kraamaat@gmail.com
+ +92 333-430-6384
خرم شہزاد
May 23, 2023
"نانی نانی مینوں مامے مدثر دی کہانی فیر سُناویں گی ؟"
"وے پترا اوہ کہانی نہیں میری زندگی دی آخری اُمید سی اوہ وی میرے کولوں کھوہ لئی گئی۔ اوس ویلے لیا گیا اوس دا پیڑ دے نال لیا گیا اک اک ٹُٹا ساہ میرے سینے وچ سُوئیاں وانگوں کُھبیا ہویا اے۔"
"نانی جدوں ماما ایس دُنیا توں گیا اودوں کِنی عمر دا سی ؟ "
وے پترا شیراں دیاں دی عمر چوکھی نہیں ہوندی عمراں تے کئی کئی ورھے گدڑاں دیاں ہوندیاں نیں۔ شیراں وانگوں شیر دل انسان وی اپنیاں لئی مر جاندا اے یا ں مار دیندا اے۔
نانی جی تہاڈا تے اِکوای پتر سی فیر تسیں اوس نوں لام تے کیوں گھلیا ؟
بچیا کس ماں دا جی کردا اے اپنے ہیرے جہے پتر نوں اپنے ہتھی لام جہی دوزک وچ دھکا دیوے ؟ تے نالے تینوں کِہنے آکھیا اے کے تیرا ماما لام وچ شہید ہویا سی ؟ تیرا ماما تے انقلاب دی اگ وچ سڑیا سی۔
اج توں 20 سال پرانی گل اے جد تیریاں تن ماسیاں توں بعد چوتھا تیرا ماما جمیا میں پورے محلے وچ 2 من موتی چُوڑ دے لڈو ونڈے اوہ وی دیسی گھیو نال بنے ہوئے سارے محلے نے گھر آ آ کے مینوں ودھائیاں دتیاں پر تیرے نانے دے نصیباں وچ اپنے پتر نوں کھڈانا چوکھی دیر نہ ہویا حالے تیرے مامے دی عمر صرف دو ورھے سی کہ اوس دا پیو تے تیرا نانا ایس ظالم دنیا توں چلانا کر گیا۔ اوس دے جاون توں بعد جویں دنیا ای بدل گئی ہووے۔ تیریاں ماسیاں وڈیاں سن تے سکول جاندیاں سن۔ جد تیرا نانا مریا تد میرے لئی اوہناں دا خرچا پورا کرنا مشکل ہو گیا۔ میں اوہناں نوں سکولوں اٹھا کے کڈھائی سلائی دا ول سکھایا۔
تیری ماں شائستہ ساریاں بھیناں نالوں وڈی ہوون پاروں میرا ساتھ دیندی سی تے اسیں رل مل کپڑے سی کے گزارا کر رہے ساں۔ سکندر وی ہن سکول جاون لگ پیا سی تے میں اوس نوں پڑھاون دا فیصلا کیتا کیوں جے اوہ پڑھ جاندا تے سارے ٹبر نوں سنبھال سکدا سی۔ دھیاں نوں پڑھاندی تے مینوں کیہ حاصل ہوندا ؟ کیوں جے دِھیاں تے ہوئیاں پرایا دھن۔
نانی پرایا دھن کیہ ہوندا اے تے نالے تسیں دِھیاں نوں کیوں نہ پڑھایا ؟
ویکھ احمد پترا دھیاں جد وڈیاں ہوندیاں نیں تے اوہناں دا ویاہ کسے نا کسے نال ویاہ کر کے اوہناں نوں گھروں ٹورنا پیندا اے ایس پاروں دھیاں نوں پرایا دھن آکھدے نیں۔
نانی جی اوہ تے تہاڈی گل ٹھیک اےٗ پر دھیاں نوں کیوں نہیں پڑھایا ؟
