kraamaat@gmail.com
+ +92 333-430-6384


امبر حسینی دا ناول”پیرو“ …………٭رویل کالم٭


کرامت مُغل May 14, 2023


امبر حسینی دا ناول”پیرو“ …………٭رویل کالم٭

ناول لِکھنا اِک خوفناک تجربا ہوندا اے ناول لکھن دے دوران وال جھڑ جاندے نیں،دَند ڈِگ جاندے نیں۔“(Flannery O'Connor)

ناول لکھنا کوئی نِکّی جہی فوٹوبناون وانگ تے نہیں ہوندا سگوں ناول وچ پورے جیون دی فوٹو بنانی پیندی اے آل دوال نوں اکھراں نال پڑھنہاراں دے ساہمنے لیانا ہوندا اے۔ ایس لئی تاں جیون دے ہر رنگ نوں ناول وچ سمویا جا سکدا اے۔کوئی وی ناول نگار لکھدیاں ہویاں کھُلھ مان دا اے‘اپنے جیون دیاں کئی رنگاں نوں کرداراں دیاں رنگاں وچ ڈھال دیندا اے۔ناول دی کہانی فطری ڈھنگ نال اگانہ ودھ رہی ہوندی اے جو پڑھن والے نوں اپنے نال جوڑ لیندی اے تے ناول وچ کرداراں دے انفرادی تجربے وکھالی دینا وی ضروری ہوندے نیں‘جد ایہناں گلاں نوں اِک ناول کار جان لیندا اے ٗ اوس دی تخلیق ودھیا توں ودھیا ہوندی جاندی اے۔امبر حسینی دا ناول”پیرو“ پنجابی زبان دی اِک شاعرا دے ناں اُتے لکھیا گیا اے‘ جس دا جیون بڑیاں ای اوکڑاں بھریا لنگھیا ہویا اے۔پیرو اِک باغی شاعرا اے جو سماج دیاں رِیتاں رواجاں توں پرانہ ہو کے سوچدی اے تے ایسے ای سوچ نوں اُلیکدی وی رہی فیر ایہی سوچ اوس دا سبھ توں وڈا قصور سگوں کئی تھاواں تے گناہ وانگ بن گیا لگدا۔ایس باغی شاعرا نوں مُسلم تے سکھ پنجابی لکھاریاں نے گولیا ای نہیں اے۔ایہ اجہی لکھارن اے جو اپنے سارے جیون وچ مذہبی تعصب دے ورودھ وچ رہی‘ اوس نے مرداں دے معاشرے وچ اپنی پچھان بنانا سی جو اوکھی تاں سی۔کئی سوجھواناں نے تاں اوس نوں شاعرا ای منن توں انکار کر دتا‘ کئیاں کول اوہ ”پیرو کنجری“،”حسین کنجری“ توں وکھ کجھ نہیں کہن نوں بچیا۔کئیاں نے اوس نوں ’کسبی‘ تے ’مُسلی‘ لکھ کے طنز دا نشانا بنانوں وی نہیں جھکیا۔

جے پیرو بارے کھوج لایئے تاں ایہ ساہمنے آندا اے کہ اوس دا جنم1810وچ ہویا‘پنجاب اندر اوس ویلے رنجیت سنگھ دی حکومت سی تے ایس دا مرن ورھا1872اے ایس شاعرا دا ناں ”پِیراں دتی“ سی تے ایس دے پِچھے وی اوہی روایت اے جو پیراں دتہ ناں دے پِچھے ہوندی اے۔پیراں دی دعا نال ہوون والے بالاں نوں پیراں نال منسوب کر دتا جاندا اےٗ پیرو دے ماپیاں گھر وی اولاد نہیں سی تے جدوں پیراں دی دعا نال اولاد ہوئی تاں ایس دا ناں ”پیراں دتی“ رکھیا گیا جو بعد وچ پیرو بن کے رہ گئی۔جوانی دی سوہنی پیرو اِک فقیر ول اُلر یٗ اوہ گھروں نس گئی‘ فقیر چھیتی ای اگلے جہان چلا گیا تے اوس لئی عشق جویں دُنیا توں مُک ای گیا۔ فیر حالات نے اوس نوں لاہور دی ہیرا منڈی وچ نچن گاون اُتے مجبور کر دِتا۔کہیا جاندا اے کہ رنجیت سنگھ دے جرنیل الہی خان نال اوس دا تعلق بن گیا سی۔اندرون لاہور دے ای موتی بازار وچ سادھوگُلاب داس آیا تے پیرو وی اوس نوں ملن لئی ٹُر گئی۔پیرو نے سادھو گلاب داس نوں ویکھیا تے فیر اوس نوں جگ اُتے کسے ہور نوں ویکھنا ای نہیں سی اوہ اوسے دی ای ہو کے رہ گئی۔

