تعلیم گرہن۔۔۔۔۔۔٭رویل لیکھ/پہلی قسط ٭

پنڈاں دا جتھے ایہ المیہ ااے کہ تعلیم دے مواقع نہ ہوون دے برابر نیں اوتھے ایہ وی حقیقت اے کہ معیاری تعلیم دا ناں نشان وی نہیں۔ انھیاں وچ کانے راجے بتھیرے نیں پر تعلیم دی الف بے توں واقف بہت گھٹ۔ ایہوں وجھا اے کہ ستر فیصد توں ودھ ٹیلنٹ ضائع ہو جاندا اے۔ نہ کوئی دھیان دیندااے تے نہ کسے نوں لوڑوی اے۔ آکھیا جاندا اے تعلیم کسے وی قوم دی شہ رگ یاں نبض ہوندی اے تے ایہدے لئی جویں اک جسم نوں جیوندے رہن واسطے گھٹ توں گھٹ پنج بوتلاں خون چاہیدا اے ایویں تعلیمی لحاظ نال قوم نوں جیوندیاں رہن واسطے جی ڈی پی دا 4% بجٹ ضروری اے مگر افسوس کہ ساڈےدیس دی پیدائش تو ں لے کے ہن تک ایہ اک نعرا تے سُفناای رہیا۔ سیانیاں دے بال باہروں پڑھ کے ساڈے تے حکومت کری جا رہے نیں تے اسیں خُش وی ہاں۔ اوہ جاندے نیں کہ جے 70% لوکاں نوں معیاری تعلیم دے مواقع دے دتے تے مقابلا سخت ہو جاوے گا تے اگلے کجھ ورھیاں وچ ہر تھاں ایہی خانابدوش تے مڈل کلاس وغیرہ نظر آون گے جو ایہناں دی بقاء لئی خطرااے۔

پنڈاں وچ ساڈے ورگا جے کوئی سینے دے زور تے مقدراں دے لکھے نال پڑھ جاندا اے تے اوہدے ای قبیلے دے لوگ اوہنوں منن توں انکاری ہو جاندے نیں تے اللہ واسطے دا وَیر رکھدے نیں۔ ساڈے معاشرے وچ اک سپاہی دی عزت بہتی اے بہ نسبت اک پی ایچ ڈی دے۔ ایہدا تجربا مینوں اودوں ہویا جدوں اک واری مینوں اک دوست لئی تھانے جانا پیا تے صاحب بہادر جو دوویں پیر میز تے رکھ کے براجمان سن مینوں ویکھے بناں ای پچھیا " ہاں وئی"۔ میں ڈردے ڈردے اپنا تعارف کروایا کہ میں اک استاد ہاں تے پی ایچ ڈی وی ہاں۔ اوہنوں نوں شدید غصا آیا تے منشی نوں بلا کے آکھیا کہ ایہ سفارشی اے ایہنوں پرچے وچ نامعلوم دی تھاں رکھ لوو۔ بڑی مشکل اپنی جان بچائی تے اوتھوں نکلیا حالاں کہ زیادتی وی ایہناں دی ای سی۔ بس اوس دن توں بعد کدی کسے نوں تعارف کران دی ضرورت محسوس نہ ہوئی۔

ایہ کتاب میں جان بجھ کے پنجابی وچ لکھ رہیا ہاں۔ اک کارن ایہ وے کہ پنجابی میرے لہو وچ شامل اے تے دوجی ایہ کہ جنے گھٹ لوگ ایہنوں پڑھن گے اوہناں ای چنگا اے۔ من دا بھار وی ہلکا ہو جاوے گا تے تماشا وی نہ بناں گا۔ ویسے کتاب پڑھن دی صدی تے گزر چکی۔

کتاب وچ بہت سارے باب شامل کیےے گئے نیں تے ہر وچ اک وکھرا موضوع تے واقعات نیں۔ زیادہ تر واقعات دراصل تجربات تے مشاہدات نیں۔ کجھ کردار جان بجھ کے بدل دتے گئے نیں تاں جے گل اتے کجھ پردا پے جاوے۔ سمجھن والے سمجھ جان گے۔ پنج ورھیاں توں " تعلیم گرہن" ادھوری سی اج ایہدا نک نقشابننا شروع ہو گیا اے تے جلد ای مکمل جنم تے ظہور ہووے گا۔۔۔۔۔۔

جاری اے