kraamaat@gmail.com
+ +92 333-430-6384


گُڈی ۔۔۔۔۔۔٭رویل کہانی٭


لکھاری :سمرسٹ ماہم /ترجماکار :ثروت سہیل July 22, 2022


گُڈی ۔۔۔۔۔۔٭رویل کہانی٭

لکھاری :سمرسٹ ماہم /ترجماکار :ثروت سہیل

The kite

By

Somerset Maugham

مینوں پتا اے کہ ایہ بڑی اوپری جہی کہانی ای ۔

مینوں آپ وی ایہدی سمجھ نہیں آئی تے جے میں ایہنوں لکھ دیاں تے مینوں بس ماڑی جہی امید اے کہ ایہدی کوئی چنگی شکل ساہمنے آوے دی، یاں فیر ایہ کہ کوئی پڑھن والا جہڑا ایہو جہی اوکھی تے گنجل انسانی فطرت دا واقف ہووے اوہ ایہدی کوئی وضاحت مینوں دیوے کہ مینوں وی سمجھ آ جاوے۔ ایہدے وچ تے شک نہیں کہ ایہدے وچ کجھ فرائیڈین اے۔ میں فرائیڈ نوں تے کجھ اوہدے ساتھیاں نوں واہوا چوکھا پڑھ لیا اے، تے سواد دی گل اے وے کہ ہن میں جدوں ایہنوں لکھن دی نیت کر لئی اے تے فیر ہن میں مڑ کے ماڈرن لائبریری نوں پھرولیا ، ۔(جتھے ایہدے پہلے تے جڑویں کم پئے ہوئے نیں)۔ ایہ اک بڑا وڈا کم سی کیوں جے اوہ بڑا خشک اے، تے تھوڑی گل لئی وی چوکھے لفظ ورتدا اے اوہ گل نوں بڑا لمکاندہ اے، تے اوہ سختی جہدے نال اے دعوا کردا اے کہ اے نظریہ دین والا اوہ پہلا بندا اے، ایہدے وچ بڑا غرور تے دوجیاں لئی ، جہڑے اس میدان وچ کم کرن والے نیں تے غلطی نال سائینسداں بن گئے نیں ،اوہناں لئی بڑا ساڑا جاپدا اے۔ مینوں پک اے کہ اوہ بھلے مانس لوک سن۔ جویں سانوں پتا اے کہ بندے وچ تے لکھاری وچ اکثر بڑا فرق ہوندا اے۔ لکھاری کئوڑا، کھروا ، تے ظالم ہو سکدا اے، جدوں کہ بندا ایڈا تابع فرمان تے مَٹھا ہوندا اے کہ کسے ہنس نوں وی نہیں تراندا۔ پر اے معاملا تے ناں ایدھر اے تے ناں اودھر۔ مینوں تے فرائیڈ دیاں لکھتاں فیر توں پڑھ کے وی کوئی ایسی شے نہیں لبھی جہڑی ، میرے دماغ وچ اٹکی گل اُتے چانن پا سکے۔ میں صرف حقیقت بیان کراں دا تے بس اوتھے ای چھڈ دیاں دا۔

سبھ ھ توں پہلاں تے میں ایہ گل دس دیاں کہ ایہ میری کہانی نہیں تے ناں ای میں ایہدے وچ موجود کسے بندے نوں جانناں واں۔ اک شام نوں میرے یار نیڈ پریسٹن نے ایہ مینوں سنائی تے اوہنے مینوں ایس لئی دسی کہ اوہ ایہناں حالات نال کنج نبڑے ، تے اوہنے سوچیا، جہڑا کہ غلط سی، کہ میں اوہنوں ایس بارے کوئی مت دیاں گا تے اوہدی مدد ہو جائے دی۔ پچھلی اک کہانی وچ میں ایہ دسیا سی ، جہڑا کہ میں سوچیا سی، کہ پڑھن والیاں نوں نیڈ پریسٹن دا پتا ہونا چاہی دا اے ، تے فیر ہن بس میں ایہ یاد کرانا اے کہ میرا یار ورم و ڈ سکرب تے اک جیل دا ملاقاتی سی۔ اوہ اپنا کم بڑا سنجیدہ ہو کے کردا سی تے قیدیاں دیاں مصیبتاں نوں اپنا سمجھدا سی۔ اسیں دوویں کیفے رائل تے بیٹھے رات دی روٹی پئے کھاندے ساں، اوہدے نیویں لمیں کمرے وچ اوہدی بے تکی پر کشش والی سجاوٹ سی، جہڑی پینٹراں دا جیویں دل کیتا کر دتی سی تے ہن کیفے رائل دی خاص شے اوہ ای نشانی رہ گئی سی ؛ تے اسیں ، اوتھے بہ کے کافی تے وہسکی پئے پیندے ساں، تے جہڑا نیڈ سی اوہ اپنے ڈاکٹردی دتی ہوئی مت دے بر خلاف ودھیا سگرٹ خوانا رج کے پیا چھکدا سی۔

'مینوں سکربز وچ کم کرن لئی ہن اک بڑا مذاقیا بندا لبھا اے،' اوہنے دسیا، وقفے توں پچھوں اوہ فیر بولیا،' مجال اے مینوں سمجھ آئی ہووے کہ میں ایہدے نال کیہ کراں۔ '

میں پُچھیا،'اوہ اندر کیوں ہویا اے؟'

' اہنے اپنی گھر والی نوں چھڈ دتا سی تے عدالت نے اوہنوں حکم دتا اے کہ اوہنوں ہر ہفتے/ ستیں دنیں اینا خرچہ دیوے ، پر اوہ انکاری اے۔' میں اوہدے نال بڑی جریا / بحث کیتی، اینی کہ میں اخیر غصے تے دباؤ نال تھک پیا۔/ میں آخ آخ کے تھک گیا۔ میں اوہنوں دسیا کہ اوہ بس اپنی چہرہ بچان لئی اپنا نک پیا وڈھدا اے۔ اوہنے کہیا کہ میں ساری حیاتی جیل وچ لنگا لاں دا پر اوہنوں اک پیسہ نہیں دینا۔ میں دسیا کہ توں تے اوہنوں بھکھ نا ل نہیں مار سکدا،تے آخدا اے، 'کیئوں نہیں؟' اوہ انج بڑا تمیز دار اے، اوہ آپ کوئی مسلہ نہیں ، اوہ کم وی ٹھیک کردا اے، اوہ خوش وی جاپدا اے، اوہ ایہ سوچ کے بڑا خش ہوندا اے کہ اوہدی بیوی تے بڑا اوکھا وقت آیا اے۔' اوہ اوہدے خلاف کیوں ہویا اے؟'

'اوہنے میری گڈی پھاڑ دتی اے۔'

میں چیک کے بولیا،' اوہنے کیہ کیتا ؟'

' بلکل ایہ ای گل اے۔ اوہنے اوہدی گڈی پھاڑ دتی سی۔ اوہ کہندا سی اوہ اوہنوں کدی وی، اپنی مرن دے دیہاڑ تک وی معاف نہیں کرے دا ۔'

' اوہ ضرور کملا ہونا ایں ۔'

' نہیں ، اوہ کملا نہیں، اوہ تے بلکل سمجھدار، پر امن، ذہین، تمیز دار بندا اے۔'

ہربرٹ سنبری اوہدا ناں سی، تے اوہدی ماں، جہڑی بڑی مہذب سی، تے اوہنے اجازت ای نہیں سی دتی کہ کوئی اوہدا پٹھا ناں ، ہرب یاں برٹی بلائے، بلکہ صرف ہربرٹ بلائے، انج ای اوہنے کدی اپنے بندے نوں سیم نہیں سی بلایا بلکہ صرف سیموئل بلاندی سی۔ مرس ہربرٹ دا ناں بیٹرس سی ، تے جدوں اوہدی منگنی مسٹر سنبری نال ہوئی تے اوہنے اوہنوں بیہ آکھن دی ہمت کیتی، تے اوہنے اپنا پیر زور دی پنجے تے زور دا ماریا۔

'بیٹرس میرا ناں اک عیسائی دے طور تے پکا ہویا،' اوہ چیک کے بولی، ' تے میں سدا دی بیٹرس ساں تے سدا روواں دی' تیرے لئی تے میرے جنہے وی اپنے تے سکے ساک نے اوہناں لئی۔'

اوہ اک نکے جئے قد دی بی بی سی، پر بڑی تگڑی، ترکھی تے کھروی ، ذرا پُسے رنگ دی؛ تیکھے تے ٹھیک نقش تے نکیان نکیاں موتیاں ورگیاں اکھاں سن۔ اوہدے وال اوہدی عمر دے حساب نال بوہتے کالے سن تے کجھ شک ہوندا سی اوہدی عمر بارے، تے ہر ویلے بڑے سوپنے طریقے نال سانبھے ہوندے سن، تے اوہ اوہناں نوں ملکہ وکٹوریا دی دھی آر بنا کے رکھدی سی۔ اوہنے اوہدوں توں اے انداز بنایا سی جدوں اوہ وڈھی پوئی تے اے بنان جوگی ہو گئی، تے کدی بدلن دی لوڑ مسوس ناں کیتی۔ اے گل ممکن نہیں سی لگدی کہ اوہ والاں دا رنگ چنگا رکھن لئی کوئی شے لاندی ہووے دی اس لئی کہ اوہنے کدی بلاں تے یاں گہلاں تے کدی رنگ نہیں سی لایا، اوہنی اپنی حیاتی وچ کدی اپنے نک دے کول وی کوئی پوڈر لے کے نہیں سی گئی۔ اوہنے سوا کالے ودھیا قسم دے لباس توں کوئی ہور کپڑا نہیں پائیا۔ تے اوہ (گھر دے نیڑے ، کونے تے اک بی بی نے بنایا ہوندا سی) فیشن دی پرواہ کیتیاں بغیر چنگے تے سجے ڈذین دا بنیایا ہوندا سی ۔ اوہدا زیور صرف اک سونے دی چین سی جدھے وچ اک نکا جہیا سونے دا صلیب دا نشان سی۔

سیموئل سنبری وی اک چھوٹے قد دا بنداسیں ۔ اوہ وی پتلا ماڑا جہیا سی اپنی گھر والی آر ، پر اوہدے وال کجھ دڑبڑے جئے سن، ہن بڑے گھٹ گئے سن تے اوہ اک پاسے ودھا کے تے کنگھی کر کے سر دے دوجے پاسے ، گنج دے اُتوں دی ، وااہ لیندا سی۔ اوہدیاں کھٹے رنگ دیاں اکھاں سن تے اوہدا چپچپ کردی جلد سی۔ سی ۔ اوہ اک وکیل دے دفتر وچ کلرک سی تے اوہ دفتر دے ملازم توں لے کے تے عزت دار پوزیشن تک سارے کم کردا سی۔ اوہدا مالک اہنوں مسٹر سنبری بلاندا سی تے کئی واری اوہنوں کسے نکے موٹے گاہک نال نبڑن دا کم وی آخ دیندا سی۔ چوی سال ہو گئے سن اوہ ہر سویرے اک ہی ریل گڈی تے شہر اوندا سی، ایتوار دے، تے یاں پندریں دِنیں چھٹی والے دن سمندر دے کنارے جان توں علاوہ ، تے گھر ( جہڑا شہر دے نال کچی آباددی وچ سی )مڑ کے وی اوہ ، اوہ ہی ریل گڈی تے جاندا سی۔ اوہ لباس صاف ستھرا پاندا سی، اوہ پوسلے رنگ دا پاجاما ، کالا کوٹ تے وڈا ٹوپ پا کے کم تے جاندا سی۔ تے گھر آکے اوہ سلیپر پاندا سی تے اک کالا چمکیلا کوٹ جہڑا ایڈا پرانا سی کہ دفتر وچ پایا نہیں سی جا سکدا۔ ؛ پر اتوار نوں جدوں اوہ تے مسز سنبری گرجے جاندے سن تے اوہ اک ہور کوٹ پاندا سی تے نال اوہ ای وڈھا ٹوپ۔ اس طرحاں اوہ اوہس ارام والے دن دی وی عزت کردا سی، تے اے بے دین لوکاں دے خلاف احتجاج وی سی جہڑے سارا دن سیکل پجاندے پھردے سن یاں گلیاں وچ بیندے سن تے شراب خانے کھلن دا ٹیم اُڈیکدے سن۔ اصول دے مطابق سنبریز پرہیزی سن ، اپنے کم خرچ دپہر دے کھانے وچ ، بسکٹ/ کیک تے مکھن تے دُدھ دا گلاس جہڑا سیموئل سارا ہفتہ وی کھاندا سی، پر اتوار نوں ، بیٹرس اوہنوں اوہدی صحت واسطے ، رات ٹیم ودھیا روٹی پانی ، روسٹ ہویا وڈھا گوشت تے یورک شائر پڈنگ دیندی سی تے اوہ چاہندی سی کہ اوہ اک گلاس بیئر (شراب )وی پی لئے۔ اوہنے کدی گھر وچ کوئی شراب نہیں سی رکھی پر اوہ سویر دی عبادت توں پچھوں اک جگ چوری چوری باہر لے جاندا سی، تے کونے تے پب توں اک پا شراب لے اوندا سی؛ پر کوئی شے اہنوں کلیاں پین تے مجبور نہیں کر سکی۔ ایس لئی ذرا ساتھ نبھان لئی اوہ وی اک گلاس پی لیندی سی۔