چپ کر کنی ننو لیندا اے۔۔۔ کجھ سوال ہوندے نیں جہناں دا جواب نہیں دتا جا سکدا بس چپ کر ہن توں مامے دیاں گلاں سننیاں نیں یاں میں اُٹھ جاواں ؟
نہیں ہن میں نہیں بولدا چپ کر کے ای سنا ںگا۔ اوتھوں گل سناؤ جس دن ماما ایس دنیا توں گیا ہویا سی۔
آہو وے اڑیا او دن اوہ منحوس دن میری زندگی دا سبھ توں کالا دن اوس دن میری زندگی وچ موجود سبھ ہریالی اتے حل وا دتے گئے تے میں بنجر زمین وانگوں ویران ای رہ گئی۔
نانی ایہ کیہ کہہ رہی اے میرے پلے کجھ نہیں پے رہیا بجھارتاں کیوں بُجھا رہی اے سدھی گل دس اوس دن ہویا کیہ سی ؟
اج توں پنج ورھےپچھے جد تیرا ماما پندرھاں ورھیاں دا سی تد سیاست دی ہل چل سی ہر پاسے سیاست دا رولا سی لوکی ووٹاں پچھے جان دیاں بازیاں پئے لاندے سن۔ سیاستدان اک اک ووٹ پچھے چوڑیاں مسلئیاں نوں وی اپنا پیو سمجھی بیٹھے سن تے کئیاں نوں نوٹاں دیاں وڈیاں وڈیاں دتھیاں دے کے ووٹ خرید رہے سن تے بڑے چوڑے ہو کے ٹردے سن۔
نانی سیاستداناں دا ناں کیہ سی ؟
وے پترا مینوں ناواں دا تے پتا نہیں لوکی اک نوں باندر مونہا آکھدے سے تے دوجے نوں پالش والا خورے تیجے نوں بڈھی مار کے آگیا آیا ہویا آکھدے سن۔ رب سبھ دا خانا خراب کرے لوکاں دے جوان بچیاں نوں لے ڈبے نیں۔
نانی نانی لوکی سیاست پچھے اپنیاں بڈھیاں وی مرواں سکدے نیں ؟
احمد پتر کرسی دی اگ اوہ اگ اے جہڑی پورے پورے خاندان نوں سار کے سواہ کر سکدی اے۔
نانی کرسی پچھے لوکی کیوں پاگل نیں ؟ کرسی تے میرے کول وی اے۔ بھلا میرے کولوں کرسی لے لیندے میں دے دینی سی ۔
ماں صدقے جاوے تیری کرسی تے اوس کرسی وچ زمین اسمان دا فرق اے اک تے توں سوال بہت کرنا اے اڑیا مینوں فیر گل بھل جاندی اے اچھا تے میں کتھے ساں ؟
باہر ہر پاسے لام جہیا عالم بنیا ہویا سی۔۔۔۔
آہو آہو یاد آگیا بڈھی ہو گئی آ ایس توں گل کردی کردی بھل جانی وا ںکیہ آکھدی پئی ساں اچھا آہو باہر اوس ویلے پُتر لاماں توں وی بڑا حال ہویا پیا سی ۔ سیاسی پارٹیاں اک دوجے دے کارکن نوں مارن تے تُلیاں ہوئیاں سن۔ جیویں کارکن کسے دے پتر کسے دے بھرا یا کسے دے شوہر نہ ہوون اوہناں سیاستداناں نوں تے موت بھلی ہوئی سی اک دوجے دیاں جاناں پچھے ہتھ دھوں کے پئے ہوئے سن تے نال عام عوام دا وی جینا حرام کیتا ہویا سی۔
سیاستداناں اپنے منن والیاں نوں جھوٹھ سچ دس کے اک دوجے دے خلاف کیتا ہویا سی تے وکھو وکھ تھاواں تے سڑکاں بند کر کے دھرنے وی دتے ہوئے سن۔
نانی جان دھرنا کیہ ہوندا اے ؟
