دو روزہ انٹرنیشنل پنجابی کانفرنس "پنجابی ادب وچ برداشت"۔۔۔۔۔٭رویل خبر٭

دو روزہ انٹرنیشنل پنجابی کانفرنس "پنجابی ادب وچ برداشت"۔۔۔۔۔٭رویل خبر٭

لاہور(نمایندا رویل)پنجابی زبان ،پہلے دن توں ای ایس پکھوں چوکھی دھنی رہی اے کہ ایس نوں صوفیاں، درویشاں، سنتاں، بھگتاں اتے ولیاں دی ہلاشیری دا تھاپڑا رہیا اے۔ اوہ بھاویں ناتھ پنتھ جوگیاں دی شاعری دا عہد ہووے یاں فیر اسماعیلی پیراں دی وچار دھارا، بابافرید دیاں سمجھونیاں ہون یاں شاہ حسین دیاں کافیاں، سلطان باہو دیاں سی حرفیاں ہون یاں بلھے شاہ دے دوہڑے، وارث شاہ تے میاں محمد بخش دی قصہ کاری ہووے یاں خواجا غلام فرید دی ہفت زبان شاعری، پنجابی زبان و ادب دے صدیاں پرانے کلاسیکی شعری سرمائے وچ نہ صرف انسانی اخلاق دی اصلاح دے پکھاں نوں نتارن دیاں کوششاں ہوندیاں رہیاں نیں سگوں اوہناں کاوشاں توں پنجاب دی سیاسی، سماجی تے مذہبی تواریخ وچ کئی بدلاؤ وی ویکھن نوں ملدے رہے نیں۔

اجوکے سمیاں وچ آئے دن ودھ رہی سماج وچلی عدم برداشت تے تشدد پسند سوچ نوں ڈکا لاون لئی ایس توں ودھ چنگا اپرالا کیہ ہوسکدا اے کہ کسے تعلیمی ادارے دی چھتر چھاویں پنجاب دے صدیاں پرانے ادبی ورثے نوں نویں سریوں اجوکی نوجوان نسل ساہویں رکھیا جاوے تاں جو معاشرے وچ آئے روز پھیل رہی افراتفری تے اک دوجے نوں برداشت نہ کر سکن دے رویاں دی حوصلہ شکنی کیتی جاسکے۔ ایس پکھوں گورنمنٹ گریجوایٹ کالج برائے خواتین وحدت روڈ لاہور تے گورنمنٹ اسلامیہ گریجوایٹ کالج سول لائنز لاہور دی سانجھ نال دو روزہ انٹرنیشنل پنجابی کانفرنس "پنجابی ادب وچ برداشت" 09-10 مارچ 2023ء دا پربندھ کیتا گیا۔ ایس کانفرنس دے پہلے دیہاڑ دے تن وکھ وکھ سیشن گورنمنٹ گریجوایٹ کالج برائے خواتین وحدت روڈ لاہور وچ منعقد کیتے گئے۔ پہلے سیشن دی پردھانگی دے فرائض ادارے دی پرنسپل پروفیسر فرح رشید ملہی سرانجام دتے۔ اوہناں دا آکھنا سی: اجوکے ویلیاں وچ اپنیاں دِھیاں نوں برداشت دا سبق دینا لازم و ملزوم امر اے۔ ایس توں بنا نہ تے معاشرے وچ سدھار آسکدا اے اتے نہ ای اوس وچوں تشدد پسندی تے ات گردی نوں مکایا جاسکدااے۔ پہلے سیشن دے اُچیچے پروہنیاں وچ ڈپٹی سیکرٹری ہائیر ایجوکیشن پنجاب جناب عدیل اسلم تے ڈی پی آئی کالجز ڈاکٹر سید انصر اظہر ہوراں خصوصی رلت کیتی۔ پہلے سیشن دا کلیدی مقالا یونیورسٹی آف جھنگ دی وائس چانسلر پروفیسر ڈاکٹر نبیلہ رحمان ہوراں پیش کیتا۔ جد کہ دیگر مقررین وچ پروفیسر محمد ندیم چوہان، ڈاکٹر فلیحہ زہرا کاظمی تے ڈاکٹر فاخرہ اعجاز نے اپنے اپنے مقالے پیش کیتے۔ ایس سیشن دی نظامت دے فرائض ڈاکٹر اختر حسین سندھو نے نبھائے۔