ہر برٹ ، اک ہی بچہ رب نے اوہناں نوں عنایت کیتا سی، بغیر کسے پرہیز توں ۔ بس اُنج ای، اوہ اپنا سارا پیار اوہدے تے ہی لُٹاندے سن۔ اوہ پیرا بال تے سوہنا مندا سی۔ مسز سنبرے نے اوہنوں بڑے تیان نال پالیا سی۔ اوہنے اوہنون سکھایا کنج میز تے بہنا ایں، تے اپنیاں ارکاں /کہنیاں میز تے نہیں رکھنیاں، تے اک عزت دار شریف بندے آر کنج چھری کانٹا ورتی دا اے، ے وی سکھایا ۔ ماں نے اوہنوں ایہ وی سکھایا کہ کنج اک انگلی سدھی کر ی دی اے جدون اوہ پین لئی ، چاہ والا کپ پھڑدا سی، جے اوہ پچھدا سی ، کئیوں ، تے اوہ آخدی سی: 'برا ناں منا۔ ایہ انج ای کری دا اے۔ ایتھوں پتا لگدا اے کہ تینوں پتا اے کیہ کیہ اے/ ایتھوں دِسدا اے کہ تینوں چنگی ماڑی دا پتا اے۔ '

ٹیم لنگدا گیا تے ہربرٹ سکول جان جوگا ہو گیا۔ مسز سنبری نوں بڑی فکر سی کہ اوہنے کدی ہربرٹ نوں گلی دیاں بالاں نال کھیڈن نہیں سی دتا۔

' بھیڑیاں لوکاں نال ملنا جلنا دغا باز/ فراڈیا بنا دیندا اے۔ میں ہمیشہ اپنے آپ نوں اپنے آپ تک رکھیا اے، تے اگوں وی انج ای کرنا ایں۔ '

اوہ ہمیشہ توں اوہسے گھر وچ رہندے سن پر اوہنے اپنے گوانڈیاں نوں دور ای رکھیا سی۔ ، تینوں نہیں پتا کہ لندن وچ کنج دے لوک رہندے نیں ، اوہنے آکھیا۔ ' اک شے دوجے تک لے جاندی اے، تے اس توں پہلاں کہ تہانوں پتا لگے کہ تسیں ں کتھے اوہ تسیں ں ایویں کویں لوکاں نال رل مل گئے ہوندے اوہ ، تے فیر تسیں اوہناں توں جان نہیں چھڈا سکدے۔'

اوہ نہیں سی چاہندی کہ ہربرٹ نوں کونسل دے سکول وچ بھیڑیاں منڈیاں نال ملن دتا جائے ، تے اس لئی اوہنے اوہنوں آکھیا:' ہن ، ہربرٹ، اوہ ای کر جو میں کردی رہی آں؛ اپنے آپ نوں اپنے آپ تک ای رکھ، تے اوہناں نال بس ضرورت دا ای واسطہ رکھ۔'

پر ہربرٹ سکول وچ بڑا کامیاب رہیا۔ اوہ کم چنگا کردا سی تے احمق اُکا نہیں سی۔ اوہدیاں رپورٹاں بہت ودھیا سن۔ اے پتا لگا کہ اوہ حساب کتاب وچ بہت چنگا سی۔

' جے ایہ گل اے تے ، ' سیموئل سنبری نے کہیا، ' تے اے ٹھیک اے کہ اوہ اکاؤنٹنٹ بنے دا، اکا ؤنٹنٹ نوں ہمیشہ چنگی نوکری لبھ جاندی اے۔' تے اوتھے ہی اوہسے ٹیم ایہ فیصلہ ہو گیا کہ اوہ کیہ بنے دا۔ اوہ وڈھا تے لماں ہو گیا۔

' کیئوں وائی ،ہربرٹ ، ' اوہدی ماں نے کہیا، ' چھیتی توں اپنے پیؤ جناں لماں ہو جائیں دا،

جدوں سکول وچوں پڑھ کے نکلیا تے اوہ اپنے پیؤ نالوں دو انچ لماں سی تے اوہ دا قد پنج فُٹ دس انچ ہو کے کھلو گیا۔ ' ایہ بڑا صحیح قد اے،' اوہدی ماں نے آکھیا، ' ناں بُہتا لماں تے ناں اُکا نکا۔'

اوہ بڑا سوہنا منڈا سی، ماں ورگے مناسبھ نین نقش تے کالے وال، تے اوہنے باپ کولوں لیاں نیلیاں اکھاں ، تے اوہدا رنگ بھانویں ذرا کو بھوسلا سی پر اوہدی چمڑی بڑی صاف تے سہواری سی۔ اوہ جدوں اکیاں سالاں دا ہویا تے سیموئل سنبری اوہنوں اوہس اکاؤنٹنٹ دے دفتر وچ لے گیا جہڑا سال وچ دو واری سیموئل دے دفتر ، اکاؤنٹس چیک کرن اوہدا سی۔ اوہ ہر ہفتے اپنی ماں دی تلی تے اک چنگی رقم دھرن جوگا ہو گیا۔ اوہ تن سکے اوہنوں موڑدی سی ، دپہر نوں کجھ کھان لئی تے تن چھوٹے سکے اوہنوں جیب خرچ لئی دیندی سی، تے باقی دا اوہ بچت بینک وچ جمع کرا دیندی سی، اوکھے سوکھے ویلے لئی۔

جدوں ہربرٹ دی اکیہویں جنم دیہاڑ نوں ، مسٹر تے مسز سنبری سون لئی بستر تے گئے، مسز سنبری آخدی اے: کجھ لوک اے نہیں جاندے کہ اسیں ں کڈے نصیباں والے آں ؛ میں تے رب دا شکر کرنی آں۔ کسے دا ساڈھے ہربرٹ جیہا چنگا پتر نہیں۔ اوہنے مینوں ساری حیاتی اک کڑھی لئی وی پرشان نہیں کیتا ، کدی بمار نہیں ہویا۔ ایتھوں پتا لگدا اے کہ جے تسیں کسے دی چنگی پرورش کرو تے تہوانوں اودا اجر لبھدا اے۔ مینوں تے یقین ای نہیں اوندا پیا کہ اوہ اکیاں سالاں دا ہو گیا اے۔

' آہو ، میں سوچنا ، ایس توں پہلاں کہ سانوں پتا لگے کہ اسیں ں کتھے آں ، اوہ ویاہ کر لئے دا تے سانوں چھڈ جائے دا۔ '

' اوہ انج کئیوں کرے دا ؟ ' مسز سنبری نے چنگے ڈھاڈھ پنے نال آکھیا۔' کیہ اوہنوں ایتھے ایہڈا چنگا گھر نہیں لبھیا؟ توں اوہدے دماغ وچ پٹھیاں گلاں ناں پا، سیموئل انج فیر تیری تے میری لڑائی ہووے دی، تے تینوں پتا اے کہ میں اے کدی نہیں چاہندی۔ ویاہ کرے ، بے شک! اوہنوں بڑی سمجھ اے۔ اوہنوں پتا اے کہ جدوں اوہدا ہتھ سوکھا ہووے دا۔ اوہنوں اینی عقل ہے وے، ہربرٹ جاندا اے۔'

مسٹر سنبری چپ کیتا سی۔ اوہنوں بڑا چر پہلاں ایہ پتا لگ گیا سی کہ بیٹرس نوں جواب دے کے تے اوہنے کسے پاسے جوگیاں نہیں رہنا۔

اوہ بولدی گئی ،' میں اس گل دے حق وچ نہیں کہ کوئی بندا اپنے آپ نوں جانن توں پہلاں ای ویاہ کر لئے۔ تے بندے نوں ترھی ،پینتی ورھیاں توں پہلاں اپنے آپ نوں نہیں سمجھ سکدا۔' مسٹر سنبری نے گل بدلن لئی آکھیا، اوہ اپنے تحفیاں تے بڑا راضی سی۔' مسز سنبری ، اجہے وی پرشان سی تے بولی، آہو ! اوہنوں خوش ہونا وی چاہی دا سی۔'

اوہ اصلی بڑے ودھیا تے سوہنے سن۔ مسٹر سنبری نے اوہنوں چاندی دی بانہہ والی گھڑی دتی ، جدیاں سوئیاں ہنیرے وچ دسدیاں سن۔ تے مسز سنبری نے اوہنوں اک گڈی دتی ۔ ایہ کوئی پہلی گڈی نہیں سی جہڑی اوہنے اوہنوں دتی سی۔ پہلی تے اوہنے اوہنوں اوہدوں دتی سی جدوں وہ ستاں ورہیاں دا سی۔ جتھے اوہ رہندے سن اوہدے نیڑے اک کھلی تھاں سی تے ہفتے والے دن پشلے پہر ، جدوں رُت چنگی ہوندی سی تے مسز سنبری اپنے بندے تے پتر نوں نال لے کے تے سیر کرن جاندی سی۔ اوہ آخدی سی کہ ایہ سیموئل لئی چنگا سی کہ اوہ سارا ہفتہ دفتر وچ ڈبے آر بند رہن توں بعد تازہ ہوا وچ ساہ لینا چنگا سی۔ اوہتھے ہر ویلے بڑے لوک کٹھے ہوندے سن، پر مسز سنبری جہڑی کسے نال بولدی ، ملدی نہیں سی، لوکاں توں دور ای رہندی سی۔ ہربرٹ اک دن ، اک سو دم بولیا ، اماں! اوہناں گڈیاں ول ویکھ۔' تازہ ہوا پئی وگدی سی ، تے نکیان وڈیاں ، گڈیاں ہوا وچ تردیاں جاندیاں سن ۔ ماں نے آکھیا، ' اوہ ، ہربرٹ ، ناں اوہ نہیں۔' پئیو بولیا، ہربرٹ ، توں ویکھنا چاہنا ایں اوہ کتھوں چڑھیاں نے؟'

' اوہ، آہو، آہو! ابا'

اوہس کھلے تھاں تے وچکا اک اُچی تھاں سی تے جدوں اوہ اوتھے اپڑے تے اوہناں ویکھیا کہ اوتھے کئی منڈے تے کڑیاں تے کجھ بندے ، اپنی گڈی نوں چاڑھن لئی ، اوہس ٹبے توں تھلے نوں پجدے سن۔ کئی واری اوہ ڈگ پیندیاں سن ۔ پر جدوں ڈگدیاں نہیں سن تے اوہناں نوں چاڑھن والا ڈور چھڈا سی تے اوہ اُچیاں ، بڑیاں اُچیاں چڑھ جاندیاں سن۔ ہربرٹ تے بڑا مست ہو گیا ویکھ کے۔

اوہ بڑا چیک کے بولیا،' اماں ، میں اک گڈی لینی ایں؟' اوہنوں ایہ پتا سی کہ جدوں کوئی شے لینی ہووے تے پہلاں ماں نوں پچھنا ضروری سی۔

' کیئوں ؟' ماں نے آکھیا۔

' اڈان لئی ، اماں ۔'

اماں نے کہیا،۔ جے توں بوہتا ہشیار بنیاں تے گھاٹے وچ رہیں دا۔' مسٹر تے مسز سنبری نے اوہدے سر دے اُتوں دی اک دوجے نوں ویکھیا تے ہسے، اوہدے گُڈی اُڈان دا سوچ کے۔ اوہ ہن وڈا ہو گیا سی ۔

' جے توں سیانا ایں تے میرے دسیوں بغیر روز سویرے دند صاف کریں تے کوئی حرانی والی گل نہیں کہ سانٹا کلاز ، کرسمس تے ،

تیرے لئی گڈی نیاں لیاوے۔'