پترا اپنیاں گلاں منواون لئی راہ بند کر کے لوکاں نوں ذلیل کرن نوں دھرنا اکھدے نیں ۔ جیس وچ کسے وی دوجی پارٹی دے ممبر یا کارکن دے ہتھی لگ جاون تے کوئی رحم نہیں کیتا جاندا نہیں کوئی کسے مریض دا خیال کردا تے نہ کوئی کسے وڈے دا بس اپنیاں گلاں مناون اتے تلے ہوندے نیں جے کوئی مردا اے تے مرے جے کسے دا ویاہ راہ بند ہوون پاروں ختم ہوندا اے تے بھاوے لکھاں گھراں نوں جاندے مسافر سڑکاں اتے ذلیل ہوندے رہن اوہناں نوں کسے دی فکر نہیں ہوندی۔ اوس نہ پتا لگدا اے کہ دُشمن کہڑا اے تے نہ پتا لگدا اے کہ یار کہڑا اے سارے اِکو ای رنگ وچ رنگے ہوندے نیں۔
نانی مامے دی کہانی کتھے گئی ؟
مینوں نویں نہ گلاں کردی پتا نہیں لگدا تے کتھوں دی کتھے نکل جانی آ۔ بھلا توں کیہ جانے سیاست دیاں کھیڈاں میں وی نہ ۔۔۔۔
اوہناں دناں وچ جد سیاست دا زور سی کجھ دناں بعد عید سی میں تیرے مامے دے نال تہاڈے گھر تیری ماں نوں عید دین آندی پئی سی ۔ سٹاپ توں گڈی وچ بیٹھی تے حالے گڈی چلی نوں بس دس منٹ ای ہوئے سن کہ کجھ سیاسی کارکنان گڈی دے اگے کھلو کے گڈی روک لئی۔ اوہناں لوکاں دے مونہاں اتے داڑھی سی تے کلمے پڑھ پڑھ دین ویچدے سن۔
اوہناں سانو ں سبھ نوں گڈی وچوں باہر آون نوں آکھیا تے گڈی خالی کروا لئی۔ اینی دیر وچ کجھ ہور پارٹیاں دے لوک وی آکٹھےہوگئے تے آمنے ساہمنے کھلو کے نعرے مارن لگ پئے۔ اوہناں وچ کجھ لوگ ایسے سن جہناں نوں سیاستداناں نوٹاں دیاں وڈیاں وڈیاں دتھیاں دے کے اوہناں دیاں آوازاں خریدیاں ہوئیاں سن تے کجھ اوہ سن جہناں نوں شاطر سیاستداناں چوڑیاں مسئلیاں توں چک کے ملک تے چودھری بنایا ہویا سی۔
نانی مامے دی گل کرو۔۔۔
وے توں کھسماں نوں کھاوے مینوں گل وی پوری نہیں او کرن دیندا تے بول پینا وے چل میں تینوں چھیتی چھیتی دسنی آ جدوں اوہ کارکن اک دوجے دے سامنے کھلو کے نعرے مار رہے سن تد وچوں اک ماں دے کھسم اونتر جانے نے دوجے سور دے مونہوں والے نوں زمین توں چک کے پتھر ماریا جیہڑا کے کول کھلی مینوں وجن ای والا سی کے تیرا ماما چھتی نال اگے آگیا۔ پتھر سدھا تیرے مامے دے سر وچ وجا تے خون پہاڑ وچوں نکلدے چشمے وانگ چھالاں ماردا وگن لگ پیا۔ میں بتھیرا روئی پٹی پر کسے نے میری اک نہ سنی لوک انقلاب انقلاب دے نعرے مار دے اوتھوں اگے ودھ گئے۔ جد میں اپنے سر توں دُپٹا لا کے اپنے پتر دے سر نوں بنیا تے کئی انقلابی انقلاب دے نعریاں نوں چھڈ کے میرے سر دے وال تیکر گنن لگ پئے تے کلمے پڑھدے ہوئیاں نیں اوس پسینے نوں جیہڑا کے میرے متھوں شروع ہویا تے پورے جُسے وچوں لنگھ کے زمین اتے ڈگا اوس اک اک قطرے نوں تکیا۔۔۔