دوجے سیشن دی نظامت ڈاکٹر فاخرہ اعجاز دے ذمے لگی تے اوہناں نے بڑے سوہنے ڈھنگ نال مقررین تے حاضرین نوں اک دوجے نال جوڑ کے رکھن دے خوبصورت آہر کیتے۔ دوجےسیشن دی صدارت ڈاکٹر اختر حسین سندھو کیتی جد کہ مقالا نگاراں وچ ڈاکٹر ظہیر احمد شفیق، ڈاکٹر سعادت علی ثاقب تے پرشانت سنگھ دے ناں سرکڈھویں نیں۔ اخیر تے پروہنیاں وچ انعامات تقسیم کیتے گئے۔پچھلے پہر کانفرنس دا تیجا سیشن "صوفی رت" دی نظامت پروفیسر نگہت رانا دے حصے آئی تے اوہناں نے اپنیاں من موہنیاں گلاں نال حاضرین توں چوکھی داد سمیٹی۔ ایس سیشن دی خوبصورتی نوں چار چن لاون لئی کالج دیاں پڑھیارناں(علینہ، بسمہ تے دیگر) نے آپو اپنے فن دا جادو جگایا تے شاہ حسین، بلھے شاہ، سچل سرمست تے خواجا غلام فرید دیاں کافیاں گا کے خوب داد کھٹی ۔ پروگرام دے اخیر تے معروف گلوکار تحسین تے برطانیا توں تشریف لیائی گلوکارانے پنجابی دے گیت گا کے میلا لٹ لیا۔

پہلے دن دی کارروائی دے انت تے پروفیسر فرح رشید ملہی نے شعبہ پنجابی دیاں اساتذہ پروفیسر ربیعہ قاضی، پروفیسر ثمینہ روحی تے عائشہ کاشف دا شکریا ادا کیتا ۔

کانفرنس دے دوجے دیہاڑ گورنمنٹ اسلامیہ گریجوایٹ کالج سول لائنز لاہور وچ دو سیشن منعقد کیتے گئے۔ پہلے سیشن دی صدارت پنجابی زبان و ادب دے سرکڈھ شاعر، لیکھک تے استاد پروفیسر ڈاکٹرنوید شہزاد ہوراں کیتی۔ جد کہ اُچیچے پروہنیاں چ سابق چیف جسٹس اقبال حمید الرحمن تے روزوار بھلیکھا دے چیف ایڈیٹر مدثر اقبال بٹ خصوصی رلت کیتی۔ پروگرام دا آغاز تلاوت کلام پاک نال کیتا گیا جہنوں پیش کرن دی سعادت گیارھویں جماعت دے طالب علم مزمل حسین حاصل کیتی اوس توں بعدوں پروفیسر جمشید اعظم چشتی نعت پڑھی۔ پہلے سیشن دے مقررین وچ ڈاکٹر محمد رزاق شاہد، ڈاکٹر صائمہ بتول، ڈاکٹر شاہدہ تارڑ اتے ڈاکٹر جمیل احمد پال دے ناں سرکڈھویں نیں۔ جمیل پال ہوراں پنجاب دے معاشرے وچوں مکدیاں جارہیاں انسانی قدراں تے چانن پاؤندیاں بابا فرید دے شعر:

جو تَیں مارن مکیاں، تنہاں نہ ماریں گھم

اپنڑے گھر جایئے، پیر تنہاں دے چم

دی روشنی چ اک دوجے نوں برداشت کرن ول پریریا۔

دوجے سیشن دی پردھانگی پروفیسر فرح رشید ملہی کیتی۔ جد کہ حافظ نوید اسلم، اقبال قیصر تے ڈاکٹر عباد نبیل اپنے مقالے پیش کیتے۔ نبیل شاد اپنے مقالے چ سماجک رشتیاں وچ برداشت دی اہمیت نوں اجاگر کیتا۔ ایس دوران شعبہ پنجابی گورنمنٹ اسلامیہ گریجوایٹ کالج سول لائنز لاہور دے استاد اعجاز سٹیج سیکرٹری دے فرائض سرانجام دتے۔ اخیر تے پنجابی شعبے دے صدر ڈاکٹر عاصم ندیم نے کانفرنس وچ آون والے سبھناں مہماناں دا شکریا ادا کیتا۔ ڈاکٹر احمد شہزاد نےپروہنیاں دی پروہن چاری دے نال نال اوہناں نوں پھلاں دے گلدستے وی پیش کیتے۔ کانفرنس دے دوجے دیہاڑ پنجابی صوفی کلام پڑھن والیاں وچ علینہ، عاتکہ ناصر، عمار قادری تے جشن عباس دے ناں سرکڈھویں نیں۔ ایس سیشن وچ بھبھشن سنگھ گورایا، آسٹریلیا اتے ڈاکٹر سکندر سنگھ رائے ہوراں امرتسر (بھارت) توں آن لائن رلت کیتی۔ دوویں دن کانفرنس دے وکھ وکھ سیشناں وچ اُستاداں تے پڑھیاراں دی چوکھی تعداد نے بھرواں بھاگ لیا اتے دوواں کالجاں دے پنجابی شعبیاں دے ایس آہر نوں چوکھا سلاہیا۔

٭٭٭٭٭