کرسمس دور نہیں سی ، تے سانٹا کلاز نے اوہدے لئی اوہدی پہلی گڈی لے آندی۔ پہلاں پہلاں اوہ ایڈا ہشیار نہیں سی جے اوہنوں چاڑھ سکے تے مسٹر سنبری ٹبے توں تھلے پجھ کے اوہنوں چاڑھ کے دیتی سی۔ اوہ اُکا نکی جہی گڈی سی پر سیموئل نے جدوں اوہنوں ہوا وچ تردیاں ویکھیا تے اپنے ہتھ وچ اوہدی کھچ پیندی ویکھی تے اوہنوں بڑا جوش آیا، تے فیر ہر ہفتے ۔ پشلے ٹیم ، جدوں اوہدا باپ شہروں مڑدا سی، تے اوہ ، اوہس کھلے تھاں تے جان لئی ،اپنے ماپیاں دے پچھے پے جاندا سی ۔اوہنے بڑی چھیتی گڈی اُڈانی سکھ لئی تے جدوں اوہ اوہنوں ٹبے دے اُتوں تھلے ول پجھدیاں ویخدے سن ،تے جدوں گڈی ہوا پھڑ دی سی تے اوہ اوہدی ڈور ودھاندھا سیتے ماں تےپیئو دا دل فخر نال بھر جاندا سی ۔

ایہ تے ہن ہربرٹ دا جنون بن گیا۔/ ہربرٹ تے ہن ایہدے پچھے شدائی ہو گیا سی۔ تے جیوں جیوں اوہ وڈھا ہوندا گیا اوہدی ماں اوہدے لئی وڈھی توں وڈھی گڈی لے کے اؤندی رہی۔ اوہ بڑی چالاکی نال ہوا دا حساب لا لیندا سی۔ تے گڈی نال ایسے ایسے کرتب کر لیندا سی جہڑے تسیں سوچ وی نہیں سکدے۔ اوتھے ہور وی گڈیاں اُڈان والے سن ، ۔۔۔ ناں صرف بچے بلکہ وڈے بندے وی، تے سوائے مشغلے توں کوئی ہور شے لوکاں نوں قدرتی طور تے ایہڈا نیڑے نہیں لیا سکدی ، تے چوکھا چر نہیں سی لنگیا جدوں مسز سنبری اوہدا سیموئل تے پتر اوتھے ، مسز سنبری دے اپنے آپ تک رہن والے کلیے دے باوجود ، عام لوکاں نال گلاں باتاں کرن لگ تے رل مل گئے۔اوہ اپنیاں اپنیاں گڈیاں دا مقابلا کراندے تے اپنے کانامیاں دی شو ماردے سن۔ کدی کدی ہربرٹ، جہڑا ہن سولاں سالاں دا وڈھاسارا منڈا سی ، کسے ہور گڈی باز نوں للکار لیندا سی۔ فیر اوہ اپنی گڈی نوں اک بازی لواندا ہوا والے پاسے تے اپنے ساتھی دی گڈی دی ڈور نال اپنی گڈی دی ڈور نوں کسردا تے اکو ای کھچ مار کے اوہدی گڈی نوں بو کاٹا کر لیندا سی۔ مسز سنبری ہن اوہدے شوق اگے ہار گئی سی تے کئی واری اوہنوں اجازت دیندی سی کہ اوہ آپ ای گڈی چڑھائے۔ اوہ بڑا مذاقیا منظر سی جدوں اوہ اوہنوں ، دھاری دار پاجامہ ، کالا کوٹ تے وڈھا ٹوپ پا کے پہاڑی توں تھلے ول نسدیاں ہویاں ویکھدی سی، مسز سنبری اوہدے پچھے پچھے ہولی ہولی ٹردی جاندی تے جدوں گڈی ہوا وچ سہواری ہو کے اُڈن لگ پیندی سی تے اوہدے کولوں ڈور پھڑ لیندی سی تے جدوں اوہ اُچی اُڈدی سی تے اوہنوں ویکھدی رہندی سی۔ ہفتے والے دن پشلاپہر اوہناں لئی وڈھا دن ہوندا سی، تے جدوں مسٹر سنبری تے ہربرٹ سویرے شہر والی گڈی تے بھن لئی گھروں نکلدے سن تے اوہ پہلا کم ایہ کردے سن کہ اسمان ول ویکھدے تے اے حساب لاندے ون کہ گڈیاں اُڈان والی رُت ہے کہ نہیں۔ سبھ توں ودھ اوہناں نوں جھکڑ والا دن تے ٍکٹدی ودھدی ہوا چنگی لگدی سی، اس لئی کہ اوہناں نون انج ایاپنی مہارت وکھان دا موقع لبھدا سی، سارا ہفتہ شام نوں ، اوہ ایہ ای گلاں نکردے سن۔ اوہ اپنے نولوں نکیاں گڈیاں توں نفرت کردے تے وڈھیاں توں سڑدے سن۔ اوہ بڑے جوش نال تے نفرت نال دوجیاں گڈی بازاں دے کم دی گل کردے سن، انج جیویں باکسر تے فٹ بال دے کھلاڑی اپنے مخالفاں دی گل کردے نے۔ اوہناں نوں وڈھی توں وڈھی گڈی تے جہڑی اُچی اُڈے اوہ، گڈی لین دا شوق سی۔ اوہناں نے ہربرٹ نوں جہڑی ڈور اکیویں سال گرہ تے دتی سی اوہ پیانو دے ست فُٹ اُچے ،ڈرم تے ولیٹی سی۔ پر ہربرٹ ایہڈا راضی ناں ہویا ۔ کسے ناں کسے طرحاں اں اوہنوں اک 'ڈبہ گڈی ' جہڑی کسے نے نویں بنائی سی، اوہدے بارےسنیا تے اے خیال اوہنوں ودھیا لگا۔ اوہنے سوچیا کہ اوہ آپ وی انج دی کوئی شے بنا سکدا اے، تے اوہنے جدوں دی ڈرینگ سکھی سی اوہ اوہدوں دا اس شے ڈزین سوچدا سی۔ اوہنے اک نکا جہیا ماڈل بنا لیا، تے اک دن اوہنوں اُڈا کے ویکھیا، پر اوہ کامیاب ناں ہوئی۔ اوہ ضد دا بڑا پکا سی تے ہار منن والا نہیں سی۔ کوئی شے خراب سی تے اوہ اوہنوں ٹھیک کر کے چھڈے دا۔

فیر اے کم خراب ہویا ۔ ہربرٹ نے شام نوں کھان پین توں پچھونہہ باہر جان لگ پیا۔ مسز سنبری نوں ایہ گل کوئی ایہڈی چنگی نہیں لگی، پر مسٹر سنبری نے اوہدے نال جرح کیتی۔ آخر اوہ بائیاں سالاں دا ہو گیا اے ، تے گھر بیہ کے اوہ اُکا بدھو بن جائے دا۔ ۔ جے اوہ باہر پھرن جاناں چاہندا اے یاں کوئی فلم ویکھنا چاہندا اے تے کوئی حرج والی گل نہیں۔ ہربرٹ نوں پیار ہو گیا اے۔ اک ہفتے دی شام نوں ، جدوں اوہناں اوتھے کھلے مدان وچ واہ واہ چر کھیڈ مل لیا ، گھر آ گئے تے شام دی روٹی دے ٹیم تے صاف اسمان ول ویکھ کے اوہنے اک دم آکھیا:

'اماں ، میں اک کڑی نوں کل ، گھر چاہ تے بلایا اے۔ ایہ ٹھیک اے؟'

' کیہ کیتا اے توں ؟' مسز سنبری نے پُچھیا ، اک منٹ لئی اوہ اپنی گریمر وی بھُل گئی۔ ' اماں ، تساں سنیا اے'۔

' تے میں پُچھ سکنی آں اوہ کون ایں تے تیری کتھوں واقف بنی؟' 'اوہدا ناں بیون اے، بییٹی بیون ، تے میں پہلی واری اوہنوں ہفتے شام نوں فلم ویکھین گیا تے اوتھے ملیا ، جس ویلے مینہ پیا پیندا سی۔ اوہ تے اک حادثہ ای سی۔ اوہ میرے نال بیٹھی سی تے اوہدا بیگ ڈگ پیا تے میں چکیا تے اوہنے مینوں شکریہ کہیا، تے انج ای اسیں گلاں کرن لگ پئے۔'

' تے توں ، تیرا مطلب اے ، توں مینوں دسنا چاہنا ایں ، توں تے پرانے جال وچ پھس گیا؟ اوہنے اپنا بیگ سُٹیا!'

' تسیں غلط سمجھے او ، اماں جی، اوہ اک چنگی کڑی اے۔ اوہ سچی مچی اک پڑھی لکھی وی اے۔'

' تے ایہ سبھ کجھ کدوں ہویا سی؟ '

' کوئی ترے کو مہینے پہلاں۔'

' اوہ ہو! توں اوہنوں تن مہینے پہلاں ملیا سیں تے چاہ تے کل بلایا اے؟'

' ہاں جی، ہویا ایہ کہ میں اوہنوں اوہدوں ای ویکھیا سی۔ اوہس پہلے دن ، شو توں پچھونہہ۔ میں اوہنوں پُچھیا سی کہ توں منگل نوں وی میرے نال فلم ویکھن آویں دی، تے اوہنے جواب دتا ، اوہنوں نہیں پتا ، ہوورے اوہ آوے دی تے ہوورے اوہ ناں آوے ۔ پر فیر اوہ آ گئی۔'

' اوہنے اؤناں ای سی۔ میں تینوں اے اوہدوں ای دہس دینا سی۔'

' تے اوہدوں توں لے کے اسیں ہفتے وچ دو دن فلم ویکھن جاندے رہے آں۔'

' اس لئی توں اکثر باہر جاندا سیں؟' ۔

' چلو ٹھیک اے ۔ پر ویکھو، میں اوہنوں تواڈے اُتے تھوپنا نہیں چاہندا، جے تسیں نہیں چاہندے کہ اوہ ایتھے چاہ تے آوے ، میں اوہنوں آخ دیاں دا کہ تواڈے سر وچ پیڑ اے ،تے میں اوہنوں باہر لے جانواں دا۔'

مسٹر سنبری بولیا،' تیری ماں اوہنوں چاہ تے بلا لئے دی، توں بلا لیں دی نا؟ گل دراصل ایہ وے تیری ماں اوہبڑاں نوں نہیں جر سکدی ، اوہنے کدی اوہناں نوں چنگیاں نہیں سمجھیا۔'

' میں تے بس اپنے آپ تک ای رہنی آں۔' مسز سنبری نے دکھی ہو کے آکھیا۔ اوہ کیہ کردی اے؟'

' اوہ شہر اک ٹائپ رائٹنگ دے دفتر وچ کم کردی اے، تے اپنے گھر رہندی اے، جے تسیں اوہنوں گھر سمجھو، گل ایہ آ کہ اوہدی ماں تے گزر گئی اے تے اوہدے پیئو نے دوجا ویاہ کر لیا اے، تے اوہناں دے ترے بال نے، تے اوہدی اپنی مترئی ماں نال نہیں بندی، اوہ ہر ویلے بس اوکھی ، اوکھی تے لڑدی رہندی اے، اے مینوں اوہنے دسیا اے۔'

مسز سنبری نے بڑے سٹائل نال چاہ بنائی تے اگے رکھی۔ اوہنے بیٹھک وچ چھوٹی میز توں نکیاں نکیاں شیواں ، جہڑیاں اوہ عام نہیں سن ورتدے، چُک لیاں تے ، تے اوہدے اُتے اک اُچھاڑ /کپڑا پایا۔اوہنے چاہ والے اوہ پانڈے کڈے جہڑے اوہناں کدی نہیں سن ورتے، اوہنے بسکٹ تے کیک بنائے تے بڑی پتلی مکھن والی بریڈ کٹی۔' میں اوہنوں وکھانا چاہنی آں کہ اسیں کوئی ایویں کیویں لوک نہیں آں ،' اوہنے اپنے سیموئل نوں دسیا۔

ہربرٹ ، بییٹی نوں لین ٹر گیا، تے مسز سنبری نے باہرلے بوہے تے اوہناں دا راہ ڈکیا ، اس لئی کہ کدرے پربرٹ اوہنوں کھانے والے کمرے وچ ناں لے جائے جتھے اوہ عام طور تے بیہ کے کھاندے تے بیندے سن۔ ہربرٹ جدوں اوہس کڑی نوں لے کے بیٹھک وچ وڑیا تے اوہنے چاہ والی میز نوں بڑی حرانی نال ویکھیا۔

' ماں جی ، ایہ اے بییٹی ، ' اوہ بولیا۔

' میں سمجھ گئی ، مس بیون ،' مسز سنبری بولی۔

، ایہ تے ٹھیک اے، پر تسیں مینوں بییٹی کہہ سکدے اوہ، کیئوں جی؟'

