ادارہ پنجابی سُلیکھ تے رہتل سار،جامعہ پنجاب ولوں پنجابی رہتل دیہاڑ تے شاہ حسین سیمینار دا پربندھ۔۔۔٭رویل خبر٭

ادارہ پنجابی سُلیکھ تے رہتل سار،جامعہ پنجاب ولوں پنجابی رہتل دیہاڑ تے شاہ حسین سیمینار دا پربندھ۔۔۔٭رویل خبر٭

(لاہور:رپورٹ نمرہ مجید) پچھلے دیہاڑ ادارہ پنجابی سلیکھ تے رہتل سار جامعہ پنجاب لاہور وچ پنجابی رہتل دیہاڑ تے شاہ حسین سیمینار منایا گیا۔ ۔ ڈائریکٹر اداراہ پرو فیسر ڈاکٹر نبیلہ رحمان ہوراں نے گل بات کردیاں پنجابیاں دی سماجی حالت تے اوہناں د ے تواریخی تے اجوکے سبھا نوں ویروے نال بیان کیتا۔اوہناں دا کہنا سی کہ پنجابیاں نے اپنے کھلے دل والے سبھا نال اپنی وکھری پچھان قایم رکھی ہوئی اے۔پروفیسر ڈاکٹر نوید شہزاد،پروفیسر ڈاکٹر ظہیر احمد شفیق،پروفیسر ڈاکٹر سعادت علی ثاقب، پروفیسر ڈاکٹر عرفان الحق ہوراں نے پنجابی رہتل دیہاڑ تے اُچیچی گل بات راہیں پڑھیاراں نوں اپنے ماضی تے حال نوں جوڑ کے بیانیا تے اوہناں نوں اپنی رہتل تے ہوند نوں اپنی شناخت قایم رکھن دی پریرنا دتی۔

ایس محفل وچ سارے پڑھیاراں نے بھرپور بھاگ لیا ۔ بی ایس ستویں سمسٹر دیاں دو پڑھیاراں نور فاطمہ تے صبا نوں سدا دیون لئی چنیا گیا سی۔اوہناں ڈاڈھے سوہنے انداز نال شعر وی پڑھے تے دوجے پڑھیاراں نوں سٹیج تے آون تے آودے وچار سانجھے کرن واسطے بلایا۔ سبھ توں پہلاں بی ایس تیجے سمسٹر دی پڑھیار حافظہ عروج حنیف نوں تلات قرآن مجید واسطےسدا دیتا گیا۔ فیر نعت مقبول واسطےساجد جپہ (بی ایس پہلے سمسٹر دے پڑھیار) نوں بلایا گیا۔فیر ڈاکٹر سعادت علی ثاقب صاحب اگے بینتی کیتی گئی پئی اوہ آون تے آپنے وچار ساڈے نال سانجھے کرن۔ اوہناں نے آپنی خوبصورت آواز وچ اک سوہنا گیت سنایا۔ تے بھرپور تاڑیاں نال اوہناں دا گیت اخیر تا ئیں اپڑیا۔ فیر شاہ حسین دے بارے "ڈاکومنٹری" چلائی گئی۔ تے اودوں بعد شاہ حسین ہوراں دی حیاتی تے چانن پاون لئی اک "ٹاک شو" ہویا۔جہدے وچ ستویں سمسٹر دی پڑھیار ماریہ نے کجھ ہور سنگیاں اویس اسلم،صبا عارف،نور فاطمہ،عارفہ طفیل۔اسماعیل انور ہوراں نال شاہ حسین دی حیاتی تے اوہناں دی شاعری بارے گل بات کیتی۔ایس توں مگرون بی ایس پنجویں سمسٹر دیاں دو پڑھیاراں نے اک لوک گیت سنایا۔ پنجویں سمسٹر دی پڑھیار یسرا نوں شاہ حسین ہوراں دی کافی سنان لئی سدا دیتا گیا ۔اوہناں نے شاہ حسین ہوراں دی کافی " نی میں کہنوں آکھاں درد وچھوڑے دا حال" اپنی خوبصورت آواز وچ سانوں سنائی۔ فیر پڑھیاراں نے ٹپے گائے۔ اوہناں ٹپیاں وچ پنجاب دے واسیاں دی رہتل جھلکدی سی۔ پہلاں بی ایس پہلے سمسٹر دی پڑھیار ستارہ جاوید تے پچھوں بی ایس تیجے سمسٹر دے پڑھیار سجیل نے غزل سنائی ۔ ایہدے نال نال رائے حسن سرفراز، عبد الرزاق تے ساجد جپہ نے وی منچ تے آ کے سُنن والیاں نوں پنجابی رہتل نال جوڑن دا اپرالا کیتا۔پتوکی دے اک سرکاری کالج توں پروفیسر قمر دی اگوائی ہیٹھ پڑھیاراں نے بھر پور رَلت کیتی تے اوہنا ں ہر پڑھیار نوں کتاب پیش کیتی گئی تاں جو اوہناں دے چیتے وچ ایہ دیہاڑ ہمیش لئی محفوظ رہوے۔ پنجابی رہتل دا سبھ توں ودھیا بانا پاون والے پڑھیار افضل بُلھا نوں کیش انعام دِتا گیا۔پروفیسر ڈاکٹر عرفان الحق ہوراں نے پروگرام دے اخیر وچ سبھ آدر جوگ پروہنیاں،اُستاداں تے پڑھیاراں دا شکریہ ادا کیتا تے اوہناں پڑھیاراں دا وی اُچیچا ذکر کیتا جہناں نے شیرانی ہال نوں اِک دیہاڑ پہلاں بہت سوہنا سجایا ہویا سی اوہناں وچ نور فاطمہ،منزہ،حافظہ عروج، ذیشان انور،شکیل احمد،سجیل شبیر حسین،ارسلان تے ہور پڑھیار سن بعدوں پروفیسر ڈاکٹر عرفان الحق ہوراںایس رنگا رنگ پروگرام نوں مُکاون دا وی اعلان کیتا ۔آون والیاں پروہنیاں تے پڑھیاراں نوں ایہ رہتلی دیہاڑ ہمیش چیتے وچ محفوظ رہوے گا۔

٭٭٭٭٭