گرمی اخیراں دی سی سورج وی اپنی آکڑ وچ سینا تانے لوکاں دے جُسیاں نوں ساڑن تے ای تلیا ہویا سی۔ تیرا ماما وچارا چِیکاں ماردا بے ہوش ہوگیا۔ میں اتھے کرودندی کرلاندی رہی تے اوتھے ای موجود اک گڈی دی سواری نے میری مدد کرنی چاہی تے تیرے مامے نوں چک کے ہسپتال پہچانا چاہیا پر کجھ انقلاب دے وحشیاں نیں سانوں اگے نہ جاون دتا رش اینا کُوں سی کہ نہ بندہ پچھے وی نہیں سی جا سکدا۔ تیرے مامے نے ڈھیر خون وگن پاروں میرے ہتھاں وچ ای دم توڑ دتا میں اوتھے ای کروندی چِیکاں ماردی رہ گئی پر انقلاب دیاں نعریاں وچ میریاں چِیکاں خورے کتھے گم سم ای ہو گئیاں مینوں وی نہ پتا لگا۔
میرے ساہمنے میرا چمن دا باغ اجڑ گیا میریاں اکھاں دا نور میرے بُڈھاپے دا سہارا میریاں دھیاں تے اپنیاں بھیناں دا بھرا انقلاب دی نظر ہو گیا۔
نانی کیہ فیر انقلاب آیا ؟
نہ پتر کتھے میرے جہیاں جے لکھاں ماواں وی رون تد وی انقلاب نہیں آسکدا کیوں کہ انقلاب سیاستداناں لئی کوئی وڈی گل نہیں پر اوہناں عام عوام نوں انقلاب تے آزادی دی اگ وچ اپنا بالن بنانا ہویا اے تے انقلاب دی اگ جد ماری جہی مکن لگدی اے تد میرے جہیاں کئی ماواں دے پتراں نوں لکڑاں دے ڈچیاں وانگوں انقلاب تے آزادی دی اگ وچ سٹ دتا جاندا اے تا ں جے ایہ اگ کدی ختم نہ ہو سکے۔
بھاویں ماواں دیاں اکھاں دے تارے ماواں دے چین بھیناں دے مستقبل بچیاں دے واحد سہارا بڈھیاں دے بندے اوہناں توں جدا ہو جاون سیاست داناں نوں کوئی فرق نہیں پیندا ۔ عام عوام تے بس اوہناں لئی کیڑیاں مکوڑیاں وانگوں اے جہنوں جد چاہن اوہ اپنے پیراں تھلے کُچل سکدے نیں۔
نانی کیہ کوئی ایسا نہیں جیہڑا عام عوام دا دکھ جانن تے اوہناں دی گل سنن والا ہووے ؟
پتر توں حالے نکا اے تینوں ایہ سیاست جہی خطرناک کھیڈ بارے علم نہیں۔ ایس وچ کوئی کسے دا سکا نہیں اوہ زمانے گئے جد کوئی ماں دا جایا حلال دا وی سیاست دان ہوندا سی ہن ہر کسے نوں اپنے ڈِھڈ نوں بھرن دی پئی ہوئی اے۔
نانی پر مینوں اک گل سمجھ نہیں آئی کے لوک دھیاں نوں پرایا دھن سمجھ کے پڑھاندے کیوں نہیں حالاں کہ اوہناں ای تے اگوں خاندان سنبھالنے ہوندے نیں ؟
وے جا وے تینوں تیری ماں بُلاندی پئی او توں وی گلاں دا گالڑ اے رَجدا ای نہیں گلاں سُن سُن کے، جا جا کے ماں دی گل سن ۔
٭٭٭٭٭