' شید ساڈی واقفی اجے اینی نہیں ۔' مسز سنبری نے بڑی معتبر مسکراہٹ نل ایہ گل کیتی۔ ' تسیں بووو گے نہیں ، مس بیون؟'

عجیب گل سی ، یاں فیر اک ای عجیب گل نہیں سی کہ بییٹی بیون انج لگدی سی پئی جیویں مسز سنبری اس عمر وچ لگدی سی۔ اوہدے اوہسے طرحاں پتلے نقش تے انج ای نکیاں نکیاں موتیاں ورگیاں/ گول گول اکھاں، پر اوہدے بُلاں تے تیز لال رنگ لگا سی۔ تے گھلاں تے تھوڑی تھوڑی لالی لگی سی، تے اوہدے نکے نکے کالے والاں نوں پکے ای ول پئے سن۔ مسز سنبری نے پہلی نظر وچ ایہ ویکھ لیا سی۔ تے اوہنے حساب لا لیا کہ اوہدا نقلی ریشم دا جوڑا ، تے اوہدی اُچی اڈی والی جُتی ، تے اوہدی شوخا جہیا ٹوپ ،ایویں کوڈی دا وی نہیں سی۔ اوہدی فراک نکی جہی سی تے اوہدیاں تے اوہدیاں چم دے رنگ دیاں جراباںساریاں دسدیاں سن پیاں

مسز سنبری نے اوہدا میک اپ تے لباس اُکا پسند ناں کیتا، بس اوہسے ویلے اوہنوں نا پسند کر چھڈیا ، پر اوہنے اے سوچیا سی کہ اوہ اک اک نویکلی ، معزز بی بی آر رووے دی، اس طرحاں شروع وچ تے سبھ ھ کجھ ٹھیک ہویا۔ اوہنے کپ وچ چاہ پائی تے ہربرٹ نوں آکھیا اوہ اپنی سہیلی نوں چاہ پھڑائے۔ ' مس بیون نوں پچھ ، اوہ مکھن والی بریڈ یا بسکٹ لووے دی، سیمویل سوہنیا ۔'

' دوویں لے،' سیمویل نے دوویں تھالیاں اگے کردیاں ہویاں آکھیا۔ ' مینوں تے چنگا لگدا اے ، لوکی رج کے کھان،'

بییٹی نے ڈردیاں ڈردیاں مکھن والی بریڈ دا ٹوٹا تے اک بسکُٹ اپنی تھالی تے اَڑا لیا تے مسز سنبری بڑے پیار نال رُت دے بارے گل کردی رہی۔ اوہنوں بییٹی نے اوکھیاں ہوندیاں ویکھ ویکھ کے تسلی ہوندی رہی۔ فیر اوہنے کیک کٹیا تے دھکے نال بییٹی نوں وڈھا سارا ٹکڑا دتا، بییٹی نے اک بُرکی لئی تے جدوں اپنی تھالی وچ رکھن لگی تے اوہ تھلے پُنجے ڈگ پیا۔ ' اوہ ہو! معاف کرنا' اوہ کُڑی بولی، جدوں اوہنے تھلیوں چُکیا ۔ ' کوئی گل نہیں ، میں تینوں اک ہور ٹکڑا کٹ دینی آں ۔' مسز سنبری نے آکھیا۔

' اوہ تکلیف ناں کرو، کوئی مسئلہ نہیں۔ تے فرش وی صاف اے،' مسز سنبری بڑی چبھویں مسکراہٹ نال بولی ، 'انج ای گل اے ، پر میں سوچ وی نہیں سکدی کہ تینوں پہنجے ڈگا کیک کھان دیاں ، ہربرٹ ایدھر کر، تے میں مس بیون نوں ہور دینی آں۔'

'نہیں ، مسز سنبری ، میرا دل نہیں ، سچی، میں ہور نہیں لینا۔'

' مینوں افسوس اے کہ تینوں میرا کیک پسند نہیں آیا' میں تے خاص طور تے تیرے لئی بنیایا سی۔' اوہنے ماسا کو سارا لے کے چکھیا۔ ' مینوں تے ایہدا سواد ول ای لگا اے۔'

' ایہ گل نہیں ، مسز سنبری، ایہ بڑا سوہنا کیک اے، بس ، مینوں بھکھ نہیں لگی۔'

اوہنے ہور چاہ وی ناں لئی تے مسز سنبری نے ویکھیا کہ اوہ کپ توں جان چھڈا کے خوش ہوئی سی۔' مینوں لگدا اے ، ایہ رسوئی وچ بیہ کے ہی روٹی کھاندے ہونے نے،' اوہنے اپنے آپ نال گل کیتی۔ فیر ہربرٹ نے سگریٹ لا لیا۔

' ہرب ، چل آ اک سوٹا لائیے،' بییٹی نے آکھیا ۔ ' میری تے سگرٹ پین لئی جان پئی نکلدی اے۔'

مسز سنبری بی بییاں دا سگرٹ پینا چنگا نہیں سی سمجھدی، پر اوہنے صرف اپنے بروھٹے چاڑھے۔

' اسیں ایہنوں ہربرٹ آکھنا ہی چنگا سمجھنے آں، مس بیون۔' اوہنے آکھیا۔

بییٹی ایہڈی وی پاگل نہیں سی کہ اوہنوں ایہ پتا ناں لگدا کہ مسز سنبری اوہنوں تنگ کرن دی کوشش پئی کردی سی، ہن اوہنوں اوہدے ول مڑ کے ویکھن دا موقعا لبھا سی۔ ' مینوں پتا اے،' اوہنے آکھیا ۔ ' جدوں ایہنے مینوں اپنا ناں ہربرٹ دہسیا سی تے میں تے ہس ہس کے پاگل ہو گئی ساں۔ سوچو ذرا ایہنوں کوئی واز مارے ، ہربرٹ! تے اک چیک نکل جائے، میں بلایا سی۔'

' مینوں افسوس اے کہ تینوں میرے پتر دا بیپٹزم دے ٹیم دتا گیا ناں چنگا نہیں لگا، میرا خیال اے کہ ایہ ودھیا ناں ایں۔ پر ، میرا خیال اے کہ ایہ سبھ ھ کجھ بندے دی حیثیت تے منحصر اے۔'

ہربرٹ لڑائی مکان / مدد لئی اگے آیا۔

' دفتر وچ مینوں لوکی برٹی بلاندے نے، ماں جی ۔'

'فیر میں تے ایہ ای آکھاں دی کہ اوہ سارے بڑے عام جئے لوک نیں۔'

مسز سنبری بڑی معتبری نال چپ کر کے بیہ گئی، تے گل بات نوں اوہسے طرحاں مسٹر سنبری تے ہربرٹ نے چالو رکھیا۔ مسز سنبری ایہ ویکھ کے بڑی راضی سی کہ بییٹی غصہ پئی کردی سی۔ اوہنے ایہ وی غور کیتا کہ اوہ کڑی جانا چاہندی اے، پر اوہنوں سمجھ نہیں سی پئی اوہدی کی اوہ کیہ کرے۔ اوہنے پکا ارداہ کیتا سی کہ اوہ اگانہہ ہوکے اوہدی مدد نہیں کرے دی۔ اخیری ہربرٹ نے معاملہ سانبھ لیا۔

' ٹھیک اے ،بییٹی ، میرا خیال اے ، ہن ٹیم ہو گیا اے اسیں جدوں دے نال انل آں،' اوہنے کہیا۔ ' میں تیرے نال چلنا واں۔'

' تینوں پہلاں ای ٹر جانا چاہی دا سی؟' مسز سنبری نے آکھیا، اُٹھ کے کھلو گئی۔ ' بڑا چنگا لگا اے مل کے ، پکی گل اے۔'

'پیارے ، مصوم ، نکے نکے،' جدوں اوہ ٹر گئے تے مسٹر سنبری نے ذرا چَک کے آکھیا ۔

' پیارے، میری جُتی۔ سارا رنگ تے پوڈر۔ میری گل یاد رکھیں، اوہ منہ دھو کے تے والاں دے ولاں توں بغیر ، ہور ای لگے دی۔

عام ، شے اے اوہ، کٹا تے سواہ۔'

ہربرٹ کنٹے پچھوں آیا۔ اوہ رنج سی۔ ' ایدھر ویکھو، ماں جی، اوہس وچاری نال اس طرحاں کر ن دا تواڈاہ کیہ مطلب سی؟ میں بس تواڈھی وجہ توں شرمسار ہویاں ۔'

' اپنی ماں نال انج گل ناں کر، ہربرٹ،' اوہ تے تپ گئی۔ ' تینوں اس طرحاں دی بی بی نوں لے کے میرے گھر او ناں ای نہیں سی چاہی دا۔ عام ، شے اے اوہ، کٹا تے سواہ۔'

جدوں مسز سنبری رنج ہوندی سی تے ناں صرف اوہدی گریمر خراب ہو جاندی سی بلکہ اوہدی ہ ، ھ، ح وی کھسکن لگ پیندی سی۔

ہربرٹ نے اوہدی گل ول اُکا تیان ناں دتا ۔

' اوہنے آکھیا اے کہ اوہنے کدی ساری حیاتی اینی بزتی دا سامنا نہیں کیتا۔ میں بڑے وخت نال اوہنوں چپ کرایا۔'

' چنگا فیر ، ہن اوہ ایتھے کدی وی نہیں اؤن لگی۔ میں تینوں سدھا سدھا دہس دتا اے۔'

' اچھا ، تساں ایہ سوچیا اے، میری اوہدے نال منگنی ہوئی اے، بس ہن اینوں اپنے حقے وچ پا لے تے چھک،' مسز سنبری نے لماں ساہ لیا۔

'توں انج نہیں کریں دا ؟'

'آہو ، میں کراں دا، میں بڑے چر دا ایہ پیا سوچدا ساں، تے اج رات اوہ ایہڈی پرشان رہی اے، مینوں بڑا افسوس اے، اس لئی میں ایہ سوال کیتا ، تے مینوں بڑا وخت کرنا پیا اے اوہنوں منان لئی، میں توانوں دسنا پیا۔'

' ' توں بے وقوف ایں ، مسز سنبری چیک کے بولی۔ ' توں بے وقوف ایں۔'

فیر تے اوتھے پورا ڈرامہ لگا، ماں تے پتر نے اک دوجے تے چنگے حملے کیتے، مسٹر سنبری ، وچارے نے دخل دتا تے اوہناں دوواں نے اوہنوں منہ بند رکھن دا کہیا۔ اخیری فیر ہربرٹ چھال مار کے کمرے وچوں باہر تے بلکہ گھروں وی باہر نکل گیا تے مسز سنبری غصے وچ زارو قطار رون لگ پئی۔

جو کجھ ہویا ، اگلے دن اوہدی کوئی گل ناں چھڑی گئی۔مسز سنبری نے ہربرٹ نال تمیز نال پر سرد مہری دا رویہ رکھیا، تے اوہ وی چپ چپ تے رنج ای لگدا سی۔ شام نوں روٹی شوٹی کھا کے باہر نکل گیا۔ ہفتے نوں اوہنے اپنے ماں پیئو نوں دسیا کہ اوہ اوہس دن اوہدی منگنی ہو ئی سی تے اوہ اج اوہناں دے نال کھلے میدان وچ گڈی اڈان نہیں آوے دا۔

' میں ڈردی نہیں ، اسیں تیرے توں بغیر وی رہ لاں دے۔ ' مسز سنبری نے بے رحمی نال آکھیا۔

اوہنا دا ہر پندریں دنیں ساحل سمندر تے جان دا ٹیم نیڑے آ رہیا سی، اوہ ہمیشہ 'ھرنے بے 'تے جاندے سن ، اس لئی کہ مسز سنبری نے آکھیا سی کہ اوتھے تمیز دار لوک ہوندے نے، تے کئی ورھے اوہ اوہس ہی اک تھاں تے رہائش وی رکھدے سن۔ اک شام نوں ہربرٹ نے بڑے عام جئے طریقے نال آکھیا : ' انج ای اک گل اے ، ماں جی، تسیں اوہناں نوں چٹھی لکھ دیو کہ میں اس واری اوہ کمرہ نہیں لینا۔ بییٹی تے میں ویاہ کرن لگے آں تے اسیں ہنی مون واسطے ساؤتھ اینڈ تے جانواں دے۔ '

اک جھٹ لئی تے اوتھے کمرے وچ ڈونگی خاموشی ہو گئی۔

مسز سنبری ذرا ازردہ جہی ہو کے بولی، 'ایہ کجھ چھیتی نہیں ہو گیا؟'