آئے ست گُر سہر لہور میرے‘ لڑ لاگیاں ویکھ پرکاس سیو

پیرو اپنے سادھو گلا ب داس دی شرن وچ آ چکی سی اوس نے چٹھیانوالا‘ قصور وچ جا ڈیرے لائے سن۔ایس گل دا کسبیاں تے اسلام دے راکھیاں نوں ہرکھ ہویا اوہناں نے جرنیل الہی خان نال مل کے اوس نوں اسلام ول مُڑ جاون لئی آکھیا پر پیرو دا دھرم تاں عشق سی جو اوس نوں کجھ ہور ویکھن توں مناہی کردا۔پیرو نوں وزیر آباد وچ قید کر کے رکھ لیا گیا جس دی خبر کسے نوں وی نہیں لگن دتی۔ایس قید خانے وچ پیرو نے اپنے جیون دے حالات نوں 160کافیاں وچ لکھیا اے‘ پیرو نے کافیاں توں وکھ سی حرفی‘ بارھاں ماہ تے شلوک وی لکھے نیں۔ ایس دے نال نال آپ نے مذہبی تعصب دا وی بھر پور ویروا کیتا سی۔پیرو لکھدی اے:

نہ میں مسلماننی نہ ہندو ہوساں

اِک ہور تھاں تے اوہناں دے وچار ویکھو:

اصلی کوئے نہ نسل ہیں سبھ بھیکھیاں والے

روٹی لیڑے واسطے مُکھ کرہیں کالے

داگل سبھ سنسار ہے بِن داگا نہ کوئی

ست گُر ایک نداگ ہے پرمیسر سوئی

وزیر آباد وچ قیدی دا جیون بھگتن دے دوران اوس نے اپنیاں سہیلیاں جانو تے رحمتی دی مدد نال اپنا سنیہا گلاب داس تک اَپڑایا سی اودھر گلاب داس نے وی پیرو نوں لبھن لئی اپنے دو چیلے ایس کم تے لائے ہوئے سن۔اخیر پیرو تے گلاب داس دا میلاپ ہویا تے دوواں نے سانجھا کلام وی لکھیا اے ہُن اوس نوں ”پیرو ماتا“ یاں ”ماتا صاحب“ نال وی یاد کرن دی گواہی ملدی اے۔

امبر حسینی دے پہلے پنجابی ناول دی ہیروئن داناں وی پیرو ای اے جس دا جیون سہیل نال موہ توں شروع ہوندا اے‘ اگانہ اوہ سوانیاں دے حقاں لئی اپنی اَواز چُکن والیاں دا رُوپ دھار لیندی اے اوس نوں مرداں دے دسے ہوئے تے دِتے ہوئے جھوٹھے تے صرف دکھاوے دے مان سنمان اُکا نہیں پسند وچ،کدے کدے تاں ہتک بُہتا محسوسدی اے جو اوس دے نفسیات نوں بیان کردا اے۔ امبر حسینی نے من موہنابیانیا تے انسانی دلچسپی دوواں نوں ناول وچ برقرار رکھیا اے کئی لکھاریاں نوں ویکھیا گیا اے کہ اوہ بیانیا ودھیا کرن دے وچ پڑھنہاراں دی دِلچسپی نوں اُکا ای بھُل جاندے نیں جو حدوں ودھ لوڑیندا ہوند ا اے۔ایہ دلچسپی مُڈھ توں لے کے اخیر تیکر برقرار وی رہندی اے جو پڑھنہاراں نوں کہانی نال جوڑے رکھدی اے۔

کہیا جاندا اے کوئی وی کہانی لکھناپریم دا معاملا ہوندا اے پر ناول لکھناپورا ویاہ کرنا ہوندااے جہدے وچ جیون دے کئی رنگ ویکھے جا سکدے نیں۔امبر حسینی اپنی تخلیق دی اذیت دا مُل منگ رہی اے تے ایس دا مُل ایس ناول نوں پڑھدیاں ہویاں ہر سمجھدار پڑھنہار تارے گا تے اوہ پِیرو نوں بھالدا ای رہوے گا‘ کیوں جے جہڑا کرب اوس نے بیانیا اے اوہدے وچ حقیقت د رنگ بھرن دا چارا کیتا گیا اے۔

اَج دا انسان، زندگی جِین توں ڈریا ہویا اے پیرو جیونا چاہندی اے تے اوہ رِیتاں رواجاں توں اگے دے سفر ول اے اوہ اسسٹنٹ کمشنر کول بالڑیاں دے سکول دا مسئلا لے کے جا اَپڑدی اے۔امبر حسینی نے ایس بالڑی دی سیانف د ا ویروا مُڈھ وچ ای کر دتا اے۔کہانی اِک مُنڈے تے اِک کُڑی دوالے ای گھُمن لگ جاندی اے گھر توں کالج تے فیر کالج توں یونیورسٹی دا جیون روایتی کہانی ای ٹُردی رہندی اے پر ایس وچ لکھارن نے دلچسپی نوں مُکھ رکھیا اے۔سہیل دے بدیس جاون مگروں اوس دے جیون وچ جِتھے جذبات دی شِدّت اے اوتھے اوس دا اپنی ذات ول،اپنی سوچ ول تے اپنیاں حقاں نوں جانن ول وی سفر اے جو کرڑے حالات وچ انسان نوں ہور مضبوط کر دیندا اے۔

