دادا جی ہوراں نوں حضرت جناح صاحب کولوں ملی سی سینے نال لا کے رکھی ہوئی اے۔شیلڈاں تے میڈل ونڈن دا سلسلہ جاری سی جے ”ماں بولی پنجابی دے ودھاء تے رواج لئی بیٹھک“ دے عنوان نال اعلان کیتی ہوئی کانفرنس شروع کر دتی گئی۔ ایہدے وچ ڈاکٹر احسان اللہ طاہر ہوراں سب توں پہلاں گل بات کیتی تے ویکھن سنن والیاں نوں دسیا پئی ماں بولی دی پڑھائی لکھائی ات ضروری اے۔ معاشرے دی ہر پدھر تے ماں بولی پنجابی بولنی چاہی دی اے۔ ایس توں بعد ڈاکٹر اکبر علی غازی ہوراں گل بات کیتی تے منگ کیتی پئی پنجاب دیاں سکولاں وچ مڈھلی پڑھائی پنجابی وچ کروائی جائے۔ جنی دیر تک پنجابی زبان نوں ذریعہ تعلیم نئیں بنا دتا جاندا اونی دیر تک ہر جماعت وچ گھٹو گھٹ اک پنجابی کتاب یا قاعدہ ضرور لوا دتا جائے۔نال ای ایہناں بینتی کیتی پئی ہر پنجابی جدوں وی کسے دوجے پنجابی نال گل بات کرے پنجابی وچ کرے۔ پشتون بھرا دفتراں وچ وی آپس وچ پشتو ای بولدے نیں تے سندھی بھرا وی کسے ہور زبان دی لوڑ نئیں سمجھدے۔پنجابی زبان وچ وادھا ساڈی عزت وچ وادھا اے۔ جنج سندھ وچ سندھی تے کے پی کے وچ پشتو لاگو اے اُنج ای پنجاب وچ پنجابی لاگو کیتی جائے۔ سانوں اپنی زبان تے رہتل اُتے فخر کرنا چاہی دا اے۔ ایس حصے دے پردھان ڈاکٹر حفیظ احمد سن جنھاں ویلا بہتا ہوجان دی وجہ توں اپنے ویلے دی قربانی دے دتی۔ ایس کانفرنس توں بعد ایوارڈ ونڈن دا کم فیر شروع کر دتا گیا۔ اکٹھ دے آخر تے پروہنیاں نوں ان پانی پیش کیتا گیا تے گروپ فوٹو بنائے گئے۔

ایہ اک وڈا پروگرام سی جیہڑا بڑے چر تک یاد رہوے گا۔ ایس پروگرام وچ اک ہور سچجا کم ایہ ہویا پئی زاہد اقبال بھیل ہوراں کھلے دل تے روشن دماغ دا ثبوت دتا۔ اوہناں اک توں ودھ کتاباں گھلن والیاں سجناں دی اک کتاب نوں تے بھیل انٹرنیشل ادبی سنگت ولوں ایوارڈ دتا تے باقی کتاباں دوجیاں ادبی تنظیماں نوں گھل دتیاں۔ اوہناں ادبی تنظیماں نے اپنی اپنی تنظیم ولوں شیلڈاں بنا کے زاہد اقبال ہوراں تک اپڑا دتیاں۔ ایہ ای وجہ سی جے کجھ سجناں نوں اک توں ودھ سگوں باراں کتاباں گھلن والے نوں وکھ وکھ تنظیماں ولوں باراں ایوارڈ وی ملے۔ ایہ کم ویکھ کے کجھ سجناں نوں بھلیکھا پیا پئی بار کونسل وچ ایوارڈاں دی لوٹ سیل لگی ہوئی اے پراصل گل ایہ سی۔ کسے ہور انعام ونڈن والی سنگت وچ ایہ دریا دلی کتے ویکھن وچ نئیں آئی۔راقم جیہڑا کہ بھیل انٹرنیشل ادبی سنگت ضلع سیالکوٹ دا ضلعی صدر وی اے نوں ایس اکٹھ وچ ”نعت بھیالی سیالکوٹ“ اُتے بڑے آدر نال گولڈ میڈل دتا گیا تے پگ بنھی گئی۔ اللہ کرے لکھن لکھان والیاں دا حوصلہ ودھان والے لوک زاہد اقبال بھیل ہوراں دی ریس کر کے ایس پاسے ددھ دے رہن تے کتاباں لکھن والیاں دا مان ودھاندے رہن۔ ایہناں لوکاں دا ایہ آہر ادب دی انملی سیوا اے۔