' بییتی دے دفتر والے اپنا عملہ پئے گھٹاندے نے، بییٹی دی نوکری کوئی نہیں رہی، اس لئی اساں سوچیا اے کہ چنگا اے ،اسیں چھیتی ،ویاہ کر لئیے۔ اساں' ڈبینے ' وچ دو کمرے لئے نے تے اسیں ، میری ،اپنی بینک والی بچت وچوں اوہتھے سامان سمون ، پئے رکھنے آں۔ '

مسز سنبری نے اک لفظ وی ناں بولیا۔ اوہنوں تے جیویں مردے وانی ورت گئی تے اتھرو اوہدیاں اکھاں وچوں نکل کے ماڑیاں ماڑیاں گہلاں تے ٹر پئے۔

' اہ ہو اماں جی ، اہنوں ایہڈا بھیڑا ناں سمجھو، ہربرٹ نے آکھیا۔ 'بندے نوں کسے ناں کسے ٹیم ویاہ تے کرنا پیندا اے۔ جے ابا ویاہ ناں کردا تے کیہ اج میں ایتھے ہوندا؟'

مسز سنبری نے بڑی بے صبری نال اپنے منہ توں اتھرو پونجھے ۔ ' تیرے پئیو نے میرے نال ویاہ نہیں سی کیتا، میں اوہس نال ویاہ کیتا سی۔ میں جاندی ساں کہ اوہ بڑا سیانا تے عزت دار اے۔ مینوں پتا سی کہ اوہ اک چنگا گھر والا تے چنگا پئیو ثابت ہووے دا۔ مینوں کوئی پچھتاوا نہیں تے ناں ہی تیرےپئیو نوں اے۔ کیئوں سیمویل ، انج ای گل نہیں؟'

' بیٹرس ، بلکل ٹھیک اے، انج ای گل اے۔' اوہنے چھتی چھیتی آکھیا۔

ہربرٹ،' پتا کیہ گل اے، اماں جی ، توانوں جدوں اوہدا سارا پتا لگ جائے دا تے اوہ توانوں فیر چنگی لگے دی۔ اوہ اک چنگی کڑی اے، سچی۔ مینوں پک اے کہ توانوں پتا لگے دا کہ اوہدیاں بڑیاں شیواں تواڈے نال رلدیاں نے۔ اوہنوں اک موقعا ضرور دیو ، ماں جی ۔'

' اوہ اس گھر وچ پیر نہیں رکھ سکدی ، اس لئی اوہنوں میری لاش توں لنگناں پئے دا۔'

' ایہ تے بڑی فضول گل اے ، ماں ۔ کئیوں ، ہر چیز انج ای رووے دی جے تسیں ذرا عقل کولوں کم لؤ۔ میرا مطلب اے اسیں ہفتے نوں گڈیاں اڈان وی جانواں گے جیویں اگے جاندے ساں۔ سرف اس واری اوکھا اے اس لئی کہ میری منگنی ہوئی اے۔ ویکھو ، اوہنوں نہیں پتا کہ گڈی اڈان وچ کیہ سواداے پر اوہ سمجھ جائے دی۔ تے جدوں میرا ویاہ ہو جائے دا تے فرق پے جائے دا، میرا مطلب اے کہ میں تیرے نال تے ابے نال گڈی اڈان جانواں دا؛ اے گل سمجھ اوہدی اے۔'

' ایہ تیری سوچ اے۔ چنگا ، میں تینوں دہسنی آں کہ جے توں اس بی بی نال ویاہ کیتا تے توں میری گڈی نہیں اڈاویں دا۔ میں کدی وی تینوں نہیں دینی ۔ میں اوہ گھر دے خرچے وچوں بچت کر کے لئی سی، تے اوہ میری اے، لگی سمجھ،'

' چلو فیر ٹھیک اے، تسیں مرضی کر۔ بییٹی آکھدی اے ایہ بچیاں دی کھیڈ اے۔ تے مینوں تے ایس عمر وچ گڈیاں اڈاندیاں شرم اوہنی چاہی دی اے۔'

اوہ اُٹھ کھلوتا تے اک واری فیر غصے نال گھروں باہر ٹر گیا۔ پندرہ دن مگروں اوہدا ویاہ ہو گیا۔ مسز سنبری نے ویاہ وچ شامل ہوں توں انکار کر دتا تے سیمویل نوں وی ڈک چھڈیا۔ اوہ اپنی چھٹی منان گئے تے اوہتھوں مڑ کے گھر آ گئے۔ اوہنا اپنے کم کرنے شروع کر دتے، ہفتے والے دن او ہ آپ ای کھلے میدان وچ گئے تے اپنی بڑی وڈھی گڈی اڈائی ۔ مسز سنبری نے کدی اپنے پتر دی گل وی نہیں سی کیتی، اوہنے پکا فیصلہ کیتا سی کہ اوہنوں معاف نہیں کرنا۔ پر مسٹر سنبری اوہنوں سویر دی گڈی تے ملدا سی، اوہ کجھ چر گل بات کردے سن جے اوہ اک ہی ڈبے وچ بیہ جان تے۔ اک سویر مسٹر سنبری نے اسمان ول ویکھیا، تے اوہ بولیا ،' اج تے گڈیاں آڈان لئی بڑا سوہنا رُت اے۔ '

' تسیں تے اماں ، اجے وی گڈی اُڈاندے او؟ '

' تیرا کیہ خیال اے؟ اوہ تے میرے جنی شیار ہوندی جاندی اے۔ توں اوہنوں ویکھ سکنا ایں ، کنج اپنی قمیض ٹُنگ کے اوہ پہاڑی توں تھلے پجھدی اے۔ قسمیں ، مینوں تے پتا ای نہیں سی کہ اوہدے وچ ایہ ہنر وی ہے اے۔ پجھنا؟ اوہ میرے نالوں ودھ کے پجب سکدی اے۔'

' ابا، مینوں ہنسا تے ناں !

' میں حران آں ، توں اپنی گڈی نہیں لئی، ہربرٹ۔ تینوں تے اپنی گڈی دی بڑی ریج ہوندی سی۔'

' آہو مینوں پتا اے۔مینوں ریج ہندی سی۔ میں اک واری صلاح دتی سی ، تینوں پتا اے ناں بی بیاں دا، پتا اے بییٹی نے کیہ آکھیا،' اپنی عمر دا خیال کر۔' تے ہور پتا نہیں کیہ کیہ۔ میں بالاں والی گڈی تے نہیں سی لینی، تے وڈھیاں والی تے پیسے بُہتے لگدے نیں۔ جدوں اساں گھر سجانا شروع کیتا تے بیٹی نے آکھیا ، سبھ توں ودھیا شے خرید کے تے اخیر تے فیر سستا ای پیندا اے۔ تے فیر اسیں کرائے تے دین والی تھاں تے ٹر گئے۔ مطلب کہ اوہناں نوں ہر مہینے پیسے دینے تے کرایہ وی ۔ میرے کول ہن ہور کوئی پیسہ نہیں سی تے اساں فیر انج ای بندوبست کیتا۔ اوہ آخدے نے دو نوں رکھن تے وی اوہناں ای خرچا اے جہناں اک دا اے، کوئی وادھو نہیں ۔ '

' اوہ نوکری نہیں کردی؟ '

' آہو، اوہ نہیں کردی، اوہنے کئی سال کھوتے آر ( تسیں کہندے اوہ) کم کر کے تے آکھیا ، ہن تے اوہ وہیائی وری اے، اوہ آرام کرنا چاہندی اے، تے نالے گھر دی صفائی تے ہانڈی روٹی لئی کوئی چاہی دا اے۔'

بس انج ای چھ مہینے لنگھ گئے نے، تے فیر اک ہفتے پشلے پہر سنبریز عادت دے مطابق کھلے مدان وچ گئے ، مسز سنبری نے اپنے بندے نوں پچھیا: ' سیمویل، توں وی اوہ ای ویکھیا اے جو منوں دسیا اے؟'

' میں ہربرٹ نوں ویکھیا اے، تیرا اے ای مطلب اے۔ میں تے اس لئی ناں نہیں سی لیا کہ توں پرشان ناں ہوویں۔'

' اوہدے نال گل ناں کریں ، انج ای مکر کر کہ توں اوہنوں ویکھیا ای نہیں۔'

ہربرٹ وہیلے تماش بیناں وچ کھلوتا سی ۔ اوہنے اپنے ماپیاں نال بولن دی کوشش ای نہیں سی کیتی، پر اک شے مسز سنبری دی نظر توں نہیں بچ سکی تے اوہ سی کہ اوہ پوریاں اکھاں کھول کے تے اوہس وڈی گڈی نوں چٹھدیاں ویکھدا سی پیا جہڑی اوہنے آپ وی کئی واری چاڑھی سی۔ سیت ہوں لگ پئی تے سنبریز گھر ٹر گئے۔ مسز سنبری دے مونہ تے کینہ صاف پیا دسدا سی۔

سیمویل بولیا ،' میں پیا سوچنا ہوورے اوہ اگلے ہفتے وی آوے دا۔

، جے میری شرط غلط ناں ہو گئی ، میں چھ روپے دی شرط لانی آں اوہ آوے دا، سیمویل۔ میں اودوں دی اس ٹیم نوں ای اُڈیکدی ساں پئی۔'

' توں اُڈیکدی سیں؟'

' مینوں شروع توں ای پتا اے کہ اوہ اس کم توں دور نہیں رہ سکدا۔'

اوہ بلکل ٹھیک آخدی سی پئی۔ اگلے ہفتے تے اوہس توں مگروں ہر ہفتے ، جدوں رُت چنگی ہوندی سی، ہربرٹ اوتھے کھلے مدان وچ آ جاندا سی۔ کوئی آپس وچ گل بات ناں ہوئی۔ اوہ بس اوہتھے تھوڑا چر کھلوندا، ویکھدا تے فیر پرانہہ ٹر جاندا سی۔ پر جدوں اس طرحاں کئی ہفتے لنگھ گئے، تے سنبریز کول اوہدے لئی اک سرپرائز / اچنبھے دی گل سی۔ اوہ اوہ والی پرانی وڈھی گڈی نہیں سن پئے اڈاندے بلکہ اک نویں ، ڈبہ گڈی ، ذرا چھوٹی ، اوہس نونے تے بنی جس دا ڈیزین اوہنے آپ بنایا سی۔ اوہنے ویکھیا کہ اوہ گڈی وچ دوجے گڈیاں والے بڑی دلچسپی

پئے لیندے سن؛ اوہ اوہدے دوالے کھلوتے سن، تے مسز سنبری کھلا ڈلھا پئی بولدی سی۔ پہلی واری جدوں سیمویل اوہنوں لے کے ٹبے توں تھلے ول پجھیا تے اوہ اُڈی ناں، پیڑی فیل ہوئی ۔ ۔۔۔۔ اوہ ہ تھلے آ گئی اے، اوہنے اپنے دوویں ہتھ ملے تے اپنے دند پیی لئے۔ اوہ اوہنوں ناکام ہوندا ویکھ نہیں سی سکدا۔ مسٹر سنبری فیر توں ٹبے تے چڑیا تے دوجی واری ڈبہ گڈی نے ہوا پھڑ لئی ۔ کول کھلوتے لوکاں نے تاڑیاں وجائیاں/ خوش ہوئے۔ تھوڑے چر مگروں مسٹر سنبری نے اوہنوں تھلے کھچیا، تے واپس مڑیا، تے فیر ٹبے ول ٹر گیا۔ مسز سنبرے اپنے پتر ول گئی۔

، ہربرٹ ، توں اک واری لینی ایں؟ '

اوہدا تے جیویں ساہ اے اڑ گیا۔

، آہو اماں جی ، مینوں لینی چاہی دی اے۔'

' ایہ نکی جہی اے، ایدا ول سکھنا پئے دا۔ ایہ پرانی ورگی نہیں۔ پر اساں ایہدوں وڈھی دیاں چنگیایاں پچھیاں نیں ، آخدے نے جدوں توانوں ایہدی سمجھ آ جائے تے ہوا وی ٹھیک ہووے تے تسیں ایہنوں دو میل تک چڑھا سکدے او۔ '

مسٹر سنبری وی اوتھے آ گیا۔

' سیمویل ، ہربرٹ گڈی دی واری لینا چاہندا اے۔'