امبر حسینی اپنے ناول دے چھیویں باب توں مگروں ہر سوانی دی اَواز بن جاندے نیں تے اِک دم ایہ تبدیلی اوس دے انترمن توں پُنگردی وکھائی گئی اے کدھرے اوہ بدیس ٹُر گئے سہیل دی یاداں وچ سِسکدی اے تے کِدھرے اوہ سوانیاں نال ہو رہیا دھرو ویکھ کے اندروں اندری کُڑھدی اے تے رِیتاں رواجاں نوں ناپسند کہندیاں ہویاں اوہ فیمینزم دا سبق پڑھن لگدی اے تے ایہی سبق سبھ نوں سمجھاون وی لگدی اے۔اوس نوں ”شخصیتاں“ نوں پوجنا وارا نہیں اے پر ایہ ناول نگار نوں سِکھی لہر توں متاثر ویکھیا جا سکدا اے جس نوں باقی ”شخصیتاں“ تاں قبول نہیں پر سِکھاں نوں اوہ ودھا چڑھا کے بیانن توں نہیں رُکدے نیں۔ایہ جھاؤلا ایس لئی وی ہو سکدا اے کہ پیرو پریمن تے گلاب سنگھ دے رنگ تے سوچ نوں امبر حسینی اُلیک رہی سی تے جیون دیاں نویاں سچائیاں نال ساہمنا کردی پئی سی۔ایہ جیون دیاں سچائیاں دا ساہمنا ای تاں جیون دا اولڑا سبق اے جو پڑھنہار اں نوں مِلدا اے۔

ناول نگار نے اپنے رَچّے کرداراں نوں بیانن لئی ایہ دھیان رکھیا اے کہ کوئی گنجھلک تصویراں نہ بنائیاں جاون تے وادھو دے مواد نال غیر ضروری طور تے کہانی نوں پھیلاون توں بچے نیں جو اجکل نویں لکھن والیاں دا وتیرا(وطیرا) بن چُکیا اے۔امبر حسینی نے اپنے ناول دی کہانی نوں اَگے چلاون وچ مکالمیاں دا بھر پور ورتارا کیتا اے شاید کجھ پڑھنہاراں نوں ایس ناول وچ مکالمے ہورناں ناولاں توں وادھو جاپن پر ایہ ناول کار دااپنا اُسلوب اے، جس نال اوہ سوکھت محسوسدی ہوئی اِک خاص فضا قایم کرن وچ کامیاب ہو جاندی اے۔ کدھرے کدھرے اوہ پاپولر لٹریچر لکھن والیاں توں چوکھا ای متاثر لگدیاں نیں پر چھیتی ای اوہ ایس توں جان چھڈاون وچ کامیاب ہو جاندیاں نیں۔پیرو داسہیل پِنڈوں اُچا ہوون لئی

شہر گیا تے شہروں بدیس ٹُر گیا سی پر اپنی پچھان کدھرے ایہناں راہواں وچ ای گوا بیٹھا سی ایہ اِک پنجابی دی نہیں کئی پنجابیاں دی کہانی اے۔پیرو ایہ فیصلا کردی اے کہ کسے ہور دے واسطے اپنے جیون نوں گواون توں چنگا اے کہ اپنے اندر آس نوں جگایا جاوے تے اوہ شہر نوں جاون دی تیاری وچ رُجھی اے جو اوس دی اپنی پچھان ول سفر اے ایتھے اوہ اوہناں سوانیاں دی اَواز بننا چاہندی اے جو اپنا جیون مرداں دے بنائے سماجی اُصولاں دی بجائے اپنیاں نویاں راہواں بناون لئی جُٹ جاندیاں نیں تے منزلاں نوں لبھ لیندیاں نیں۔

پنجابی گلپ وچ سوانیاں نے اپنا بھرواں حِصّا پا یا اے اوہناں نے سماج دے اوس پکھ نوں بیانیا اے جس پکھ نوں مرد لکھاریاں نے اُکا ای نہیں اُلیکیا۔ایہناں سوانیاں مرد دی نفسیات نوں اوس دے اندر نوں جِویں اُلیکیا اے ایہ اوہناں دا ای خاصا اے جو گھٹ ای سوانی ناول نگاراں کول مِلدا اے بھاویں اوہرفعت دا ناول ”ہسپتال“،کہکشاں ملک دا ناول”ماں وڈی“ رضیہ نور محمد ”بلدے دِیوے“ فرخندہ لودھی دا ”جنڈ دا انگیار“ نسرین بھٹی دا ”گُنجھل“ یاں فوزیہ رفیق دے دو ناول ”سکینہ“ تے”کیڑو“ ای کیوں نہ ہوون۔امبر حسینی دے ناول لکھن دا سفر اجے شروع ہویا اے‘ آس اے کہ اوہ پنجابی زبان وچ ودھیا ناول لکھدے رہن گے۔

ایہ ناول پنجابی مرکز لاہور ولوں فروری2023وچ چھپیا اے‘ کُل صفحے128 تے مُل400 اے۔

٭٭٭٭٭