مسٹر سنبری نے گڈی اوہنوں پھڑا دتی، اوہدے مکھڑے تے مسکراہٹ سی، تے ہربرٹ نے اپنا ٹوپ اپنی ماں نوں پھڑا دتا۔ فیر اوہنے ٹبے توں تھلے ناں دوڑ لا دتی ، گڈی نے بڑی ودھیا ہوا لئی تے جدوں اوہنے اوہنوں اُڈدیاں ویکھیا تے اوہدا دل خوشی نال بھر کتا۔ اوہس نکی جہی کالی شے نوں اڈدیاں ویکھنا بڑی گل سی، پر جدوں اوہ اوہنوں پیا چڑھاندا سی تے اوہ اوہس وڈی گڈی دا پیا سوچدا سی جہڑی اوہناں بنا لئی ہونی سی۔ ہُن اوہ کدی وی ایہ کم نہیں کر سکن دے۔ واہ جی واہ ، ماں نے آکھیا سی دو میل ہوا وچ ! مسز سنبری نے آکھیا ،' توں ،کیوں ،نہیں آ کے چاہ دا کپ پی لیندا ، تے اسیں تینوں وکھواں دے ، نویں گڈی دا دزین ، جہڑا اوہ سانوں بنا کے دین دے۔ ہوورے توں کوئی صلاح / مت ای دے لویں۔ اوہ ذرا چَکیا۔ اوہنے بییٹی نوں دسیا سی کہ اوہ ذرا لتاں سیدھیاں کرن چلا اے، اوہنوں نہین سی پتا اوہ ایس کھلے میدان وچ ہر ہفتے اوہدا اے، تے اوہ اوہنوں اُڈیکدی ہووے دی۔ پر ایہ کھچ وی چھڈی نہیں سی جا سکدی۔

اوہنے آکھیا،' جے میں آ جانواں تے مینوں تے بھیڑا نہیں لگے دا۔'

چاہ توں مگروں اوہناں نے اوہدیاں خاص خاص خوبیاں بارے گل کیتی۔ گڈی بہت وڈھی سی، اوہدے پرزے ایسے سن کہ اوہنے پہلاں نہیں سن کدی ویکھے، تے اوہدے تے پیسہ وی بڑا لگنا سی۔

اوہنے آکھیا،' تسیں آپی تے اینوں نہیں اُڈا سکنا،'

' اسیں کوشش / جتن تے کر سکنے آں۔'

' میں پیا سوچنا کہ توانوں چنگا نہین لگنا جے میں توانوں ہتھ پوانواں ؟' اوہنے ذرا بھیڑا پے کے آکھیا۔

مسز سنبری نے جواب دتا، ایہ بھیڑا خیال تے نہیں ہو سکدا ۔'

اوہ گھر اپڑیا تے بڑا چر ہو گیا سی، اوہدی سوچ توں وی ودھ، تے بییٹی رنج سی۔

توں جتھے وی سیں ،ہرب؟ میں سمجھی توں مر گیا ایں۔ شام دی روٹی تے ہور وی ہر شے تینوں پئی اُڈیکدی سی۔'

' مینوں کجھ یار مل پئے سن تے میں گلاں کرن لگ پیا ساں۔'

اوہنے بڑی ترکھی نظر نال اوہدے ول ویکھیا تے پر کجھ ناں کہیا۔ اوہ سڑ بل گئی۔ روٹی کھا کے اوہنے آکھیا فلم ویکھن چلئے پر بییٹی نے ناں کر دتی۔

' توں ٹر جا جے تیرا دل اے ،' اوہ بولی۔' مینوں کوئی پرواہ نہیں ۔'

اگلے ہفتے اوہ فیر کھلے مدان وچ ٹر گیا تے فیر اوہدی ماں نے اوہنوں گڈی اُڈان لئی دتی۔ اوہناں نویں بننی دتی سی ۔ تے تن کو ہفتے لگ جانے سن اوہدے بنن تے۔ اوہدی اماں نے اوہنوں آکھیا :' الزبتھ ایتھے وے ۔'

'بییٹی ؟'

' تیری جاسوسی لئی۔'

اوہ اک دم بھیڑا پے گیا ، پر بڑا پکا بنیا رہیا۔

' کرن دے سو جاسوسی ، مینوں کوئی پرواہ نہیں ۔'

اوہ کجھ کبھرا گیا سی تے اپنے ماپیاں نال چاہ پین نہیں سی گیا۔ اوہ سدھا گھر گیا، بییٹی اوہنوں پئی اُڈیکدی سی۔

' اچھا ، ایہ نے اوہ یار جنہاں نال توں گلاں پیا کردا سیں۔ مینوں کجھ چر شک رہیا سی کہ توں ہر ہفتے پشلے ٹیم سیر کرن ٹر پیناں ایں ۔ تے اک دم مینوں ایہ خیال آیا۔ گڈی پیا اڈاندا سیں ، توں ، اک وڈھا بندا۔ تھو، چھی !

' مینوں کوئی پرواہ نہیں توں جو مرضی آخ اینوں ۔ مینوں چنگا لگدا اے، تے جے تینوں نہیں پسند تے توں ایہنوں چھڈ دے۔' '

' میں انج نہیں کرنا تے میں تینوں سیدھی گل دس دیاں ، میں تینوں وی بے وقوف نہیں بنن دیناں ،'

' میں جدوں اک بال ساں اودوں توں لے کے ہُن تک میں ہر ہفتے ،پشلے ٹیم گڈی چڑھاندا رہیا وان، تے میں اوہدوں تک گڈی چاڑھاں دا جدوں تک میرا دل کرے دا۔'

' ایہ اوہ ای بڈھی اے ( اوہنے اوہنوں گال کڈی) ، اوہ تینوں میرے توں دور پئی کردی اے۔ میں پتا اے اوہدا۔ توں جے بندا ، ہوندا تے توں کدی اوہدے نال گل وی ناں کردا، جیویں اوہنے تیرے نال ورتیا ، اوہدوں مگروں تے تینوں اوہدے نال بولنا ای نہیں سی چاہی دا۔'

' میں تینوں اجازت نہیں دے سکدا کہ توں اوہنوں انج آکھیں۔ اوہ میری ماں ایں تےاوہنوں ملنا میرا حق اے۔ جتھے تے جدوں میری مرضی ہووے۔ '

لڑائی کئی گھنٹے چلدی رہی۔ بییٹی چیک چیک کے اوہدے نال گل کردی رہی، تے ہربرٹ وی اوہدے نال اُچی اُچی بولدا رہیا۔ اوہ دوویں ضد دے پکے سن ، تے اوہناں دے نکے نکے چگھڑے رہندے سن، پر ایہ اوہناں دی پہلی سنجیدہ لڑائی سی۔ اوہ اتوار والے دن وی آپس وچ ناں بولے، تے اگلا پورا ہفتہ وی، ویسے اُتوں اُتوں اوہ سکون وچ ای سن، پر اوہناں دا آپس وچ کینہ ودھ گیا ۔ ہویا اس طرحاں کہ اگلے دو ہفتے والے دناں نوں بڑا مینہ پیا۔ بییٹی مینہ ویکھ تے اپنے آپ وچ ای ہنسی، پر ہربرٹ خوش نہیں سی ہویا تے اوہنوں ظاہر ناں کیتا۔ اوہناں دی لڑائی دی یاد تھوڑی مَٹھی پے گئی۔ دو کریاں وچ رہ کے تے اک بستر تے سوں کے اے نہیں سی ہو سکدا کہ اوہ اپنے اختلاف ناں بھُل جان۔ بییٹی اپنی عادت دے خلاف ہرب نال بڑی چنگی بن گئی سی، تے اوہنے سوچیا کہ ہن اوہنے اپنی زبان دے سواد دا اوہنوں چسکا لوا دتا اے، تے اوہنوں پتا سی کہ اوہ کسے کولوں ہارن والی نہیں، تے اوہنوں سیانا بننا پیا۔ اوہ اپنے حساب نال اک چنگا گھر والا سی، پیسے ولوں ہتھ کھلا سی تے مستقل مزاج وی سی۔ اوہنوں ٹیم دیو تے اوہ آپ سبھ کجھ ٹھیک کر لئے دی۔

پر دو ہفتیاں دے خراب رُت توں مگروں موسم صاف ہو گیا۔

' ویکھ ، لگدا اے ، کل گڈیاں اُڈان لئی چنگی رُت ہووے دی ،' مسٹر سنبری نے آکھیا جدوں اوہ پلیٹ فارم تے گڈی / ٹرین پیا اُدیکدا سی۔ ' نویں گڈی وی آ گئی اے۔'

' اوہ آ گئی اے؟'

' تیری ماں نے آکھیا اے، اسیں تے ضرور اے چاہواں دے کہ توں آویں تے گڈی اڈان وچ سانوں ہتھ پوانویں، پر کسے نوں ایہ ھق نہیں کہ اوہ میاں بیوی/ بندے تے اوہدی زنانی دے وچ آوے، جے توں بییٹی توں ڈرنا ایں ، کہ اوہ رولا پاوے دی، تے میرا مطلب اے توں فیر ناں ناں آویں تے چنگا اے۔ اوتھے کھلے مدان وچ اک جوان منڈا اے ، جہڑا اس کم دا شدائی اے، اوہنے آکھیا سی جے کوئی ناں ہویا تے اوہ گڈی اُڈا لئے دا۔

ہربرٹ دے اندر تے ساڑھے دی اگ بل پئی۔ ' کسے بغانے نوں اپنی گڈی نوں ہتھ وی ناں لان دیا جے۔ میں بس اوہتھے آ جاں دا۔ '

' چنگا ، توں فیر سوچ لے، ہربرٹ ، تے جے توں ناں اپڑیا تے اسیں سمجھ جانواں دے۔ '

'میں ضرور آنواں دا۔' ہربرٹ بولیا۔

بس فیر اگلے دن جدوں اوہ شہروں مڑ کے آیا تے اوہنے اپنے دفتر والے کپڑے بدلے تے ڈھلے ڈھالے کپڑے تے پرانا کوٹ پا لیا ۔ بییٹی اندر آئی ، 'کیہ پیا کرنا ایں؟'

' کپڑے پیا بدلنا۔' اوہنے خوش ہو کے جواب دتا۔ اوہ ایڈا خوش سی کہ اپنا راز ناں رکھ سکیا۔ ' نویں گڈی آئی اے ، تے میں اوہ اُڈان چلا واں۔' ' اوہ ہو ،نہیں ، توں نہیں جانا،' اوہنے آکھیا ، ' میں ایہ نہیں ہون دینا۔'

' کملی ناں بن بییٹی۔ میں چلا واں ، میں تینوں دسیا اے، تے جے تینوں ایہ نہیں پسند تے توں کجھ ہور کم کر لے۔'

' میں تینوں نہیں جان دینا، بس ایہ ای گل اے۔'

اوہنے بوہا ماریا تے آپ اوہدے اگے کھلو گئی۔ اوہدی اکھاں وچوں جیویں اگ پئی نکلدی سے ، تے اپنا منۃ گھٹیا سی۔ اوہ تے نکی جہی سی تے اوہ لماں تگڑا بندا سی۔ اوہنے اوہنوں دؤواں بانہواں توں پھڑیا تے راہ توں ہٹا لیا ، پر اوہنے اوہنوں اودی لت ( پینی ) تے بڑا ڈھاڈھا ٹھڈا ماریا۔

' توں چاہنی ایں میں تینوں منہ تے مکا مارا؟'

' جے توں گیا تے فیر مڑ کے ناں آویں ،' اوہ چیک کے اُچی بولی۔

اوہنے اوہنوں چُکیا ، تے بسترے تے جا سُتیا ، تے باہر نکل گیا۔ اُنج اوہ چھڈاندی رہی تے ٹھڈے وی ماردی رہی۔

جے ڈبہ گڈی نے اوہس مدان وچ بڑی ڈھم مچائی سی تے اس نویں نے اوہدوں کئی حصے ودھ کم کیتا۔ پر اوہ سانبھنی اوکھی سی، اوہ اُنج بڑا پجھے، ساہ وچ چڑھ گیا تے دوجے لوک وی جوش نال ہتھ پواندے رہے، ہربرٹ اوہنوں چاڑھ ناں سکیا۔

' کوئی گل نہیں ،' اوہنے آکھیا، اسیں ہن ای ایدھا ول سکھ لاں دے ۔ گل بس اینی اے کہ اج ہوا ٹھیک نہیں ۔'

اوہ اپنے ماں تے پئیو نال مڑ کے چاہ پین ٹر گیا تے اوہ گلاں کردے رہے جیویں اوہ اگے کردے ہوندے سن۔ اوہنے جان وچ آپی چر لایا کہ بییٹی نے جو کرنا سی اوہ اوہنوں ویکھنا نہیں سی چاہندا، پر جدوں مسز سنبری شام دی ہانڈی روٹی لئی باورچی خانے وچ گئی اوہنوں گھر جانا پیا۔ بییٹی اخبار پئی پڑھدی سی۔ اوہنے اوہتانہہ ویکھیا۔

' تیرا بیگ بندھ دتا اے،' اوہ بولی۔

' کیہ ، میرا ؟ '

' جو میں آکھیا سی توں سنیا سی، میں آکھیا سی جے توں گیا تے تینوں مڑ کے اؤن دی لوڑ نہیں۔ مینوں تیریاں گلاں بھل گیاں سن۔ ہر شے بندھ دتی اے، اوہ سؤ ن والے کمرے وچ اے۔'

اوہنے کجھ چر اوہدے منہ ول حرانی نال ویکھیا۔ اوہنے مکر کیتا کہ اوہ فیر پڑھن لگ پئی سی۔ ہربرٹ اوہنوں چنگی طرحاں ودھیا کرنا سی۔

' چل ٹھیک اے، توں اپنی مرضی کر،' اوہنے آکھیا

اوہ کمرے وچ گیا ، اوہدے کپڑے اک سوٹ کیس وچ رکھے گئے سن ، تے اک بھورے رنگ دے لفافے وچ اوہنے باقی چیزاں رکھیاں سن۔ اوہنے اک ہتھ وچ بیگ پھڑیا تے لفافہ دوجے ہتھ وچ پھڑیا، تے اک وی لفظ بولن تون بغیر وچلے کمرے وچوں لنگھیا، تے گھروں باہر نکل گیا۔ اوہ ماں دے گھر گیا تے گھنٹی وجائی ۔ ماں نے بوہا کھولیا۔

' میں گھر ا گیاں ، اماں ،' اوہنے آکھیا۔

ہربرٹ ، توں آ گیا ایں؟ تیرا کمرہ اگے ای تیرے لئی تیار اے۔' اپنیاں شیواں تھلے رکھ تے آ جا۔ اسیں اجے روٹی کھان بیٹھے ای ساں ۔' اوہ کھانے والے کمرے وچ ٹر گئے۔ سیمویل ،، ہربرٹ گھر آ گیا اے۔ پجھ کے جا تے اک پا کو بئیر ( شراب )لے آ،'

روٹی کھاندیاں ہویاں تے باقی دی شام دے ٹیم اوہنے اوہناں نوں بییٹی دے نال جہڑا مسئلہ سی اوہ دسیا۔

' ٹھیک اے ، ہر برٹ توں اوتھوں نکل آیا ایں ، بڑا چنگا کیتا اے۔' مسز سنبری نے آکھیا۔

' میں تینوں دسیا سی اوہ زنانی تیرے لئی چنگی نہیں سی۔ عام سی اوہ اُکا ، کٹا ہ تے سواہ، تے تیری تے ہمیشہ توں پرورش بڑی ودھیا ہوئی سی۔'

اوہنوں اپنے بسٹرے تے سؤن دا سواد آیا، اوہ بسترا ، تے اتوار نوں سویرے ناشتے لئی تھلے اونا، بغیر داڑھی منن توں ، بغیر نہان توں تے اخبار نیوز آف دی ورلڈ پڑھنا ،جس دا اوہ ساری حیاتی عادی سی۔

' اج اساں گرجے نہیں جاناں ،' مسز سنبری نے آکھیا ۔ ' توں پرشان ایں، ہربرٹ؛ اج اسیں سارے ارام کراں دے۔ '

اوہس ہفتے اوہناں گڈی دیاں گلاں کیتیاں تے اوہناں بییٹی دے بارے وی بڑیاں گلاں کیتیاں۔ اوہناں گل بات کیتی کہ اوہ ہن اگوں کیہ کرے دی ۔

مسز سنبری بولی،' اوہ تینوں موڑن لئی جتن کرے دی۔'

ہربرٹ نے آکھیا ،' اوہنوں اس کم دا واہ واہ موقعا لگا اے،'

' تینوں خرچہ تے دینا پئے دا' اوہدے پئیو نے آکھیا۔

' کئیوں ! ا یہنوں کئیوں دینا چاہی دا اے۔ ' مسز سنبری بڑا چیک کے بولی

' اوہنے پہلاں ایہنوں ویاہ دے جال وچ پھسایا تے ہن ایہنوں اوہس گھر وچوں کڈھ دتا جہڑا ایہنے اوہدے واسطے بنایا سی۔'

' میں اوہنوں دیاں گا جو مناسبھ اے اوہدوں تک جدوں تک اوہ مینوں کلیاں چھڈ دیوے۔ '

اوہ ہر روز پہلاں نالوں بوہتا آرام مسوس کردا سی ، در اصل اوہنوں لگن لگ پیا سی کہ اوہ کدی ایتھوں گیا ہی نہیں سی۔

اوہ انج ٹک گیا جیویں کوئی کتا اپنی ٹوکری وچ آ کے ہوندا اے؛ بڑا چنگا لگدا سی جدوں اوہدی ماں اوہدے کپڑے صاف کردی سی تے اوہدیاں جراباں سینندی سی ؛ اوہ اوہنوں اوہدی مرضی دی شے کھان لئی دیندی سی جیہی اوہ ہمیشہ کھاندا سی۔؛ بییٹی بے تکا کھانا پکاندی سی، شروع وچ تے بڑا شغل لگدا سی جیویں پک نک/ تفریع تے آئے نے پر اوہ انج دا کھانا نہیں سی ہوندا کہ اک بندے نوں اوہدا چسکا لگ جائے۔ تے اوہ اپنی ماں دے نظریے وچوں باہر نہیں سی نکلیا کہ تازی خوراک ڈبیاں والے کھانے نالوں ،بوہتی چنگی ہوندئ اے۔ اوہ ڈبے والی سیلمن مچھی ویکھ ویکھ کے سوڑا پے گیا سی/ اک گیا سی۔ فیر ایہ وی چنگی گل سی کہ پھرن ٹرن لئی تھاں سی اودوں ول کہ بندا دؤں کمریاں وچ ڈکیا رہوے ، جنہاں وچوں اک باورچی خانہ وی ہووے۔

' ماں ، میں زندگی دی سبھ توں وڈھی غلطی کیتی ، ایہ گھر چھڈ کے۔' اک واری اوہنے اپنی ماں نوں دسیا۔

' مینوں پتا اے ہربرٹ، پر ہن توں مڑ کے آ گیا ایں تے ہن تیرے کول فیر گھر چھڈن دی کوئی وجہ نہیں۔'

اوہدی تنخواہ جمعے والے دن لبھدی سی شام ویلے جدوں اوہناں نے اجے روٹی کھادی سی تے گھنٹی وجی۔

' ایہ اوہ ہی اے،' اوہ سارے اک اواز وچ بولے۔

ہربرٹ دا تے رنگ اُڈ گیا اوہدی ماں نے اک نظر اوہدے ول ویکھیا ،' توں ایہ میرے تے چھڈ دے، اوہنے آکھیا۔ ' میں ایہنوں ویکھ لواں دی۔'

اوہنے بوہا کھولیا۔ بییٹی برونہہ تے کھلوتی سی۔ اوہنے دھکے نال اندر اوہن دی کوشش کیتی پر مسز سنبری نے اوہنوں ڈک لیا۔

' میں ہرب نوں ملنا چاہنی آں۔'

' توں نہیں مل سکدی۔ اوہ باہر گیا اے،'

' نہیں ، اوہ باہر نہیں۔ میں آپ اوہنوں اپنے پئیو نال اندر اوہدیاں ویکھیا اے تے اوہدوں مگروں باہر نہیں نکلیا۔ '

' چنگا فیر ، اوہ تینوں ملنا نہیں چاہندا، تے جے توں رولا رپا پایا تے میں پلس نوں سدھ لوا ں دی۔'

' مینوں میرا ہفتے دا خرچا چاہیدا اے۔'

' بس ایہ توں اوہدے کولوں چاہنی ایں ۔ ' اوہنے اپنا بٹوہ کڈھیا۔' ایہ لے پینتی روپئے ۔'

' پینتی روپئے؟ باراں روپئے تے نرا کرایہ ای ااے۔'

' تینوں بس ایہ ای لبھنا ایں ۔ نہیں تے کیہ ، اوہنے ایتھے رہن دا خرچہ نہیں دینا ؟ '

بییٹی بولی ،' فیر فیر نیچر دی قسط وی اے۔'

' جدوں ویلا آوے دا تے اسیں اوہنوں ویکھ لواں دے ۔ تینوں ایہ پیسے چاہی دے نے کہ نہیں ؟'

پرشان ، انج تے ہاری ہوئی ، بییٹی ڈانواں ڈول کھلوتی رہی۔ مسز سنبری نے دھکے نال پیسے اوہدے ہتھ وچ پھڑائے تے تھاہ کر کے بوہا مار لیا۔ اوہ مڑ کے کھانے والے کمرے وچ ٹر گئی۔ ' میں رولا مکا آئی آں۔'

گھنٹی فیر وجی ، تے وجدی گئی، پر اوہناں جواب ناں دتا، تے فیر اوہ کھلو گئی۔ اوہناں حساب لایا بییٹی ٹر گئی اے۔

اگلے دن رُت واہ واہ سی ، ہوا دا ڑخ تے رفتار ٹھیک سی، تے ہربرٹ نوں دو ، ترے واری ناکام ہون توں مگروں پتا لگا کہ اوہدے وچ وڈھی ڈبہ گڈی اڈان دا ول ہے اے۔ اوہ ہوا وچ اوتانہہ گئی تے اُچی ہوا اُچی ہوندی گئی جدوں اوہنے ڈور چھڈی۔

' کیوں جی ، ایہ ویکھو، اک گز وی دور ہووے تے انج لگدا اے اک میل اُچی لگدی اے۔،' اوہنے بڑا خوش ہو کے آکھیا۔

اوہنے اپنی ساری حیاتی اے سواد نہیں سی چکھیا۔ کئی ہفتے لنگھ گئے ، اوہناں نے بییٹی لئی اک چٹھی دی کہانے گھڑی، جہدے وچ ہربرٹ ولوں لکھیا سی ، اوہنے بییٹی نوں دسیا سی کہ جنہاں چر اوہ اوہدے ٹبر نوں نہیں چھیڑن لگی اوہنوں اپنا خرچہ پینتی روپئے ، ہر ہفتے سویرے ، ڈاک وچ لبھ جائے کرے دا۔ تے اوہ فیر نیچر دی قسط وی دیوے دا جدوں ٹیم آیا۔ مسز سنبری اس گل دے بڑی خلاف سی۔ ، پر مسٹر سنبری نے ، پہلی واری اوہدے نال اختلاف کیتا ، تے ہربرٹ نے وی آکھیا کہ ایہ ٹھیک اے۔ اوہدوں تک ہربرٹ نے نویں گڈی دا ول سکھ لیا سی، تے اوہدے نال کئی کرتب کر لیندا سی۔ اوہنے ہن دوجے گڈی بازاں نال مقابلے لانے چھڈ دتے ۔ اوہ اوہناں توں اگے لنگھ گیا سی۔ ہفتہ پشلا پہر اوہدے لئی بڑی شان دا ٹیم سی۔ اوہ کول کھلوتے لوکاں دیاں گلاں تے تعریفاں دا سواد پیا لیندا سی ، تے جہڑا دوجے لوکاں نوں ساڑا لگا سی اوہد ے تے وی خوش پیا ہندا سی۔ ۔ فیر اک شامیں جدوں اوہ اپنے باپ نال سٹیشن توں گھر ول پیا اوہدا سی ، بییٹی نے اوہدا راہ ڈک لیا۔ ' ہیلو ، ہربرٹ،' اوہ بولی ۔۔' ہیلو،'

' میں اپنے بندے نال کلیاں گل کرنی ایں، مسٹر سنبری۔'

' کوئی ایسی گل نہیں ، جہڑی توں میرے نال کرنی اے ، اوہ میرا باپ نہیں سن سکدا۔' ہربرٹ نے سختی نال آکھیا ۔

اوہ ذرا چَک گئی۔ مسٹر سنبری وی اگانہہ پشانہہ ہویا ، اوہنوں سمجھ ناں آئی کہ میں کھلوواں کہ جانواں۔

' چل ٹھیک اے، فیر ، ' اوہ بولی۔ ' میرا دل اے توں گھر ا جا، ہرب۔ اوہس راتیں ، جدوں میں تیرا سامان بھنیا سی ، میرا ایہ مطلب نہیں سی۔ میں تے بس تینوں ڈران لئی کیتا سی۔ مینوں غصہ لگا سی۔ میں جو کیتا اوہدی معافی منگنی آں ۔ اک گڈی توں لڑنا تے بڑی بے وقوفی اے۔'

' ہلا، میں مڑ کے نہیں اوناں ، ویکھ، جدوں توں مینوں باہر کڈھیا توں تے میرا بھلا کر دتا۔ '

بییٹی دیاں اکھاں وچوں اتھرو ٹپ ٹپ ڈگن لگ پئے۔

' پر میں تے تیرے نال پیر کرنی آں ، ہرب۔ جے توں اپنی اوہ بے سری پرانی گڈی چڑھانا چاہنا ایں تے چڑھا لے۔ مینوں کوئی پرواہ نہیں توں جدوں مرضی گھر آ ویں۔'

' تیرا بڑا بڑا شکریہ، پر ایہ کوئی چنگی گل نہیں ۔ مینوں پتا ایہ ، کدوں میرا ہتھ سوکھا ہووے دا تے میں ساری حیاتی لئی ویاہ کرلواں دا۔ چل آ ، ابا ، چلئے۔'

اوہ کہالی کہالی ٹر پئے تے بییٹی نے اوہناں دا پچھا ناں کیتا۔ اگلے اتوار اوہ گرجے گئے تے رات دی روٹی کھا کے ہربرٹ اک نظر ویکھن لئی ، کولے والے شیڈ تے گیا جتھے اوہ گڈی رکھدے سن، اوہ اوہدے توں دور رہ نہیں سی سکدا۔ اوہ ، اوہدے نال پیار کردا سی۔

اک منٹ وچ اوہ پشانہہ نوں پجھیا ، اوہدا رنگ فک ہو گیا سی، اوہدے ہتھ وچ اک سوٹی سی۔

' اوہنے اوہنوں تروڑ مروڑ دتا سی۔ اوہنے ایہدے نال ایہ کم کیتا اے۔'

سنبریز نے بڑی گھبراہٹ نال چیکاں چاریاں تے چھیتی چھیتی کولیاں والے کمرے وچ گئے۔ ہربرٹ نے جو دہسیا سی اوہ سچ سی۔ اوہدے تے سوٹی نال وحشیاں آر حملہ کیتا گیا سی، لکڑی دا ٹانچہ تے سارا ٹوٹے ٹوٹے ہو گیا سی، ریل وی تروڑ دتی گئی سی۔

' اوہنے ایہ کم اوہدون کیتا ہونا ایں جدوں اسیں گرجے گئے ساں ۔ ۔ سانوں جاندیاں ویکھ لیا ہونا ایں، اوہنے ایہ ای کم کیتا اے۔'

' پر اوہ اندر کنج آئی ؟ ' مسٹر سنبری نے پچھیا۔

' میرے کول دو چابیاں سن ۔ جدوں میں گھر آیا ، مینوں پتا لگ گیا کہ اک گواچ گئی اے، پر میں اوہدے بارے ناں سوچیا ۔'

' تینوں ایہ کنج پک اے کہ اوہنے ای کیتا اے، کوئی ہور کھملے مدان وچ وی لوک ایہدے توں سڑدے سن، میں اوہناں تے وی شک کر سکنا۔ '

' ہلا، ٹھیک اے، چھیتی پتا لگ جائے دا،' ہربرٹ نے آکھیا۔ ' میں جا کے اوہنوں پچھاں دا، تے جے اوہنے ایہ کم کیتا اے تے میں اوہنوں جانوں مار دینا ایں۔'

اوہدا غصہ ایہڈا خوفناک سی تے مسز سنبری ڈر گئی۔

' تے توں آپی پھائے لگ جا ، اوہنوں مار کے؟ نہیں ہربرٹ ۔ میں تینوں نہیں جان دینا۔ اپنے پئیو نوں جان دے، تے جدوں اوہ مڑ کے آوے دا تے فیر ویکھاں گے کیہ کرنا ایں۔'

' ایہ ٹھیک اے ہربرٹ ، مینوں جان دے۔'

اوہنوں سمجھانا برا اوکھا کم سی تے بڑا ٹیم لگا ۔ فیر اخیری ، مسٹر سنبرے گیا۔ ادھے گھنٹے مگروں اوہ گھر مڑیا۔ ' آہو، اوہنے ہی اے کم کیتا اے۔' اوہنے صاف صاف مینوں دہس دتا اے۔ اوہنوں اس کم تے بڑا غرور اے۔ میں اوہ زبان نہین دہرانا چاہندا ، جہڑی اوہنے بولی اے، میں تے چنگا بھلا ٹھٹھمبر گیا ساں، قصہ مختصر ایہ کہ اوہ گڈی توں سڑدی اے۔ اوہ آخدی اے ، ہربرٹ اوہدے نالوں ودھ کے گڈی نال پیار کردا اے تے ایس لئی اوہنے اوہنوں بھن تروڑ چھڈیا اے تے جے اوہنوں اے فیر کرنا پیا تے اوہ فیر دوجی واری وی کرے دی۔ '

' اوہدی قسمت چنگی اوہنے مینوں نہیں ایہ گل دسی، میں تے اوہدی دھون مروڑ چھڑنی سی بھانویں میں پھائے لگ جاندا۔ ہلا، ٹھیک اے ، فیر ہن اوہنوں میرے کولوں اک پیسہ وی نہیں لبھن لگا ، بس ٹھیک اے۔'

' اوہ تیرے تے مقدمہ کر دے گی،' اوہدا باپ بولیا۔

' کرن دے سو۔'

' فرنیچر دی قسط اگلے ہفتے جمع ہونی ایں، ہربرٹ،

' مسز سنبری نے ہولی جہیا آکھیا۔ ' تیری تھاں تے میں تے نہیں دینی۔'

' فیر اوہ بس چُک کے لے جان دے۔' سیمویل بولیا۔ ' تے سارا پیسہ جہڑا ہن تک دتا اے اوہ گواچ / وانجیا جائے دا۔'

'ہلا، فیر ہن؟ 'اوہنے جواب دتا۔

مسز سنزری نے آکھیا ، ' اوہ ایناں جر سکدا اے، اوہنے ہمیشہ لئے اوہدے توں جان چھڈا لئی اے، تے وڈھی گل اے وے کہ سانوں ایہ مڑ کے لبھ گیا اے۔'

مینون دو پیسیاں دا کوئی بھار نہیں،' ہربرٹ نے آکھیا۔ 'میں اوہدی شکل ویکھ سکنا ، جدون اوہ ا کے اوہدا سامان چُک کے لے جان گے ۔ ایہ اوہدے لئی بڑی وڈھی گل ہو جانی ایں، تے پیانو ، تے بڑی سوغات سی اوہدے لئی۔ بڑا نایاب خزانہ۔'

بس فیر اگلے جمعے نوں اوہنے بییٹی نوں اوہدا ہفتہ وار خرچہ ناں گھلیا، تے جدوں اوہنے فرنیچر والیاں دی چٹھی اوہنوں گھلی، کہ جے اوہنے فلانی تریخ تک قسط ناں دتی تے اوہ سامان چُک لین دے، اہوہنے جوابی چٹھی لکھی کہ اوہدے حالات چنگے نہیں تے اوہ قسط نہیں دے سکدا، تے اوہ اپنی سہولت ویخ کے سامان چُک لین۔ بییٹی سٹیشن تے جا کے اوہنوں اُڈیکن لگی سی، تے جدوں اوہنے اوہدے نال گل ناں کیتی تے اوہ ، گلی وچ ،اُچی اُچی ، گہالاں کڈدیاوہدے پچھے ٹر پئی۔ شام ویلے اوہ آ کے اوہناں دی گھنٹی اینی وجاندی سی کہ اوہناں نوں لگدا سی اوہناں دا دماغ پھر جائے دا، تے مسٹر تے مسز سنبری بڑے وخت نال ہربرٹ نوں باہر جان توں ڈکدے سن کہ اوہ باہر جا کے بییٹی نوں ناں کدرے مارے کُٹے ناں ۔ اک واری اوہنے اک وٹا ماریا تے بیٹھک دی باری دا شیشہ ٹٹ گیا ۔ اوہ بڑے واہیات تے گھٹیا پوسٹ کارڈ اوہدے دفتر وچ گھلدی رہی۔ اخیری اوہ میجسٹریٹ دی عدالت وچ گئی تے شکیت لائی کہ اوہد ے بندے نے اوہنوں چھڈ دتا اے تے خرچہ وی نہیں دیندا۔ ہربرٹ نوں عدالتی سمن آ گئے۔ اوہناں دوواں نے اپنی کہانی سنائی تے میجسٹریٹ نے نوں جے اوپری لگی وی سی تے اوہنے ظاہر ناں کیتا۔ اوہنے اوہناں دوواں دی صلح کران دا جتن کیتا، پر ہربرٹ ناں کر دتی تے اوہدے تے اَڑ گیا کہ میں مڑ کے ایہدے کول نہیں جانا۔ میجسٹریٹ نے اوہنوں حکم دتا کہ بییٹی نوں اک ہفتے دے پنجی روپئے خرچہ دیا کرے۔ اوہنے کہیا کہ اوہنے اوہ وی نہیں دینے۔

' فیر توں جیل وچ ای جائیں دا،' میجسٹریٹ نے ا کھیا۔

' اگلا کیس ،'

پر ہربرٹ نے جو گل ہے سی اوہ ای کیتی سی۔ بییٹی دی شکیت تے اک واری فیر میجسٹریٹ نے اوہنوں بلایا، تے وجہ پُچھی کہ اوہنے حکم تے عمل کیوں نہیں کیتا۔

'میں آکھیا اے کہ میں نہیں خرچہ دینا تے میں نہیں دینا ، میری گڈی ایہنے تروڑ چھڈی تے بس میں نہیں دینا خرچہ، تے جے تسیں مینوں جیلے گھلو گے تے میں جیلے ٹر جاں دا۔'

ایہدکیں میجسٹریٹ نے سختی کیتی۔

' توں بڑا بے عقل منڈا ایں،' اوہنے اکھیا ۔ میں تینوں اک ہفتہ دینا ، ایہدے پشلے بقیا پیسے دے۔ تے جے توں ہن کوئی پاگل پنا کیتا تے توں جیل جائیں دا ، اوہدوں تک جدوں تک تینوں عقل ناں آ گئی۔ '

ہربرٹ نے خرچہ ناں ای دتا، تے انج نیڈ پریسٹن نوں اوہدا پتا لگا تے میں اوہدی کہانی سُنی ۔

' تینوں کیہ سمجھ آئی اے،' نیڈ نے کہانی مُکا کے پُچھیا۔ ' ویکھ ، بییٹی کوئی بھیڑی کڑی نہیں سی۔ میں اوہنوں کئی واری ویکھیا، اوہنوں کوئی مسلہ نہیں سوائے ہربرٹ دی گڈی دے ساڑے توں ؛ تے ہربرٹ وی کوئی پاگل نہیں۔ دراصل اوہ عام بندیاں نالوں ہشیار اے۔ تیرا کیہ خیال اے کہ گڈی اُڈان وچ ایسا کیہ اے جنھے اوس بے عقل نوں اُکا پاگل ای کر دتا اے؟'

' پتا نہیں ،' اوہنے جواب دتا ۔ میں سوچن تے بڑا ٹیم لایا ۔ 'ویکھ ، مینوں تے گڈیاں اڈان دا ایہڈا پتا ای نہیں ۔ شید اوہدے نال اوہنوں طاقت مسوس ہوندی اے ، جدوں اوہ اوہنوں اُچا بدلاں ول اڈدیاں ویکھدا اے۔ تے شید سارے عناصر تے ملکیت ، جدوں اوہ ہوا واں وچ اوہنوں اپنی مرضی نال موڑ دا اے۔ ہو سکدا اے اوہ کسے عجیب طریقے اپنے آپ نوں گڈی آر ، ازاد تے اچا اڈدا مسوس کردا اے، تے ایہ حیاتی دی یکسانیت / اکو جیہے ہون توں جان چڈھان والی گل اے/ فرار۔ ایہ وی ہو سکدا اے کہ کسے ناں کسے طرحاں ازادی تے مہم جوئی دی سبھ توں اچی مثال نوں ظاہر کردی اے۔ تے تینوں پتا اے، جدوں کسے نوں اک واری مثالی ہون دا جراثیم لگ جاندا اے تے کسے اعلیٰ شاہی معالج کول وی ایہدی دوا نہیں۔ پر ایہ سبھ کجھ ہے بڑا سپنے ورگا۔ تے میں ایہ وی آکھن دی جرات کراں دا کہ بس بک بک تے بے تکا اے۔ میں سمجھنا ں کہ توں ایہ کہانی اوہنوں سنا جنہوں میرے نالوں ودھ کے انساناں دی تے جنوراں دی نفسیات دی جانکاری اے۔

*****